Notísia foun


DILI—Prezidente Repúblika, Francisco Guterres Lú Olo, Tersa (26/05/2020), hafoin rona hanoin ne’ebé favoravel ba pedidu Governu husi Konsellu Superior Defeza no Seguransa (KSDS) no Konsellu Estadu haruka mensajen ba Parlamentu Nasionál husu autorizasaun ba estensaun estadu emerjénsia.

Mensajen datoluk husi Prezidente Repúblika husu autorizasaun Parlamentu Nasionál ba estensaun estadu emerjénsia ba  periodu foun durante loron-30, sei hahú husi kinta feira, oras 00, 28 maiu to’o sexta feira, oras 00, 27 juñu 2020.

Implementasaun estadu emerjénsia ba loron-30 ba oin sei suspende parsialmente direitu no garantia balun hanesan sirkulasaun internasionál, liberdade ba sirkulasaun no fixasaun  rezidénsia iha pontu ne’ebé de’it iha territóriu nasionál no direitu ba rezisténsia.

Timor-Leste rasik deklara tiha ona laiha kazu konfirmadu ho COVID-19 tanba  ema na’in-24 hotu-hotu rekuperadu no la hamate ema ida, maibé,  ne’e la signifika Timor-Leste livre ona husi COVID-19. Iha mensajen ba Parlamentu Nasionál, Prezidente Repúblika hateten:

“Ha’u-nia konviksaun katak impozisaun ba manuntesaun medida konjuntu importante atu prevene virus SARS-CoV-2 tama ba ita-nia territóriu no ninia transmisaun entre populasaun ne’ebé moris hamutuk, hanesan bandu ema tama territóriu nasionál, impoin izolamentu obrigatóriu ba kazu determinadu sira no sujeisaun obrigatóriu ba rezidente iha Timor-Leste tuir medidas kontrolu sanitáriu.”

Prezidente Repúblika fó hanoin hikas ba Deputada no Deputadu sira katak nesesidade ba estensaun estadu emerjénsia iha ligasaun forte ho evolusaun preokupante ba situasaun epidemilojójika no proliferasaun kazu rejistradu transmisaun komunitária COVID-19 iha Repúblika Indonézia, partikularmente iha Timor Osidentál, ne’ebé ezjije nafatin manuntensaun ba aplikasaun sasukat estraordináriu balu, ne’ebé ladun makaas, atu trava pandemia, evita transmisaun kazu foun ba infesaun coronavirus foun iha territóriu nasionál.

Governu hatama pedidu estensaun estadu emerjénsia horseik, 25 maiu, bazeia ba realidade katak kazu pozitivu COVID-19 globalmente aumenta. Maske kazu barak rekuperadu iha nivel mundiál maibé COVID-19 sei kontinua alastra husi ema ba ema iha fatin ida ba fatin seluk. Organizasaun Saúde Mundiál rasik fó-sai katak seidauk hatene bainhira mak rohan husi pandemia ne’e.

Timor-Leste deklara kazu pozitivu ida ho COVID-19 iha loron 21 marsu 2020, ho Estadu nia naran, iha 27 marsu 2020 Prezidente Repúblika deklara estadu emerjénsia ba fulan ida. Prezidente Repúblika estende estadu emerjénsia ba loron-30 tan, husi 28 abril to’o 27 maiu 2020.

Estadu implementa estadu emerjénsia ho objetivu atu hases sidadaun hotu-hotu iha Timor-Leste husi kalamidade públika ne’ebé bele mosu husi COVID-19.

Parlamentu Nasionál sei diskute mensajen Prezidente Repúblika hodi aprova no ka lae mensajen Prezidente Repúblika. Prezidente Repúblika sei deklara estadu emerjénsia ba periodu foun bainhira hetan autorizasaun husi Parlamentu Nasionál. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,082
  • Page views today : 1,295
  • Total visitors : 37,970
  • Total page view: 52,299

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur