Notísia foun


DILI— Situasaun atuál iha Uma Fukun Parlamentu Nasionál hafoin bankada FRETILIN, PLP ho KHUNTO halo destituisaun ba Prezidente Parlamentu Nasionál sesante Arão Noe hodi hili fali Aniceto Guterres ba assume pasta ne’e maske konsideradu illegal no asaltu poder, maibé reestruturasaun kontinua la’o no akontese ona iha komisaun parlamentar sira.

Iha loron Kuarta (03/06/2020), maioria komisaun parlamentar menus komisaun B ho C halo ona reestruturasaun hodi troka hotu prezidente, vise no sekretáriu komisaun ne’ebé durante ne’e okupa husi deputadu husi bankada CNRT.

Prezidente Sesante Komisaun F ne’ebé trata ba assuntu Saúde, Seguransa Sosial no Igualdade Jéneru, Maria Gorumali Barreto subliña, nia parte konsidera asaun ne’e kontinuasaun husi hahalok asaltu poder husi inísiu destituisaun ba Prezidente Parlamentu Nasionál sesante Arão Noe.

Nia hatete, mudansa ba pozisaun normalmente akontese iha nasaun demokrátiku sira inklui Timor Leste maibé tenke tuir konstituisaun, lei no regulamentu sira ne’ebé vigor.

“Asaltu poder ida ne’e primeira-vez akontese iha Timor Leste iha era Ukun Rasik An iha lejislatura dalima ida ne’e. Hakarak ka lakohi asaltu poder iha Parlamentu Nasionál tama ona istória a’at tebes iha Nasaun Direitu Demokrátika. Saida mak ita husik ba jerasaun foun mak SE MAK IHA FORSA nia bele halo asaltu poder hodi kaer ukun,” Deputada CNRT ne’e hatete.

Maske nune’e, Deputada Maria salienta, tanba kna’ar komisaun parlamentar sira mais tékniku no la’ós polítiku maka, maske deputadu husi Bankada CNRT troka hotu husi pozisaun la signifika la koopera.

“Ami nia prezensa hanesan Bankada Opozisaun, embora komisoens sira ne’e funsiona muito mais tékniku duke polítiku, ami sei kontribui embora la lidera mesa da komisoens,” Deputada Maria subliña.

Iha oportuniade, Deputada Maria haktuir, servisu ne’ebé Komisaun F halo durante ne’e mak elabora Projeitu Lei Protesaun Labarik iha Timor-Leste, Diskusaun ba Asuntu Malnutrisaun ba Feto no Labarik, Diskusaun ba Konvensaun ba ema ho defisiénsia hodi rekomenda ba Governu konsidera iha polítika hodi hetan ratifikasaun iha Parlamentu Nasionál, no atividade regular ne’ebé hatúr ona iha artigu 35 Rejimentu Parlamentu Nasionál kona-ba kompeténsia servisu komisoens sira nian.

Entretantu Deputada Maria Barreto iha entrevista subliña, mudansa ba nia pozisaun iha Komisaun F nia konsidera hanesan prezenti ida ba nia tanba monu kedas iha loron selebrasaun aniversáriu ninian.

“Ha’u konsidera hanesan presenti ida mai ha’u iha ha’u nia aniversáriu loron ohin (03/06/2020) i lori ha’u sai maduru liu tan iha vida polítika,” Deputada Maria subliña.

To’o notísia ne’e públika Timor Post seidauk hetan konfirmasaun kona-ba estrutura foun ba komisaun sira ne’ebé halo ona reestruturasaun.

Tuir mai Estrutura Komisaun Parlamentar tuan;

Komisaun A: Prezidente Deputada Carmelita Caetano Moniz (CNRT), Vise Deputadu Francisco de Vasconcelhos (PLP), Sekretáriu Deputadu Oscar da Silva (CNRT)

Komisaun B: Prezidente Deputadu Adérito Hugo da Costa (CNRT), Vise Deputadu Cornélio Gama L-7 (PLP), Sekretáriu Leandro Lobato (CNRT).

Komisaun C: Prezidente Deputada Fernanda Lay (CNRT), Vise Deputada Rosa Ximenes (PLP), Sekretáriu António Nobre (KHUNTO).

Komisaun D: Prezidente Deputada Virginia Ana Belo (CNRT), Vise Deputadu Ricardo Baptista (CNRT) no Sekretária Olinda Guterres (KHUNTO)

Komisaun E: Prezidente Abel Pires (PLP), Vise Deputadu Marcos Xavier (CNRT) no Sekretária Deputada Anabela Savio (FRETILIN).

Komisaun F:  Prezidente Deputada Maria Gorumali Barreto (CNRT), Vise Deputadu Noe Marçal (PLP) no Sekretária Deputada Lusia Taeki (CNRT).

Komisaun G: Deputadu Sabino Guntur (PLP) nu’udar Vise Prezidente no Prezidente Interinu substitui Deputada Saudoza Albina Marçal (CNRT), no Sekretáriu Deputadu Gabriel (CNRT).

(cao)

 61 total views,  2 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur