Notísia foun


Aniceto Guro-Berteni Neves

(Traballador Fakuldade Siensia Sosial – UNTL)

Iha loron 24 fulan-Maiu 2020, Ha’u nia belun-diak  Amo e Dosente Filozofia Politika Martinho Gusmao’ publika-tan parte-II hosi nia artigu sobre Patriotismo Constitucional ((Jürgen Habermas dehan Verfassungspatriotismus). Iha edisaun daruak ne’e, ha’u hakarak kontinua fo ha’u nia hanoin-lisuk. Iha edisaun ida ne’e, ha’u evita atu uza sitasaun artigu sira Konstituisaun RDTL, tanba asuntu ne’ebe belun-diak kestiona ne’e iha faze prosesu ‘by means’ (method, process), maibe ha’u uza ‘goals/objective nudar baze ba ha’u nia argumentu. Tanba belun-diak kestiona nia prosesu, maibe ha’u aprofunda deit rezultadu.

  1. Partidu Politiku iha Parlamentu Nasional no Prezidente Republika

Iha inisiu artigu daruak ne’e, belun-diak kontinua aprezenta pontu kritiku ba funsionamentu partidu politiku sira asentu iha Parlamentu Nasional no kestiona papel Prezidente Republika iha realizasaun ninia kompetensia rasik nudar orgaun soberania unipesoal. Ha’u nia belun-diak kestiona kompetensia Prezidente Republika-nian veta dahuluk ba OJE-2019, maibe realidade nia konfirma katak maske primeiru PR veta OJE-2019 maibe depois ida ne’e realmente PR aprova OJE-2019 hodi garantia funsionamentu regular VIII Governu Konstitusional. PR la hakoi VIII Governu Konstitusional, realiza ninia kompetensia rasik tuir Konstituisaun RDTL. PR rezeita pedidu demisaun Primeiru Ministru Taur Matan Ruak nian to’o Primeiru Ministru retira fali deit. Konstituisaun RDTL koalia konaba PR simu pedidu demisaun, la koalia konaba hatama pedidu demisaun automatikamente distinu VIII Governu Konstituisaun ne’e monu.

Se ha’u tradus belun-diak nia pontu kritika hirak ne’e ho forma perguntas karik, mais ou menus hanesan ne’e: Seraque dezisaun PR nia aprova OJE-2019 ne’e kontra KRDTL? Seraque PR la simu pedidu demisaun Primeiru Ministru Taur Matan Ruak nian ne’e kontra Konstituisaun RDTL? Iha Liberdade ema idaidak-nian ba halo interpretasaun, maibe ba ha’u atu justfika aktu PR nian ne’e validu ou lae ne’e kave ba kompetensia orgaun judisiariu Tribunal Rekursu. Independentemente, ha’u nia opiniaun ne’e justifika deit realidade VIII Governu Konstitusional la monu. P-CNRT nia dezisaun vota abstensaun hodi kondisiona OJE-2020 sumbadu, loke dalan ba komprimisiu Partidu FRETILIN nian atu viabiliza VIII Governu Konstitusional ne’e ho baze iha ispiritu Bem Common nudar subject ida hosi subject seluk iha Constitucional Patriotism Habermas nian.

Ha’u la konvensidu ho belun-diak nian hanoin konaba razaun PR aprova fali OJE-2019 tanba AMP (CNRT-PLP-KHUNTO) hakarak mobiliza ema sunu-motuk Dili. Se iha duni razaun konstitusional atu veta ba dalarua mak PR sei la foti dezisaun hodi aprova OJE-2019. PR laos delek, PR sei la foti dezisaun bazeia ba informasaun ho karakter boatus, la lojiku, labele prova ka buat bosok-ida. Se PR la aseita fo posse ba kandidatu nain 7 hosi P-CNRT deit mos PR kontinua reziste, sataan mak ho deit boatus ida. Tuir ha’u, PR iha konxientemente no iha konesementu konaba lójika materiál verdade: adaequatio rei et intellectus (Seyyed Hossein Nasr, 1979) hodi deside aprova OJE-2019.

Hanesan ha’u hatete ona iha hanoin-lisuk (I) nian, P-CNRT hatama petisaun dahuluk ba Tribunal Rekursu atu fiskaliza seraque aktu politiku hirak ne’ebe PR hola ne’e kontra Konstituisaun ou lae? Iha petisaun dahuluk-nian, Tribunal Rekursu rezeita iha deit faze prosesual, seidauk tama to’o substansia materia. Tribunal Rekursu mos hasai ona akordaun ida konaba delejitimidade AMP-2020 (CNRT-PD-UDR-FM no PUDD + KHUNTO). Finalmente, P-CNRT desididu sai partidu opozisaun iha Parlamentu Nasional. Partidu kiik seluk UDT-FM, PUDD silensiu absoluta. PD maioria afavor ba VIII Governu Konstitusional.

Ha’u kontinua kaer ba konseitu Bem Commun nudar lojika materia verdade PR nian foti dezisaun aprova OJE-2019. Bem Common katak moris-diak povu-nian, laos halo ezersisiu se mak forsa-liu hosi ida seluk. PR laos delek, nia iha konseitu, iha rasik ninia prepozisaun no argumentu lojika material verdade (adaequatio rei et intellectus). P-CNRT nia prepozisaun diskorda ba aktu politiku PR nian justifikadu liuhosi akordaun sira hosi Tribunal Rekursu. Ida ne’e mak natureza hosi funsionamentu regular orgaun sira demokratiku nian (kultural demokrasia).

Ita koalia konaba kultura demokrasia refere ba konxiensia sidadaun no kamada politiku sira nian povu no Estadu, konxientimente ba konsekwensia ka risku hosi aktu no dezisaun politiku ba vida povu no nasaun-nian, iha toleransia ba liberade expresaun no diferensia opiniaun, konsistente ba interese komun/interese nasional, prioritiza servisu ekipa no hametin koezaun sosial, mantein unidade, asegura valor sira demokratiku, la abuzu poder, nsst.

PR hatene diak tebes ‘How to Know What We know’. To’o agora, PR hatene diak tebes resposta ba perguntas hosi Ernst Friedrich Schumacher (1977): What enables man to know anything at all about the world around him?  Iha kazu politika atual, PR demonstra ninia meritu no kompetensia katak “Nothing can be known without there being an appropriate “instrument” in the makeup of the knower. This is the Great Truth of “adaequatio” (adequateness), which defines knowledge as adaequatio rei et intellectus — the understanding of the knower must be adequate to the thing to be known”. Ida ne’e mak Habermas koalia iha demokrasia deliberative: povu nia votus hili PR nudar prosidementu ba Prezidente Republika nia orgaun soberania ida mesak.

  1. Destuitisaun meza PPN: hadau poder/golpista no laos Patriota;

Iha pontu daruak nian “… estabelecer as regras essenciais da DEMOCRACIA PLURALISTA…”, Ha’u nia belun-diak Amo e Dosente Filozofia Politika Martinho Gusmão aprezenta konseitu hadau poder nudar aktu golpista, laos patriota, nia aprezenta prepozisaun no argumentu rasik ba ida ne’e.

Ha’u lian ida ho belun diak nia narrativu badak ida sita dehan liuhosi conceito “democracia pluralista”, CRDTL hatur katak ema hotu fo hanoin ba malu, loke fuan ba malu, loke néon ba malu hodi tesi-lia hamutuk. Se ha’u la sala le ka rona, liga ho kazu destituisaun meza PPN ne’e, sira lori semana rua ou tolu atu hetan consensus konaba agenda. Parte-rua (Arao Noe hosi P-CNRT no rekerenti hosi Partidu FRETILIN – PLP – Partidu KHUNTO, idaidak iha razaun por regras Konstituisaun no Rejimentu Interna Parlamentu Nasional nian. Finalmente, iha loron 19 fulan-Maiu 2020, meza PPN destituidu.

P-CNRT nia konseitu ka argumentu ba destiuisaun ne’e mak hadau poder ka asaltu poder. Ha’u nia belun-diak mos sita konseitu ne’e, aumenta-tan ho aktu golpista. Atu justifika argumentu ne’e, Arao Noe halo keisa ba Tribunal Rekursu iha kapasidade nudar Prezidente Parlamentu Nasional (PPN). Hataan ba keixa ne’e, Tribunal Rekursu hasai akordaun ida katak hare’e ba oras hato’o keixa ne’e, Arao Noe laos ona nudar PPN. Maske P-CNRT nia reazen dehan la fiar ona Lei, maibe ha’u pesoalmente laiha autoridade atu hatete Juiz sira iha Tribunal Rekursu ne’e tomar partido. Tanba juiz sira ne’ebe tesi-lia ne’e, ho ha’u nia fiar rasik ba prinsipiu universal bolu ‘Ius Curia Novit/Curia Novit Jus’. Maske prinsipiu ida ne’e hanesan teoria ka Suposição deit, maibe adoptadu iha pratika sistema legal unversal. Ho prinsipiu ka Suposição ida ne’e mos mak fo kbit ba juize sira tesi-lia hodi konfirma prinsipiu ubi societas ibi ius’ no equality before the law’.

Ha’u mos diferente ho prepozisaun ne’ebe belun-diak uza hodi prova nia argumentu konaba “… estabelecer as regras essenciais da DEMOCRACIA PLURALISTATribunal de Recurso aceita ona resultado no baruk atu halo investigação … maibe historia herek ona ho tinta mean … oinsa mak “estabelecer as regras essenciais da DEMOCRACIA PLURALISTA”. PR Lu-Olo hakarak de’it buat ida – Fretilin tenki ukun “a tudo custo” (dengan segala cara)”.

Hosi aspeitu estrutura lójika formál (Rektidaun: konseitu, propozisaun no argumentu), belun-diak nia konseitu ne’e totalmente loos: conceito “democracia pluralista”, CRDTL hatur katak ema hotu fo hanoin ba malu, loke fuan ba malu, loke néon ba malu hodi tesi-lia hamutuk. Ida ne’e mak substansia hosi Constitucional Patriotism Hubermas-nian. Ba aktu Partidu CNRT nia keixa, Tribunal de Recurso aceita ona resultado. Maibe iha belun-diak nia prepozisaun no argumentu ‘baruk halo investigasaun’ ne’e puramente kontradiktoriu. Ikus mai produs deit konkluzaun ida ho karakter ataka “personalidade jurídica”, bias no tendensiozu (Rebecca Sarniak, 2015). Maibe ha’u kontinua repeitu opiniaun ne’e tanba “karik” ida ne’e refleta ema ididak nian skill, knowledge and atitude selletiva ida. Katak fiar no tuir deit ne’ebé mak di’ak ba ita nia an rasik (self-selfish) ou satisfas follower sira no lalika tuir buat ne’ebé mak ema barak ka ema ho autoridade lejitimu nia hanoin.

  • Borja da Costa, Nicolao Lobato & Karl Max versus Naimori Bucar-KHUNTO;

Konseitu Rektidaun ho skill, knowledge and attitude sellectiva ne’e mak kondus belun-diak nia sitasaun ba palavra sira hosi Borja da Costa, Nicolao Lobato hanesan nia aprezenta iha artigu I&II ida ne’e. Belun-diak uza konseitu sira filozofiku hosi Grande Heroi Borga da Costa ho Nicolao Lobato nian para justifika prepozisaun no argumentu halo atake ba personalidade Naimori Bucar no pratika iha Partidu KHUNTO.

Pesoalmente, ha’u admiradu tebes ho belun-diak Amo e Dosente Filozofia Politika Martinho Gusmao nia sitasaun ba konseitu filozofiku hosi Grande Eroi Borga da Costa no Nicolao Lobato nian hodi justifika belun-diak nia prepozisaun ho argumentu subjektivu, bias, tendesiozu hirak tuir mai ne’e:

  • La iha fatin ba KHUNTO iha “democracia pluralista” ne’e hamoris fali conflito Loromonu vs Lorosae. Jura mate jura moris tiha ba Xanana, Naimori Bukar ba fatin hotu-hotu dehan “Xanana mak Loromonu nia herói”. Nia hakribit Lorosae sira hodi hasai hotu quadros KHUNTO nian, fo fatin ba Loromonu sira nebe fo osan barak ba nia. Ikus mai, hare katak Lu-Olo ho Taur Matan Ruak bele fo Vice Primeiro Ministro ba nia fen, hamutuk ho cadeira 14 tan … nia hatun “juramento” ba “respeito” deit. Lae! Ida ne’e la tuir ona espirito “pluralismo” Timor-Leste. KHUNTO nia intenção foer ne’e mak halo katak nia sai husi coligação IX Governo (nia jura ba Xanana dehan, “Xanana herói loromonu”), hodi tama ba VIII Governo tan kadeira 15 (maibe la hatene nia jura fali ba TMR ho Lu-Olo no Mari Alkatiri ne’e sei dehan saida lerek?).
  • Husi lian bisu-bisu nebe ema barak haktuir mai hau, saida mak Naimori Bukar halo ba “pengikut KORKA” to’o ba hari’i partido KHUNTO hanesan “exploração do homem pelo homem”. FRETILIN hari iha 1975, hakarak luta maka’as atu hakotu tiha hahalok brutal no monstro (monster) ida ne’e. Se ohin loron Partido Fretilin la hatene ideia hirak ne’e, tan Lu-Olo ho Mari Alkatiri nia hun no abut laos iha FRETILIN. Husi documento tomak nebe hau le no halo pesquisa, entrevista ho ema barak … ninia resultado: Lu-Olo no Mari Alkatiri la moris husi FRETILIN. Sira hari’i de’it Partido Fretilin iha 2000. Laos FRETILIN ida be 1975 ne’e.

Sobre belun-diak nia prepozisaun no argumentu sira personalidade juridika Naimori Bucar no Partidu KHUNTO, ha’u enkoraja belun-diak atu loke komunikasaun ho Naimori Bucar no dirijente partidu KHUNTO nian para halo peskiza sientifiku ida mak nakloke, sistematiku hodi aprofunda belun-diak nia konseitu, prepozisaun no argumentu sira ne’ebe refere ba Naimori Bucar – Partidu KHUNTO.

Hosi aspeitu metodolojia no enkuandramentu teoritiku, teoria-sira belun-diak uza iha ne’e diak tebes. Embora konseitu filozofiku hosi Borga da Costa, Nicolao Lobato no Cf., K. Marx, Capital I: ch. 15, section 3, Kunio Yoshihara (1988). Maibe ladauk to’o tanba belun-diak seidauk hatudu lacuna hosi teoria-sira ne’e (the gap theory: Gaziano and Gaziano 1996; Leon Jones, 1972, Laing, K. and Todd, L. (eds) (2015). Belun-diak tenki hatudu lacuna hodi forma belun-diak nia prepozisaun, formula Suposição hodi aprofunda argumentasaun.

Tanba hosi aspeitu metodolojia, belun-diak nia argumentasaun ho baze ‘bisu-bisu’ deit sobre personalidade juridiko Naimori Bucar-Partidu KHUNTO ne’e la viable. Belun-diak mos la aprezenta dadus ruma ne’ebe bele fortifika prepozisaun, Suposição no argumentu sira dezenvolve iha artigu I & II ida ne’e. Tanba sientifikamente, metodu no dadus laiha, entaun ha’u lakoi tama klean ba ida ne’e. Maibe, se’e artigu ida ne’e nudar materia manifestasaun ida hodi fo satisfasaun ba followers deit, ne’e ha’u la kestiona tanba ‘karik’ ida ne’e reprezenta ema idaidak nian skills, knowledge and attitude sellectiva (E. E. Davis and R. Sinnott, 1980; Daniel Day, 1940).

  1. FRETILIN, Mari Alkatiri & Krizi 2006-2007;

Iha parte ida ne’e belun-diak koalia konaba FRETILIN, Mari Alkatiri. Pelemenus belun-diak uza intervista ida halo ho Dr. Abilio Araujo, Rogerio Lobato no peskiza literature lubun ida. Iha ha’u nia intervista ne’ebe hanesan ho Dr. Abilio Araujo ba kestaun ne’ebe karik hanesan ho belun-diak nian, konaba involvimentu Dr. Alkatiri nian iha FRETILIN. Maske Fundador, Proklamador no Primeiru Prezidente ASDT-FRETILIN-RDTL Francisco Xavier do Amaral mate tiha ona, maibe laos belun diak ho ha’u deit mak hatene, publiku mos hatene publikasaun video hosi audensia publiku nasional CAVR nian (2004). Antes iha FRETILIN, iha inisiu hahu atu funda ASDT iha 20 fulan Maiu 1974, ema nain-rua mak ba hasoru Xavier do Amaral: Dr. Mari Alkatiri no Dr. Jose Ramos-Horta iha primeiru semana fulan Maiu 1974 ne’e. Signifika koalia konaba FRETILIN, Dr. Mari Alkatiri involve kedas ona desde inisiu funda ASDT, antes refundada FRETILIN no transforma estrutura no lideransa ASDT nian ba FRETILIN iha Setembru 1974.

Iha intervista audio no video inklui dokumentu balun ne’ebe ha’u mos hetan, Dr. Mari Alkatiri mak ba tula ho nia kareta Dr. Abilio Araujo, Guilhermina de Araujo iha aeroportu Bairopite, atual palasiu Prezidensia Republika momentu sira mai hosi Bali iha loron transformasaun ASDT-FRETILIN ne’e. Tula iha ne’e lori ba sira nia uma, depois a tarde sira hasoru-malu iha sede Sentral ASDT-FRETILIN nian Santa Cruz Dili (ha’u sujere belun-diak rona didiak fali audio intervista programa radiofoniku Tuba Rai Metin, 2002, video audensia publiku nasional CAVR nian konaba Konflitu Politika Internal, 2004 no konfirma ho intervista Dr. Mari Alkatiri-nian iha Novembru 2019 iha GMNTV & RTM (2019).

