DILI—Prezidente Parlamentu Nasionál atuál, Arão Noé de Jesus da Costa Amaral, konsidera votasaun ne’ebé deputadu sira halo ho lidera husi Vise Prezidente Parlamentu Nasionál na’in-rua ilegal no laiha lejitimidade. Tanba ne’e, nia afirma, nia sei kontinua hala’o nia kna’ar nu’udar Prezidente ba órgaun estadu daruak ne’e.

“Eleisaun ita la hatene akta iha ne’ebé. Ninia rezultadu entrega iha sé. Kontajen ba tau iha ne’ebé. Tuir rejimentu votasaun ne’e laiha lejitimidade kona-ba prosesu eleisaun,” Arão afirma ba Jornalista sira iha Uma Fukun Parlamentu Nasionál hafoin rona eleisaun ba hatun nia no hili fali Aniceto Guterres.

“Ha’u laiha koñesimentu ba eleisaun meza parlamentu ninian tanba laiha ajenda no aprovadu hosi líder bankada sira para hodi halo plenária ba loron ohin (19/05/2020). To’o rezultadu voatasaun sai, kandidatu mós laiha, kontajen votu mós la ho prezensa tékniku sira hosi parlamentu. Ha’u sei hato’o rekursu ba Tribunál Rekursu,” Arão hatete.

Nia hatutan, ajenda ne’ebé vise-prezidente na’in-rua mak tau iha meza, maibé nia dehan, dezde lejizlatura dahuluk to’o agora eleisaun ba prezidente no meza parlamentu Nasionál ne’e sempre nakloke no hotu-hotu partisipa, ema hotu-hotu rona hafoin anunsia rezultadu votasaun.

Nia subliña, deputadu maioria mak halo eleisaun maibé prosesu eleisaun tenke tuir prosedimentu legál ne’ebé iha tanba prosesu legál mak determina maioria ka minoria.

“Ha’u sei buka rekorre ba Tribunál Rekursu hodi buka lia-loos. Se prosesu ne’e legál no loos ha’u sei kumpre. Ha’u sei hala’o ha’u-nia knaar tanba seidauk ofisisializa hodi hein desizaun tribunál nian,” Arão salienta.

Arão dehan, kargu polítiku ne’e la permanente, maibé atu hatun no hasae ne’e ida nia dalan. Dalan mak konstituisaun no Rejimentu Parlamentu Nasionál.

Antes ne’e, Arão dehan, asaun ne’ebé vise prezidente sira halo ne’e asaltu poder.

Entretantu Viseprezidenti Parlamentu Nasionál nain rua, Maria Angelina Sarmento ho Luis Roberto, maske hetan blokeia husi deputadu sira CNRT tanba konsidera asaltu poder maibe vise rua lidera plenária destituisaun Prezidente Parlamentu Nasionál ne’ebe ikus mai halo votasaun ba destituisaun Prezidente Parlamentu Nasional Arao Noe ho votus 23 husi FRETILIN, 8 husi PLP no 5 husi KHUNTO.

Hafoin ne’e, votasaun tuir fali hodi hili kandidatu Uníku Deputadu Aniceto L. Guterres eleitu ba Prezidenti Parlamentu Nasionál foun, ho votus a favor 40, inklui votus 4 husi PD.

Prosesu Plenária ne’ebé Viseprezidenti nian rua konvoka hetan atake hosi Deputadu Bankada CNRT, konsidera ilegal tanba viola konstituisaun no rejimentu PN konaba delegasaun kompetensia. CNRT konsidera asaun nee asaltu poder.

Maske nune’e, Vise nain rua kontinua realiza Plenaria ho laiha diskusaun normal hanesan plenaria baibain no halo deit votasaun.

“Rezultadu votasaun ba kandidatu Uníku Prezidenti Parlamentu Nasionál foun, vota a favor 40, kontra zero, abstensaun zero,”Viseprezidenti Luis Roberto anunsia ba plenaria PN, tersa,(19/05).

Observasaun ne’ebé Timor Post haktuir, votus husi Partidu Demokratiku maihusi Prezidenti PD Mariano Assanami Sabino, Deputada Elvina Souza, Deputadu Adriano do Nacimento, Deputadu Ernesto Fernandes ‘Dudu’.

Nune’e mos Deputadu Bankada CNRT, PUDD, UDT ho FM, inklui Deputadu Antonio da Concecao ‘Kalohan’ hodi PD ho total Deputadu nain 25 lafo Votus. (cao)

 

 14 total views,  2 views today

Please follow and like us:

NOTÍSIA FOUN

PUBLISIDADE