DILI—Konsellu Nasionál Polítika (CPN sigla Portugués) hamutuk ho estrutura nasionál ho distritu to’o suku Partidu CNRT, reafirma membru sira ne’ebé involve iha estrutura governu daualu atu retira iha loron 25 Maiu 2020, tanba depois de Estadu Emerjénsia partidu lideradu Kayrala Xanana Gusmão ne’e halo konferénsia nasionál hodi foti desizaun ba opozisaun.

Liuhuis konferénsia ba imprensa iha loron 23/05/2020 ne’ebé lidera husi Prezidente CNRT, Kayrala Xanana Gusmão, sublina membru CNRT sira ne’ebe tenke sai husi estrutura governu daualu inklui kuadru CNRT nian no membru sira ne’ebe mak CNRT propoen.

Liga ho situasaun ne’e, Xanana kontinua husu ba militante hotu atu hakmatek, tanba atu hatan ba situasaun polítika atuál ne’ebe hotu-hotu tenke hakruuk ba konstituisaun.

“Triste tebes nu’udar partidu, tanba haree ba Estadu ne’e, pilar haat ne’ebé harii hanesan uma lulik Timor nian lahuk dadauk. Ita tau fiar ba tribunál, maibé ita haree ba halo ita la fi’ar tiha hotu ona,” Xanana hatete.

Xanana dehan, la’ós nia parte lafiar juis sira maibé juis sira rasik nia servisu mak hatudu halo ema la fiar lei. Ne’e susar tebes.

Xanana subliña kestaun ne’e relasiona ho situasaun polítika rai laran liuliu ho desizaun Prezidente Repúblika Francisco Guterres Lú Olo ne’ebé hahú kedas la fó posse ba membru sira husi CNRT to’o prosesu ba formasaun governu foun, asaltu poder iha parlamentu nasionál no liga ba prosesu sira CNRT haruka ba tribunál maibé hetan resposta sira halo ema lafiar ona lei.

Tanba ne’e, Xanana kontinua dehan tristi tebes ho situasaun polítika no desizaun sira iha tribunál ne’ebé halis ba parte ida de’it.

“Partidu CNRT reafirma defende estadu direitu demokrátiku. Ami sei halo konerénsia ida atu haree baa mi nia aan rasik no buka atu apriende nafatin,” Xanana subliña.  (cao)

 

 41 total views,  2 views today

Please follow and like us:

NOTÍSIA FOUN

PUBLISIDADE