Konaba ambitu inisiu funda movimentu nasionalista luta ba ukun rasik an nian ‘ASDT’ nian, koinsidente, iha ha’u nia peskiza ida ba dokumentu sira iha periodu 1974-1975, ha’u mos deskobre relatoriu Polícia Internacional e de Defesa do Estado (PIDE) nian ida (Junu 1974). PIDE nia relatoriu Estadu ba Governu sentral iha Lisboa, sira temi ema nain tolu nudar figura sentral movimentu anti-kolonialista kontra portuges iha Timor Dili. Sira temi Xavier do Amaral (PIDE prega atributu Xavier do Amaral nudar joven, intelektual no oan hosi liurai lokal/foho-nian, revoltouzu). Figura segundu mak Mari Alkatiri (PIDE sira prega nia ho atributu putu, labarik, descedentes Arabia, nao educado) no terseiru mak Jose Ramos Horta (PIDE prega nia ho atributu joven, edukasaun la adekuadu/not well-educated, unemployment). Ha’u asesu relatoriu Estadu, PIDE nian iha Sentru Dokumentasaun CIDAC, Lisboa, Outobru 2019.

Belun-diak aproveita Deklarasaun Rogerio Lobato nian (loron 20 fulan-Maiu 2020) hodi akuza Dr. Mari Alkatiri fahe kilat ba Railos, ikus mai hamosu konflitu Lorosae-Loromonu (agora belun diak prega fali ba Personal Juridiku Naimori Bucar-Partidu KHUNTO), kazu petisaun no Alfredo Reinado. Konaba  alegasaun to’o ne’ebe Dr. Mari Alkatiri nia involvimentu iha akuzasaun fahe-kilat ne’e, Komisaun International Inkerito hosi Office of High Commissioners for Human Rights iha Timor-Leste (2007) nia hetan faktus hanesan hakerek iha parte pontu B.k tuir mai:

“ ….(k) The former Prime Minister failed to use his firm authority to denounce the transfer of security sector weapons to civilians in the face of credible information that such transfer was ongoing and involved members of the Government…”

Konaba krizi 2006-2007, la presija halo peskiza tanba iha relatoriu hosi Komisaun Inkeritu International hosi Office of High Commissioners for Human Rights iha Timor-Leste. Bele le iha ne’e: https://www.ohchr.org/Documents/Countries/COITimorLeste.pdf. Exceptu, belun-diak hakarak prova prepozisaun no supocisaun seluk ne’e libre avontade.

Belun-diak halo aproveitamentu diak tebes deklarasaun Dr. Abilio Araujo no Rogerio Lobato nian iha ambitu kontradiktoriu sobre todos futuru lideransa partidu FRETILIN nian hodi fortifika prepozisaun no supocisao no argumentu. Maibe ida ne’e so produs deit konkluzaun ida la pruduente, bias, tendensiozu. Artigu ne’e lakon tiha nia esensi sientifiku, sai publikasaun politiku ho baze interese partidaria partidaria.

Ikus-liu, ha’u atu konfirma katak belun-diak nia publikasaun (II) ne’e diak, maibe pontu ne’ebe belun-diak kestiona (prosesu, by mean) labele justifika ho by goals/objetives. Konaba OJE-2019 PR veta, lori fali ba PN halo tiha konfirmasaun, lori fila ba PR aprova kedas. Ha’u la konvensidu ho narativu iha artigu I & II nudar artigu pesoa akademista ida. Opiniaun hirak ne’e pelo kontrariu hanesan ema politiku no ema pratika politika ida. Argumentu hotu ne’ebe aprezenta iha artigu II ne’e, maske sita teoria balun, ne’e atu justifika deit atake ema nia personalidade juridika. Sientifikamente la validu tuir nia metodolojiku no faktus (dadus). Artigu ne’e ho karakter antagonimsu, laos solusaun ba impasse politiku. Argumentu ida dehan PLP, partidu-FRETILIN no partidu KHUNTO golpista/asaltu/hadau poder ne’e la provadu ho Konstituisaun RDTL, Kode Prosesu Penal no Rejimentu Parlamentu Nasional rasik. HOTU!

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,262
  • Page views today : 2,119
  • Total visitors : 74,194
  • Total page view: 103,377

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur