Notísia foun


DILI—Bankada FRETILIN, PLP ho KHUNTO hafoin domina iha kompozisaun meza Parlamentu Nasionál, planu husi bankada tolu ne’e nu’udar Aliansa Maioria Parlamentar (AMP) ne’ebé hahoris liuhusi plataforma entendimentu, kontinua ba halo mudansa estrutura iha komisaun espesializada sira iha órgaun estadu daruak ne’e.

Timor Post seidauk hetan konfirmasaun kona-ba rajaun atu halo mudansa estrutura iha komisaun parlamentar, maibé fonte kredivel haktuir, FRETILIN, PLP ho KHUNTO hakarak halo mudansa tanba atualmente domina husi bankada CNRT.

Tuir mai Estrutura Komisaun Parlamentar;

Komisaun A: Prezidente Deputada Carmelita Caetano Moniz (CNRT), Vise Deputadu Francisco de Vasconcelhos (PLP), Sekretáriu Deputadu Oscar da Silva (CNRT)

Komisaun B: Prezidente Deputadu Adérito Hugo da Costa (CNRT), Vise Deputadu Cornélio Gama L-7 (PLP), Sekretáriu Leandro Lobato (CNRT).

Komisaun C: Prezidente Deputada Fernanda Lay (CNRT), Vise Deputada Rosa Ximenes (PLP), Sekretáriu António Nobre (KHUNTO).

Komisaun D: Prezidente Deputada Virginia Ana Belo (CNRT), Vise Deputadu Ricardo Baptista (CNRT) no Sekretária Olinda Guterres (KHUNTO)

Komisaun E: Prezidente Abel Pires (PLP), Vise Deputadu Marcos Xavier (CNRT) no Sekretária Deputada Anabela Savio (FRETILIN).

Komisaun F:  Prezidente Deputada Maria Gorumali Barreto (CNRT), Vise Deputadu Noe Marçal (PLP) no Sekretária Deputada Lusia Taeki (CNRT).

Komisaun G: Deputadu Sabino Guntur (PLP) nu’udar Vise Prezidente no Prezidente Interinu substitui Deputada Saudoza Albina Marçal (CNRT), no Sekretáriu Deputadu Gabriel (CNRT).

Entretantu hafoin destitui Prezidente Parlamentu Nasionál sesante Arão Noe, liuhusi aprovasaun ba pedidu destituisaun husi deputadu sira husi Bankada FRETILIN, PLP ho KHUNTO destitui tan Sekretária Meza Maria Terezinha husi CNRT ho Vise Sekretária Meza Isabel Ximenes husi bankada Frenti Mudansa (FM).

Nune’e, iha loron hanesan Parlamentu Nasionál hili hikas Lídia Norberta husi FRETILIN ho António Nobre Amaral Tilman husi KHUNTO ba okupa fali kargu refere.

Votasaun sekretu ba destituisaun sekretária meza no hili hikas kandidatu úniku sein prezensa husi deputadu sira husi CNRT.

Rejultadu votasaun ba destituisaun, a favor 39, kontra 0, abstensaun 3. No votasaun ba kandidatu foun, a favor 41, kontra 0 no abstensaun 1.

Hafoin votasaun, Prezidente Parlamentu Nasionál Aniceto Guterres konvida kedas deputada Lídia Norberta ho António Nobre ba hola kedas pozisaun iha meza Parlamentu Nasionál.

Aniceto hatete, nia parte sei informa kedas ba Prezidente Repúblika Francisco Guterres Lú Olo no Primeiru Ministru Taur Matan Ruak.

Entretantu kompozisaun meza Parlamentu Nasionál atual kompostu hosi Prezidente Parlamentu Nasionál, Aniceto Guterres (FRETILIN), Vise-Prezidente Parlamentu Nasionál, Maria Angelina Sarmento Lopes (PLP), Vise-Prezidente Parlamentu Nasionál Daruak, Luis Roberto KHUNTO, Sekretáriu Meza Lídia Norberta (FRETILIN) no Vise-Sekretáriu, António Nobre Tilman (KHUNTO) no Vise-Sekretária Meza Daruak Regina Freitas (PLP).

Antes ne’e, iha loron 18-19/05/2020, mosu tensaun maka’as iha uma fukun Parlamentu Nasionál kona-ba hadau malu kadeira meza destituisaun ba Prezidente Parlamentu Nasionál sesante Arão Noe husi CNRT.

Iha momentu ne’eba plenária hala’o ka diriji husi Vise Prezidente Parlamentu Nasionál Maria Angelina ho Lúis Roberto iha situasaun ne’ebé rungu-ranga tanba deputadu sira husi CNRT konsidera sesaun plenária ne’ebé hala’o ilegál tanba viola rejimentu Parlamentu Nasionál ne’ebé hateten kona-ba delegasaun kompeténsia husi Prezidente Parlamentu Nasionál ba Vise sira.

Maske nune’e, vise prezidente na’in rua kontinua organiza plenaria no konsege distitui Arão Noe no hili hikas Aniceto Guterres ba Prezidente Parlamentu Nasionál.

Governu dahitu forma husi CNRT, PLP ho KHUNTO, maibé situasaun polítika hahú la estavel bainhira Prezidente Rep’ublika Francisco Guterres Lú Olo lakohi fó posse ba membru governu sira maioria husi CNRT. Situasaun ne’e kontinua la’o to’o iha loron 17/01/2020, Parlamentu Nasionál la konsege aprova Orsamentu Jerál Estadu (OJE) ba tinan 2020 nian.

No ikus mai CNRT, PLP ho KHUNTO fahe malu. No FRETILIN ba hamutuk fali ho PLP ho KHUNTO hodi viabiliza governu daualu. No Prezidente Repúblika fó pose ona ba membru governu foun maioria husi FRETILIN hodi troka membru CNRT sira. (cao)

 31 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur