Notísia foun

Primeiru Ministru Xanana Gusmao koalia ho Komandante Jeral FDTL Major Lere AnanTimur iha CCD wainhira partisipa Debate publiku hodi esklarese ba povu konaba eksistensia Mauk Moruk ho Kay Rala Xanana Gusmao iha luta ba libertasaun Timor Leste. DIARIO NASIONAL/ANTONIO DASIPARU

Timor Post (12/06/2020) – Hare ba dinamika politika hatun-hasa’e malu entre lider istoriku sira ne’ebe involve iha partidu politiku hamosu mós sentimentu lamentavel no insatisfeitu ba instituisaun defeza F-FDTL ne’ebe maioria okupa husi veteranu luta libertasaun nasional.

Lamentasaun hirak ne’e Chefe do Estado-Maiór General das F-FDTL Major Lere Anan Timur, hamutuk ho F-FDTL espresa liuhosi karta ba lider istóriku hotu-hotu prinsipalmente ba Kay Rala Xanana Gusmão, hodi fó hanoin atu hakotu situasaun refere husik situasaun di’ak ba jerasaun futuru mai.

Maibe, responde ba karta ne’e Lere konsidera Xanana la hatán ba saida maka sira sente tanba ne’e sei buka tempu hasoru direta nu’udar maun hodi ko’alia ba malu.

“Ha’u hanoin katak karta ne’ebé mak ha’u haruka ba la’ós ha’u de’it maibé ha’u em nome forsa defeza timor-leste hanesan ofosiais Jenerais, ofisiais coroneis, ami hato’o la’ós ba maun boot Xanana de’it maibé ba lider nasional sira hotu-hotu. Ami hato’o ami nia preokupasaun ne’ebé ami mós hanesan funda nasaun ida ne’e. Ami la’ós fundador Fretelin ka fundador partidu ka fundador Falintil, maibé nasaun ne’e ami mós fundador”, dehan Lere ho laran kraik bainhira Jornalista konfirma konteudu karta ba Xanana iha Palasiu do Governu Sesta (12/06).

“Ami hare situasaun politika iha rai laran, hosi governu no iha ne’ebé de’it ami sente ladun satisfeitu entaun ami haruka surat ida ne’e ba lider istoriku sira ne’e atu sira bele tetu, sira bele dasin, pelumenus altera situasaun ida ne’e hodi bele halo situasaun di’ak no husik situasaun di’ak ba jerasaun tuir mai”, hatutan veteranu tinan 24 iha Ailaran ne’e.

Maski karta resposta hosi Xanana publika tiha ona Media Sosial, maibé Lere Anan la enkomoda ho ida ne’e, mesmu la responde ba sentimentu sira nian Lere sei esforsu buka tempu hodi kolia direta ho sira nia komandante supremu Luta Libertasaun Nasional ninian.

“Ha’u rona ona karta responde foin ha’u iha reuniaun mak dehan haruka ona ba kuartel jeneral maibé surat ne’e liu fali hosi media bee, ha’u mós hatene ona ha’u nia maun Xanana la responde buat ne’ebé ami hakerek ne’e no la responde tuir ami nia sentimentu. Maibé ida ne’e nu’udar ha’u nia maun ami bele hasoru malu loron ida, ha’u sei buka tempu ba hasoru malu ho ha’u nia maun ami ko’alia didi’ak”, dehan Major Lere Anan Timur.

Molok hakotu Lere fó hanoin katak hari nasaun ne’e ho ran ho isin no fitar sei iha. “ Ita nia isin fitar mak faluk oan ki’ak, ida ne’e mak sentimentu ami hato’o ba ne’e”, konklui.

Jornalista: Jaime Pires

 71 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur