Notísia foun


DILI—Bankada CNRT ho nia aliadu sira UDT/FM ho PUDD kontinua konsidera Prezidente Parlamentu Nasionál (PPN) Aniceto Guterres ilegál bainhira desizaun Tribunál Rekursu seidauk fó sai rejultadu ba keixa ne’ebé sira hatama kona-ba aktu hotu-hotu ne’ebé FRETILIN, PLP no KHUNTO halo hodi hadau meza Parlamentu Nasional.

Liuhusi konferénsia ba imprensa ne’ebé hala’o iha loron 27/05/2020, iha sala Bankada CNRT, CNRT ho nia aliadu sira affirma, bainhira seidauk iha desizaun ne’ebé justu, deputadu CNRT ho nia-aliadu sira sei la tuir atividade hotu-hotu ne’ebé prezide no organiza hosi PPN Aniceto Guterres.

Komunikadu ba imprensa ne’ebé distribui ba Jornalista sira subliña, Presidente Parlamentu Nasional sesante Arão Noe hetan asaltu hosi deputadu sira Bankada FRETILIN, no hetan apoiu hosi deputadu sira Bancada PLP no KHUNTO para viabiliza VIII Governu ne’ebé mak monu ona.

“Sira konsientemente uza Estadu Emerjénsia (EE) Covid-19 hodi halo manobras polítika oioin, inklui ohin mai husu tán renovasaun EE ba dala-rua hodi extende EE ba fulan-tolu. Intensaun klaru, ho enxtensaun EE ida-ne’e, sira hakarak atu hametin sira-nia Poder ne’ebé hetan hosi dalan illegal no inkonstitusional,” subliña iha komunikadu.

Asaltu poder ida-ne’e viola Konstituisaun RDTL, Lei no Rejimentu Parlamentu Nasional.

“Ami hein hela tribunal atu pronúnsia aktu sira ne’e ho lalais no justu,” hatutan iha komunikadu.

Bancada CNRT ho nia-aliadu sira la partisipa iha plenária PN maibé manifesta nia pozisaun relasaun ho estensaun EE mak hanesan tuir mai ne’e:

  1. Covid-19 pandemia importadu, laiha transmisaun local. Desizaun taka fronteira, aeroporto no porto hatudu ona redusaun kazu suspeitu Covid-19 loron-loron. Timor-Leste halo ona esforsu hotu-hotu, lokalizasaun suspeitu iha kuarentena no izolamentu. Tanba-ne’e, iha loron 02 fulan-abril Parlamentu Nasional aprova fundo propriu $150 milhões de dolares ba polítika prevensaun hodi sulan Povu tomak iha deit uma, halo “lockdown” ba territóriu tomak, objetivu mak pandemia ne’e labele daet ba ema seluk, labele daet ba família no komunidade sira.
  2. Bainhira Presidente-da-República propoin primeira estensaun ba EE, ami vota kontra ho razaun katak, la presiza extende EE maibe promove deit lei ida hodi taka deit fronteiras no halo restrisaun limitadu ba movimentu populasaun atu nune’e labele lori konsekuensias negativu barak ba povu.

Efeitus negativu hosi lockdown, Povu barak hamlaha, hein atu Governu buka resolve maske Governu loron-loron mai ho promesa mamuk $100 dolares, ohin EE atu tama tán ona iha terceiro-período, tama ba fulan-tolu sem prezensa Estadu iha Povu nia leet, Povu falta hahan, joven barak lakon nia servisu nune’e mós setór negosiu informal barak mak taka. Povu tomak hatene, levatamentu Fundo Petrolíferu ho urjénsia tuir pedidu Governu mai iha Parlamentu Nasionál, ami halo ona ami-nia dever, maibé fulan-rua ona, Governu la halo pagamentu ba Povu. Sé laiha regras, signifika Governu mai husu osan iha PN sem Planu. Tanba-ne’e mak to’o ohin loron Governu seidauk bele ezekuta. Ami hare’e katak, Governu mai beibeik ho mudansa númeru uma-kain. Ida ne’e hatudu momoos katak, Governu ida-ne’e laiha duni kapasidade atu resolve Povu nia moris. Nune’e mós, akizasaun ekipamentus ne’ebé Governu halo liu hosi UNDP ho montante osan hamutuk $5 milhões de dolares lao tarde liu, to’o ohin loron seidauk to’o mai maske Governu selu hotu ona. Ita hatene katak, pandemia Covid-19 reduz ba beibeik no agora dadauk laiha pasiente Covid-19. Ida-ne’e hatudu katak, ekipamentus ne’ebé Governu sosa ho osan bót ne’e, “karik” sei to’o iha Timor-Leste, depois rai deit ona iha armajen tanba la uza.

  1. Sé mak hetan benefísiu bót hosi estensaun EE ida-ne’e? Ami hare’e momoos katak, camada social kiik mak hetan aproveitamentu bót. Enkuantu iha sorin seluk, camada social bót, Povu maioria falta aihan. Bancada CNRT ho nia aliadu-sira lamenta tebes ho estensaun Estado de Emergência tanba Povu kiik lakon servisu, tanis no hamlaha, moris terus no hein laran luak hosi maluk sira seluk nia karidade.
  2. Implementasaun EE daruak la’o la tuir ona regras EE nian, ne’e tanba, polítiku sira duni mak lakohi atu kumpri. Polítiku sira uza EE hodi sukit malu no asalta poder. Situasaun ida-ne’e preokupante, ami deskobre katak, EE sai núdar meius deit ba Governu ne’ebé forma hosi aliadu illegal sira hodi buka hadau no atinzi sira-nia interese polítiku ba Poder.
  3. Bancada Fretilin hamutuk ho PLP no KHUNTO, aproveita EE halo asaltu poder no harahun koligasaun ne’ebé halo ona esforsu formal hotu-hotu tuir orientasaun Presidente-da-Repúblika nian. Maske ikus mai Presidente Lú Olo fó deit resposta ba Grupu Golpista sira hodi decreta Orgânica Governo foun iha ámbitu VIII Governu nian. Loloos VIII Governu monu tiha ona. Agora Governu foun tenke hanaran IX Governu no partidos koligasaun foun ba Governu foun ne’e tenke halo konferénsia hodi aprova forma koligasaun foun ba IX Governu.
  4. Violasaun grave no klara hasoru Constituição da RDTL, ita-hotu sempre rona Presidente Lú Olo dehan, “ema hotu-hotu tenke kumpri Konstituisaun no Lei sira”, maibé nia rasik la kumpri nia juramentu, inklui nia partidu rasik organiza asalta poder iha Parlamentu Nasional.

CNRT ho aliadu sira konsidera EE sai deit instrumentu polítiku hodi hametin ganância ba Poder, tanba-ne’e mak Bancada CNRT ho nia aliadu sira la partisipa iha plenária ne’ebé prezide hosi PPN illegal ba estensaun EE ba datoluk. Ami kontinua enkoraja Povu tomak atu kuidadu saúde; fase liman beibeik no kumpri distánsia sosial tuir orientasaun saúde públiku nian.

Núdar preokupasaun Bancada CNRT ho nia-aliadu sira; ami husu atu Governu labele toman ho promesa ba Povu hodi hein deit subsídiu $100 dolares, husik munisípiu sira ne’ebé livre husi Covid-19 kontinua halo produsaun, halo tós no natar hodi bele sustenta família no buka moris. Governu bele halo medidas exepsionais ba fatin balun hodi implementa EE, por ezemplu Covalima, Bobonaro, RAEOA no Díli bele kontinua ho medidas emergência to’o mundu livre hosi vírus corona.

Ami hatene, iha dalan atu implementa deit “medidas emerjénsia” ho sirkunstánsias exepsionais tanba Covid-19 núdar pandemia importadu, desizaun taka fronteira, aeroporto no porto hatudu ona redusaun kazu suspeitu Covid-19 hosi loron-loron. Timor-Leste halo ona esforsu hotu-hotu, hanesan kuarantena obrigatório ba ema sira ne’ebé fila hosi áreas afetados Covid-19, halo teste ba ema-sira ne’ebé iha sintomas Covid-19 no mós sira ne’ebé iha kuarantena, ba sira ne’ebé pozitivu tau sira iha izolamentu hodi trata atu rekupera lalais. Graças a Deus to’o loron 15 fulan-Maiu 2020, sira ne’ebé pozitivu rekupera hotu ona no oras ne’e Timor-Leste laiha ema ida ne’ebé pozitivu ba Covid-19. Tanba ne’e maka Bancada CNRT ho nia aliadu sira aproveita oportunidade ida ne’e atu agradese ba Professionais saúde sira ne’ebé servisu maka’as hodi deteta, buka tuir no trata ita nia maluk Timor-oan sira ne’ebé Pozitivu Covid-19. Ami mós hakarak agradese ba Povu tomak no sira ne’ebé servisu hodi luta hasoru Covid-19. Ita bót sira-nia esforsu no servisu maka’as ajuda tebes Timor-Leste hodi evita moras ne’e daet iha komunidade no liu-liu la lori mate ba komunidade. Governu bele halo deit kuarentena ba sira ne’ebé mai husi rai liur tuir fasilidade kuarentena ne’ebé Governu prepara tiha ona, atu nune’e Covid-19 labele daet ba ita-nia komunidade. Actividades ekonomia setor informal husik la’o (lojas, merkadu no negosiante ambulante), produsaun Agricola no transporte públiku tenke funsiona atu estimula roda ekonomia Timor-oan nian.

Tanba ne’e, CNRT ho nia aliadu sira afirma, laiha razaun atu fundamenta extende Estadu Emerjénsia, ita bele halo deit medidas emerjénsia atu prevene transmisaun Covid-19 ba ita-nia komunidade sira.

Komunikadu ba imprensa ne’e asina husi Duarte Nunes, Prezidente Bankkada CNRT ho Francisco David Xavier Carlos, Prezidente Bankada UDT/FM.

Maske nune’e, antes ne’e Sekretáriu Estadu Komunikasaun Sosiál (SEKOMS), Merício Akara subliña, só estadu emerjénsia maka fó biban ba estadu atu limita sidadaun sira nia direitu iha luta kontra atake pesti corona (COVID-19).

iha funu mundiál ida ne’e, ba Timor Leste, Akara hatete, governu tetu tiha ona husu ba Prezidente Repúblika Francisco Guterres Lú Olo atu husu autorizasaun ba Parlamentu Nasionál atu deklara tan estadu emerjénsia ba fulan ida tan.

Estadu emerjénsia sei konsentra maka’as iha fronteira sira, segundu maka kuarentina obrigatóriu tenke mantein. Mínimu objetivu rua ne’e ita bele implementa bainhira estadu emerjénsia bele la’o tan. Tanba ita labele limita ema nia direitu ho lei baibain, liuliu ita atu bandu ema tama sai,” Akara subliña iha nia intervensaun iha plenária Parlamentu Nasionál, Tersa (26/05/2020), bainhira partisipa iha debate ba apresiasaun Lei Antí Korrupsaun.

Akara dehan, hatudu tiha ona iha fulan rua liu ba bainhira Timor Leste aplika estadu emerjénsia konsege fo biban di’ak tebes ba estadu liuliu governu atu halo atuasaun sira ba kontra virus ida ne’e no halo preparasaun sira liuliu prepara aimoruk.

“Ita laiha ona kazu maibé virus ne’e sei iha. Organizasaun Mundiál Saúde (OMS) dehan virus ne’e sei iha fatin-fatin. No iha posibilidade atu ataka fali ita (Timor Leste) sei maka’as tanba aimoruk ba ida ne’e mós seidauk iha,” Akara hatete.

Nia hatutan, realidade agora maka nasaun viziñu Indonézia mós virus ne’e sei ataka maka’as loos inklui iha área sira fronteira terrestre ho Timor Leste.

“Estadu emerjénsia ne’ebé agora ita propoen nia regra sei la maka’as hanesan fulan rua liu ba. Ita sei konsentra maka’as ba iha taka fronteira terrestre, tasi no lalehan. Tanba ita hatene katak virus ne’e mai importadu,” Akara rekoñese.

Entretantu Timor Leste konsege rejista kazu pozetivu ba COVID-19 hamutuk ema na’in 24, maibé rekoperadu iha semana hirak liu ba.

Atualizasaun dadus mundial, iha loron 26/05/2020 haktuir, infetadu hamutuk 5,588,020, mate hamutuk 347,872 no rekoperadu hamutuk 2,365,703. (cao)

Please follow and like us:

NOTÍSIA FOUN

Site Statistics

  • Users online: 7 
  • Visitors today : 1,170
  • Page views today : 1,672
  • Total visitors : 80,422
  • Total page view: 112,753

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur