Notísia foun


(Artigo Ida Ne’e Liga Ba Esbosu Lei Kriminaliza Difamasaun iha Timor-Leste)

Husi: Moisés Vicente

Timor-Leste nia independénsia iha loron 28 fulan Novembru 1975, ne’ebé Frente Revolusionáriu Timor-Leste Independente (FRETILIN) mak proklama, sei hetan rekoñesimentu Internasionál iha loron 20 fulan Maiu tinan 2002, wainhira povu timoroan hetan libertasaun hosi kolonializmu no okupasaun ilegál ba Pátria Maubere hosi poténsia raiseluk. Elaborasaun no adosaun Konstituisaun Repúblika Demokrátika Timor-Leste nian, mak tutun-a’as rezisténsia sekulár povu timoroan nian ne’ebé sai maka’as liu horik invazaun loron 7 fulan Dezembru tinan 1975. Funu hasoru funu-maluk, hahú ho FRETILIN nia lideransa, ne’ebé loke dalan luan tan ba partisipasaun polítika, hodi hamoris Konsellu Nasionál Rezisténsia Maubere (CNRM) iha tinan 1987, tuir mai Konsellu Nasionál Rezisténsia Timorense (CNRT) iha tinan 1998. Rezisténsia hala’o iha frente oin tolu. Frente armada ne’ebé Forsas Armadas Libertasaun Nasionál Timor-Leste (FALINTÍL) hala’o ho barani tebes hodi hasa’e asaun históriku ida. Asaun hosi frente klandestina, ne’ebé hala’o hodi matenek iha funu-maluk sira-nia leet, ne’ebé feto no mane rihun barak fó sira-nia moris, liuliu klosan sira-ne’ebé hala’o funu ho sira nia moris atu bele hetan liberdade no independénsia. Frente diplomátika, ne’ebé hala’o iha mundu raiklaran, loke dalan ba libertasaun total. (Preámbulu Konstituisaun da RDTL-2002).

Iha fulan hirak  liubá, Estado Timor-Leste liu husi Governo, autorizasaun Parlamentu Nacional (PN), husu ba Prezidente da Republika (PR) atu hasai Dekretu  Governu nian n.º 3/2020, loron 28 fulan-marsu, kona-ba medida sira atu ezekuta deklarasaun Estadu Emerjénsia nian, ne’ebé fó-sai liuhusi Dekretu Prezidente Repúblika n.29/2020, loron 27 fulan-marsu tinan 2020, hodi hatán ba ameasa husi surtu COVID-19 nian. Estado Emerjénsia kona-bá moras pandemia mundial Corona Virus Disease 2019 (COVID-19) nune’e Estado Timor-Leste bandu, populasaun sira nia limitasaun no direitu liberdade fundamental balu kontinua hakmatek iha uma ho razaun ne’e  COVID-19 at ne’e la bele hadaet mai to’o Rai Doben Timor-Leste. Moras COVID-19 seidauk remata populasaun em jeral rona fali iha semana ne’e fó sai iha mídia, debate rame los no hamanas los kona-ba Esbosu Lei Kriminaliza Difamasaun ba sidadaun ne’ebé hakarak kritika orgão soberano estado sei hetan kastigu ka pena prizaun tinan 1 ba to’o tinan 3. Tuir hakerek na’in nia observasaun ba esbosu Lei Kriminiliza Difamasaun ne’ebé halo husi VIII Governo Konstitusional, liu husi promove Ministériu da Justisa, maibé parese Konsellu Ministru seidauk halo diskusaun. Esbosu Lei Difamasaun ida ne’e besik tinan ida tiha ona hahu husi tinan 2019 liubá iha ne’ebé aprezenta ona ba Primeiru Ministru (PM), Taur Matan Ruak (TMR). (Mídia Diariu Timor-Post, 22 Fevereiru 2019).

Ita hotu hatene katak ita nia liberdade de expressão maka Timor-Leste nia independénsia, no prinsipiu Estadu de direitu no demokratiku, presija hari’i kultura no sistema ida demokratiku ne’ebé povu maka nain ba ukun no ukun ne’e povu nian. Sistema demokratiku ne’e katak estadu tenke iha komprimisu hodi respeita no garante sidadaun sira nia direitus umanus no liberdade fundamental sira ne’ebé końsagra iha instrumentu Internasional oin-oin Direitus Umanus nian no iha konstituisaun rasik. Nasaun demokratiku katak partisipasaun ema hotu nian ne’ebé liberdade fundanłental ida maka liberdade de espresaun, hanoin, opiniaun no imprensa no laiha limitasaun, anaunser iha provokasaun hodi hamosu krime. Lei difamasaun hanesan kazu sivil, nune’e labele kriminaliza hodi hatama ema ida ba prizaun tanba deit ema nia hanoin ka opiniaun ne’ebé ita nia Konstituisaun rasik la fó dalan. Lei kriminaliza difamasaun bele hamihis ka impede demokrasia. Nune’e bele halakon ka hamate kritika sosial husi sosiedade ba kontribuisaun dezenvolvimentu nasaun ida nian.

Nasaun Republika Demokratika Timor-Leste (RDTL) hetan nia ukun rasik-an, liu husi prosesu naruk ne’ebé halao, liu husi asaun oin-oin husi ne’ebé halao husi Frente Armada maka (FALINTIL), Frente Klandestina no Frente Diaspora/Diplomata sira ne’ebé uza sira nia espresaun hodi hakilar ba mundu katak violasaun direitu umanus akontese iha Timor-Leste. Liberdade espresaun maka Timor-Leste nia independénsia ne’ebé konsagra ona iha Konstituisaun da RDTL tinan 2002 katak sidadaun hotu-hotu bele hato’o nia opinião ka hanoin ruma ba ita nia Estado RDTL ka liu husi ba orgasaun soberanu sira iha Timor-Leste. Bele kritika ba Prezidente Republika (PR), Parlamentu Nacional (PN), Governo no Tribunal importante maka kritika ne’e konstrutivu. Ukun nain sira ne’ebé tur iha orgaun soberanu membru Governo, Deputadu/a sira, no membru orgaun soberania sira seluk-seluk tan. Husu labele alergia kritika ruma husi populasaun babain ba ita bo’ot sira, buat ida kritika ka sujestaun ruma husi populasaun ba orgaun soberania kompetente sira dala ruma iha buat diak, laos buat at.

Esplikasaun iha konstituisaun da RDTL klaru los, Artigu 1 kona-bá Repúblika, 1. Repúblika Demokrátika Timór-Leste katak Estadu ida-ne’ebé demokrátiku, soberanu, ukun-an no ida-mesak, harii hosi povu nia hakarak no iha respeitu ba dignidade ema moris idaidak nian. Iha Artigu 16, 1. Sidadaun hotu-hotu hanesan iha lei nia oin, no mós iha direitu no obrigasaun hanesan. 2. Labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál. Artigu 23, Direitu fundamentál sira-ne’ebé konsagra iha Lei-Inan la hasai direitu selu-seluk ne’ebé temi iha lei no tenke interpreta sira tuir Deklarasaun Universál Direitus Umanus nian. Artigu 40, 1. Ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian. 2. Liberdade ko’alia no informasaun ninian labele hetan limitasaun hosi sensura ruma. 3. Lei maka sei regula direitu no liberdade ne’ebé temi-sai iha artigu ida-ne’e, ho baze iha imperativu kona-ba respeitu ba Lei-Inan no respeitu ba ema idaidak nia dignidade. No mos iha Artigu 41, Liberdade Imprensa no komunikasaun sosiál ninian 1. Iha garantia ba liberdade imprensa nian no ba meius seluk tan kona-ba komunikasaun sosiál. 2. Halo parte liberdade imprensa nian, liberdade ko’alia nian no hamoris/hakiak jornalista sira, asesu ba fontes kona-ba informasaun, liberdade editoriál, protesaun ba independénsia no ba segredu profisionál no mós direitu atu halo jornál, publikasaun ninian no meius difuzaun selu-seluk tan. Inklui Artigu 36.

Iha parte seluk, nasaun Timor-Leste iha esperensia pasadu iha tempu rejime Presidente Indonesia nian, Pak, Suharto no tempu Salazar fó ona lisaun bo’ot mai ita. Atu hare ezemplu seluk, ita hare nasaun Sudestu Aziatiku, por ezemplu iha Myanmar, Vietnam, Filipina, Indonesia, Thailandia no nasaun vizinu sira seluk akontese ho esperensia hanesan. Governu utiiza Lei kriminaliza difamasaun hodi rasionaliza sira nia aktus politika, kaer Aktivista, Akademiku no Denfensor Direitus Umanus sira, barak mak hetan tratamentu a’at, torturasaun no tama ba prizaun. Violasaun dieitus umanus akontese ba sira ne’ebe kritika Governu, ho situasaun ida ne’e ema hotu tauk atu kritika no expresa sira nia ideas. Iha situasaun real, Lei-ne’ebe regula asuntu difamasaun, iha nasaun barak ida ne’e tama ona iha parte Lei husi “Kódigu Civil” (Hukum Perdata). Idea ida ne’e mos mai husi esperensia hanesan iha era colonial nian, ezemplu Governu Kolonial sira uluk halo Lei ida ne’ebé kriminaliza sidadaun atu kritika (ne’e akontese iha Lei Difamasaun Kolinial Holanda nian wanhira sei ukun Indonesia). Maibé nasaun sira ne’ebé uluk adopta ida ne’e muda ona ou decriminaliza. Kuandu ema ruma mak sente ofendidu ou nia naran foer, bele lori keixa tuir prosesu Kodigu Civil nian, no karik aplika deit fó multa. Agora Timor-Leste Lei Kódegu Sivil (KS), Kódegu Penál (KP) iha tiha ona no Lei oan sira seluk bele garantia ona ba sidadaun ne’ebé hetan difamasaun bele hato’o keisa ba Ministeriu Publiku (MP) bele prosesu tuir dalan justisa. La presija tan ona halo esbosu Lei foun Kriminaliza Difamasaun nian.

Saida maka lia fuan Difamasaun? Lia fuan difamasaun katak nu’udar hahalok hafoer ema seluk nia naran ka reputasaun ka la iha respeitu ba ema seluk nia naran di’ak no reputasaun (onra objetiva). Difamasaun ne’e nu’udar hahalok ofensivu ne’ebé la halo diretamente ba vítima, maibé halo liu husi ema seluk ka meiu seluk. A difamação é uma forma de comunicação com uma ou mais partes que visa fornecer um estigma negativo para um evento realizado por outra parte, é baseada em fatos falsos que são influenciados pela natureza do respeito, mau pensamento, obsessão ou queda ou aumento do valor da reputação de alguém. ou algo parecido. A palavra “calúnia”. é absorvida do Árabe e o significado original é “provações” ou “provas”. Dehan ho lian Melayu katak Memfitnah ka Fitnah. Fitnah merupakan satu bentuk komunikasi kepada satu pihak atau lebih yang bertujuan untuk memberikan stigma negatif atas sesuatu peristiwa yang dilakukan oleh pihak lain, ia berdasarkan atas fakta palsu yang dipengaruhi oleh sifat penghormatan, buruk sangka, obses, atau menjatuhkan dan/atau menaikkan nilai reputasi seseorang atau sesuatu pihak. Kata “fitnah” diserap dari bahasa Arab, dan pengertian aslinya adalah “cobaan” atau “ujian”.

Ikus liu mak ne’e, hakerek na’in hakarak rekomenda ba VIII Governo Konstitusional diak liu kontinua mantein ho Lei Kódigu Sivil, Lei Kódegu Penál, Lei Kódegu Prosesu Penál, Lei Demonstrasaun, no Lei Komunikasaun Sosial. Se Governo hakarak halo Lei foun kontinua tau matan ba Lei sira ne’ebé importante liu hanesan halo Lei Krime Sibernétika (Cyber Crime), ho Lei Anti Korrupsaun nian. Hakerek na’in mos fó sujestaun ba Parlamentu Nasional (PN) karik Lei Kriminaliza Difamasaun lori ba iha plenaria hodi diskute Lei ida ne’e, diak liu lalika aprova. Ba hau, kria Lei Cyber Crime diak liu, nune’e sidadaun ne’ebé tolok iha mídia facebook, WA, website ema bo’ot ka ema ki’ik ruma sai ba vitima lori Lei Cyber Crime ne’e mak bele prosesu tuir dalan Justisa. Husu mos ba ANC atu kontrola rede telekomunikasaun sira iha Timor-Leste hodi nune’e bele kontrola ID falsu ka uza facebook falsu no publikasaun pornografia. “Mai Ita Hamutuk Aluta Kontinua Dehan Lae ba Lei Kriminaliza Difamasaun”.

 

*Hakerek Na’in: Alumni Universidade da Paz-(UNPAZ), Faculdade de Direito, 2008. Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Iha sujestaun ruma bele haruka iha e-mail: moisesvicente59@yahoo.com

 

 39 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur