DILI—Vise Prezidente Parlamentu Nasionál Maria Angelina rekoñese seidauk iha desizaun husi líder bankada sira kona-ba pedidu destituisaun ne’ebé aprejenta husi deputadu sira FRETILIN, PLP ho KHUNTO ba Prezidente Parlamentu Nasionál Arão Noe.

“Loos duni. Atu konvoka plenária presizamente tenke liuhusi konsesnsu líders bankada,” Angelina rekoñese ba Jornalista sira iha sala plenária hafoin mosu situasaun rungu-ranga bainhira nia atu ba lidera meza maibé hetan impedimentu husi deputadu sira CNRT nian, iha oras tuku 10 liu-loron 18/05/2020.

Angelina dehan, la konsege iha líder bankada, tanba de’it rekerimentu tama liu loron lima Prezidente Parlamentu Nasionál abandona. Ho nune’e rekerimentu ida tama ba vise prezidente na’in-rua no iha loron ne’e atu dirizi duni meza atu foti desizaun.

“Ami mós la konvoka líder bankada. Saida mak ami halo, ami lori mai plenária, ami so’e ba deputadu sira mak deside ajenda ba plenária. Tanba iha rejimentu mós hatete kuandu deputadu sira la konkorda ho desizaun ajendamentu ne’ebé deskuti iha líder bankada, deputadu sira bele lori rekursu kona-ba ajendamentu ne’e mai iha plenária,” Angelina argumenta.

Maske nune’e, molok situasaun rungu-ranga iha sala plenária, Prezidente Parlamentu Nasionál Arão Noe, iha oras tuku 9:00 organiza kedas konferénsia ba imprensa hodi kondena maka’as tentativa hadau Prezidente Parlamentu nia poder ne’ebé halo husi Vise Prezidente Parlamentu Deputada Maria Angelina Lopes Sarmento.

Aktu sira ne’ebe konsidera nudar tentativa hadau poder maka hanesan tuir mai ne’e:

  1. Iha loron 13 Maiu 2020 Bankada Fretilin, PLP, no Khunto dirije Rekerimentu Distituisaun Prezidente Parlamentu Nasional ba fali Vise Prezidente Parlamentu Nasional. Aktu ida ne’e Viola KRDTL Artigu 99 (3), Rejimentu Parlamentu Nasional Artigu 17 kona-ba Kompetensia Prezidente Parlamentu Nasional.
  2. Konstituisaun Artigu 99 (3) hateten momoos katak Parlamentu Nasional Reuni Ordinariamente tuir Konvokasaun Prezidente Parlamentu nian. Tanba ne’e Vise Prezidente Parlamentu Maria Angelina Lopes Sarmento nia aktu sira ne’e viola KRDTL, LOFAP, Kodigu Penal, no Rejimentu Parlamentu Nasional.
  3. Vise PPN Maria Angelina Lopes Sarmento Obriga Xefe Divizaun Apoiu Plenaria ka DIPLEN, Sr. Quintiliano Ase atu ajenda no prepara material ba plenária iha loron 18 Maiu 2020. Aktu ida ne’e viola Rejimentu Parlamentu Nasional Artigu 22 kona-ba kompetensia Vise Prezidente Parlamentu Nasional nian. Vise Prezidente Parlamentu Nasional so bele ezerse PPN nia funsaun bainhira hetan delegasaun kompetensia husi PPN tuir Rejimentu Artigu 22 nu. 3
  4. Tuir prosedimentu normal iha Parlamentu Nasional, Prezidente Parlamentu maka iha kompetensia atu konvoka Konferensia Lideres Bankada hodi aprova ajenda ba plenária.
  5. Bainhira Lideres Bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mos laiha.
  6. Xefe DIPLEN konsidera katak prosesu ne’ebe Vise Prezidente Parlamentu Nasional Maria Angelina Sarmento halo ne’e kontra aktu normal funsionamentu Parlamentu Nasional, nune’e devolve fila fali despaixu refere ba Gabinete Vise Prezidente nian.
  7. Tanba la konsege Obriga DIPLEN, Vise Prezidente Parlamentu Maria Angelina Lopes Sarmento halo despaixu ba Sekretariu Jeral atu ajenda Plenaria ba loron 18 Maiu 2020.
  8. Sekretariu Jeral Parlamentu Nasional Divolve Despaixu husi Vise Prezidente Parlamentu Nasional tanba Konsidera despaixu refere Kontra LOFAP Artigu 7.

LOFAP Artigu 7 hateten katak tenke iha delegasaun kompetensia husi Prezidente ba Vise Prezidente Parlamentu por eskrita antes Vise Prezidente bele toma funsaun Prezidente Parlamentu nian.

Aktu sira ne’e konsidera nudar hahalok hadau poder ne’ebe kontra Konstituisaun da Republika, Kodigu Penal, Rejimentu Parlamentu Nasional no Lei Organizasaun Funsionamentu Administrasaun Parlamentar.

Prezidente Parlamentu REAFIRMA katak Bazeia ba KRDTL Artigu 86 (f), Parlamentu Nasional hein DISOLUSAUN husi Prezidente da Republika. Prezidente Parlamentu Firme hodi defende KRDTL tuir Artigu 2 (2) katak Estadu Hakruuk ba Konstituisaun no Lei Oan sira. Prezidente Parlamentu husu ba ITA HOTU atu Hakruuk no Kumpre KRDTL.

Entretantu tuir observasaun Timor Post iha Uma Fukun Parlamentu Nasionál, seguransa kontroladu husi Polísia Nasionál Timor Leste. (cao)

 8 total views,  1 views today

Please follow and like us:

NOTÍSIA FOUN

PUBLISIDADE