Notísia foun


Timor Post (10/06/2020)—Primeiru Ministru Taur Matan Ruak liuhusi Konsellu Ministru ofisialmente ezonera ona José Luis Guterres no foti fali Arsenio Paixão Bano ba lidera Rejiaun Autónomu Espesial Oekusi Ambeno (RAEOA).

Minsitru Prezidénsia Konsellu Ministru, Fidelis Leita Magalhães informa, konsellu ministru lako’alia kona-ba motivu saida mak ezenora José Luis Guterres maibé tuir de’it desizaun konsellu ministru.

“Ami la ko’alia kona-ba motivu polítiku maibé ami ko’alia de’it kona-ba desizaun konsellu ministru. Nebe, ida ne’e mak ohin desizaun hosi konsellu ministru,” Fidelis hatete ba Jornalista sira hafoin Konsellu Ministru iha loron 10/06/2020.

Jose Luis Guterres simu posse ba lidera RAEOA iha loron 15 Novembru 2019.

Arsenio Bano nu’udar Eis Sekretáru RAEOA iha temu Mari Alkatiri. Iha loron 08/06/2020, Arsenio ba hasoru malu ho Primeiru Ministru Taur Matan Ruak. Hafoin sorumutu, Arsenio  husu ba Oekusi-oan sira atu hakmatek, relasiona ho ikus-ikus ne’e iha raiketan ne’e mosu krítika barak hasoru autoridade atuál lideradu José Luis Guterres liga ho dezenvolvimentu ekonomia.

Arsenio ba Jornalista sira hatete, dezenvolvimentu ekonomia iha RAEOA la fasil, tanba liga ho atake pesti corona (COVID-19) iha mundu tomak no iha mós Timor Leste nia impaktu mós ba Oekusi.

“Ita nia rai, ein jerál hasoru hela COVID, muda situasaun iha mundu tomak. Ne’e atu hatete katak ekonomia mós la’o la fasil, trasportes, komunikasoens, ba Oekusi izolamentu ne’e aumenta, mas inisiativu husi governu sentral atu halo estabilizasaun ekonómika,” Arsenio ba Jornalista sira hafoin hasoru malu ho Primeiru Ministru.

Iha sorumutu ne’e, Arsenio la ko’alia detallu maibé dehan, nia simu orientasaun husi Primeiru Ministru no rona mós liafuan murak barak kona-ba dezenvolvimentu nasionál espesialmente iha RAEOA.

“Ha’u só dehan de’it ba maluk Oekusi oan sira para kalma, la presiza hirus malu, dún malu. Husik ba Primeiru Ministru ho nia gabinete atu haree assuntu ne’e,” Arsenio subliña.

Nia dehan, importante liu maka Oekusi tenke ba oin. Nia la preokupa ho araju polítiku sira ne’ebé la’o iha rai laran.

Hatan ba Jornalista sira kona-ba karik Primeiru Ministru bolu fali nia atu lidera RAEOA, Arsenio dehan, nia nu’udar Oekusi oan no iha esperiensia di’ak atu lidera rai ketan ne’e. Tanba ne’e, nia afirma, prontu atu serví bainhira nasaun presiza.

Jornalista: Jaime Pires

 65 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur