Notísia foun


DILI—Sekretária Jerál (SekJer) Parlamentu Nasionál (PN) Cedelízia Faria dos Santos, iha loron 15 Máiu 2020 fó sai ona despaixu Nú. 06/2020/SG  ba Koordenador Seguransa Parlamentu Nasionál, Koordenador Operasional no Komandante Seguransa Sivíl iha uma fukun órgaun daruak ne’e atu labele autoriza órgaun ka instituisaun saida de’it atu halo instalasaun ou servisu seluk iha sala plenária.

Orientasaun ne’e ba mós Rádio Televizaun Timor Leste (RTTL) ne’ebé durante ne’e halo transmisaun direta ba atividade iha plenária bainhira la hatudu karta autorizasaun ofisiál husi Sekretaria Jerál Parlamentu Nasionál.

Desizaun ne’e foti ho baze ba Lei LOFAP Artigu 22 ne’ebé fó kompeténsia ba Sekretaria Jerál hodi halo jestaun ba nível administrativu, patrimónial, rekursu finanseiru no mós rekursu umanu, inklui elabora diretrizes iha Sekretariadu Jerál Parlamentu Nasionál.

Entretantu ba Timor Post via telefone, Domingu (17/05/2020), Sekretária Jerál (SekJer) Parlamentu Nasionál (PN) Cedelízia Faria dos Santos klarifika, orientasaun ne’e la inklui atividade kobertura husi mídia sira hanesan baibain.

“Kona-ba kobertura bai-bain laiha problema. Só ba instala ekipamentu ba transmisaun direta iha plenária  mak tenki iha karta autorizaun,” Cedelízia subliña kestaun ne’e relasiona ho preokupasaun sira kona-ba impedimentu sira relasiona ho liberdade imprensa iha Timor Leste.

Cedelízia dehan, hanesan baibain trasmisaun direta husi RTTL sempre hetan autorizasaun husi nia parte maka bele. Tanba ne’e, nia hatutan, laiha problema ho atividade kobertura husi mídia nasionál no internasionál iha Parlamentu Nasionál.

Entretantu iha semana kotuk Vise Prezidente Bankada PLP hatete, sei iha plenária iha loron 18/05/2020 dirizi husi Vise Prezidente Parlamentu Nasional sira hodi halo desizaun ba pedidu destituisaun ba Prezidente Parlamentu Nasionál ne’ebé deputadu husi bankada FRETILIN, PLP ho KHUNTO entrega ona ba Vise Prezidente na’in-rua.

Maske nune’e, Vise Prezidente Parlamentu Nasionál Luis Roberto hatete, sei laiha plenária dirizi husi vise prezidente sira bainhira la hetan delegasaun kompeténsia husi Prezidente Parlamentu Nasionál, tuir artigu 22 Rejimentu Parlamentu Nasionál. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,070
  • Page views today : 1,281
  • Total visitors : 37,927
  • Total page view: 52,238

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur