Notísia foun


Hakerek Na’in: José Boavida Simões

Estudante da Faculdade de Direito – UNTL

Alumni STIE Jawa Timur – Indonesia,

Membro RENETIL (Região Aitana) – Bali

 

 I.  INTRODUSAUN

Iha 11 Maiu 2020, tuku 20.00 OTL, GMN TV realiza grande entrevista entre Deputadu sira hosi Partidu Polítiku (PP) FRETILIN (reprezenta hosi Deputadu A. Bianco), CNRT (reprezenta hosi Deputadu Patrocínio), PD (reprezenta hosi Deputadu Kalohan) no PLP (reprezenta hosi Deputadu Vasconselos) no Jurista Me. Pe. Júlio Crispim. Nune’e, elaborasaun ne’e mosu, ho objetivu, atu fo apresasaun balun kona-ba Grande Entrevista refere.

II. APRESIASAUN

2.1. Opiniaun Kruzada entre FRETILIN no CNRT (Troka Pozisaun)

Ko’alia kona-ba opiniaun kruzada entre FRETILIN no CNRT, ideia ne’e liga ho ipóteze rua (2) kona-ba Proposta Lei (PL) OGE 2020 hanesan tuirmai: 1) Ipóteze kona-ba PL OGE 2020 la aprova (não aprovada) ka sumba iha PN [CRDTL art. 86.º al. f)] ne’ebé sai razaun hosi CNRT atu lori PR ba Tribunal do Recurso (TR); 2) Ipóteze kona-ba PL OGE 2020 retirada ka la votada (não votada) [CRDTL art. 97.º n.º 4] ne’ebé sai razaun hosi PR Lu Olo (hosi FRETILIN) atu husu movimentasaun iha PN hodi bele halo demisaun ba Governu.

Iha Grande Entrevista ne’e, Deputadu Antoninho Bianco (hosi FRETILIN)  afirma no defende fali pozisaun kona-ba PL OGE 2020 la aprova (não aprovada) ka sumba iha PN ne’ebé sai razaun hosi CNRT atu lori PR ba Tribunal do Recurso (TR). Enkuantu, Deputadu Patrócinio (hosi CNRT) defende fali pozisaun kona-ba PL OGE 2020 retirada ka la votada (não votada) ne’ebé sai razaun hosi PR Lu Olo (hosi FRETILIN) atu husu movimentasaun iha PN hodi bele halo demisaun ba Governu. Nune’e, BELE DEHAN KATAK, DEPUTADU FRETILIN BA DEFENDE POZISAUN CNRT, ENKUANTU, DEPUTADU CNRT BA DEFENDE POZISAUN FRETILIN.

Bazeia ba observasaun kona-ba ipóteze rua-ne’e, bele entende katak, FAKTU RELEVANTE JURÍDIKAMENTE, mak PL OGE 2020 LA VOTADA, la’os PL OGE 2020 LA APROVADA. Ideia ne’e fundamenta ba faktu retira hosi VIII Governu Konstitusionál ne’ebé implika efeitu jurídiku katak, PL OGE 2020 la bele hatama hikas iha sesaun lejislativa ne’e no tuirmai [CRDTL art. 97.º n.º 4]. BELE DEHAN KATAK, PR NIA DESIZAUN NE’E LOOS HELA!

2.2. Opiniaun hosi PD no CNRT: La Presiza halo Mudansa iha Meza Parlamentár

Deputadu Kalohan (hosi PD) no Deputadu Patrocínio (hosi CNRT) dehan katak la presiza iha mudança iha PN, hela ajusta de’it. Idea ne’e rasik liga ho aktu formalidade “audisaun” PR iha prosesu formasaun Governu [CRDTL art. 106.º n.º 1]. Iha prosesu formasaun Governu iha aktu formalidade tolu (3): INDIJITASAUN, AUDISAUN NO NOMEASAUN (presupostu formál).

Aktu audisaun ne’e mai hosi espresaun “rona partidu polítiku sira-ne’ebé hetan asentu iha Parlamentu Nasionál (PN)” [uza termu asentu tanba bankada ladauk forma]. Aktu ne’e kompreende hanesan dever PR (nu’udár sujeitu pasivu) atu konfirma “maioria parlamentár” ne’ebé seguru ba sustentabilidade governamental (tuir princípio da segurança Jurídica). Bele dehan katak, presupostu formál ne’e rasik exigeACTOS PARLAMENTARES” (PN nu’udár sujeitu ativu) hodi “hatudu” liuhosi meza PN katak, maioria parlamentár ne’ebé iha (ka foun), seguru atu sustenta Governu nia vida [tanba iha sistema semi-prezidensiál, GOV moris no sustenta hosi PN, la’os hosi PR]. NUNE’E ESPETATIVA JURÍDIKA IDA KATAK, GOVERNU FOUN BELE MOSU SEM MUDANSA IHA MEZA PARLAMENTÁR NE’E LA LOOS!

2.3. PLP no FRETILIN interpreta katak VIII Governu Konstitusionál bele Submete Nafatin PL OGE 2020

Na’i Deputadu Vasconselos (hosi PLP) no  Deputadu A. Bianco (hosi FRETILIN) dehan katak VIII Governu Konstitusionál bele submete nafatin PL OGE 2020, tanba, PL refere konsidera nu’udár REJEITADA [CRDTL art. 97.º n.º 3].

CRDTL konsagra konseitu tolu, nomeadamente, REJEITADO, NÃO VOTADO no NÃO APROVADO, ne’ebé, bele esplika hanesan tuirmai:

Primeiru, PROPOSTA KA PROJETU LEI ne’ebé konsidera nu’udar REJEITADO [CRDTL art. 97.º n.º 3] kuandu enkuadra iha aktu formalidade Prezidente Parlamentu Nasionál (PPN) atu ADMITE KA REJEITA kualkér diploma legál ne’ebe submete ba PPN [Regimento do Parlamento Nacional (RPN) art. 17.º n.º 1 al. d)].

Segundu, PROPOSTA KA PROJETU LEI ne’ebé konsidera nu’udar NÃO VOTADO [CRDTL art. 97.º n.º 3] kuandu enkuadra iha aktu formalidade RETIRA [CRDTL art. 92.º n.º 2], KATAK, PPN aseita no konvoka [RPN art. 17.º n.º 1 al. d)], maibé, autór em casu VIII Governu Konstitusionál retira tiha, nune’e, impede prosesu ba votasaun (la lori to’o votasaun). PL OGE 2020 ne’ebé mak retira ona (não votada) [CRDTL art. 92.º n.º 2 konjuga ho RPN art. 17.º n.º 1 al. d)], tuir CRDTL no RPN rasik, ATU HALO RENOVASAUN INISIATIVA tenke halo kaduka PL refere ho DEMISAUN GOVERNU [CRDTL art. 97.º n.º 5 no RPN art. 94.º n.º 2].

Terseiru, PROPOSTA KA PROJETU LEI ne’ebé konsidera nu’udar NÃO APROVADO [CRDTL art. 86.º al. f)]. Pozisaun CRDTL klaru katak, kuandu PN la aprova OGE, faktu ne’e konsidera nu’udár grave crise institucional ne’ebé rezulta PR disolve PN no dekreta EA [CRDTL art. 86.º al. f) konjuga ho art. 100.º]. BELE LEE opiniaun iha TIMOR POST, 21 Janeiru 2020, kona-ba “PN LA APROVA OGE 2020, LOKE DALAN BA PR DISOLVE PN NO PR DECRETA EA TUIR CRDTL.”

NUNE’E, LA BELE FOTI ARTIGU SIRA RIBA BA MAI TUIR ITA-NIA HAKARAK MAIBÉ TENKE KOMPREENDE HOSI NINIA BAZE (PRINSÍPIU NO DOUTRINA SIRA) MAK FOIN UTILIZA ARTIGU REFERE SIRA.

2.4. Intervensaun Jurista Me. Pe. Júlio Crispim Kona-ba Destituisaun Meza PPN

RPN art. 16.º – B kona ba “Destituição” PN dehan katak: O pedido de destituição, DEVIDAMENTE JUSTIFICADO, é apresentado em REQUERIMENTO SUBSCRITO POR UM MÍNIMO DE DEZ DEPUTADOS, cuja VOTAÇÃO É OBRIGATORIAMENTE AGENDADA para UMA SESSÃO PLENÁRIA A TER LUGAR NUM PRAZO NÃO SUPERIOR A CINCO DIAS.

Espresaun refere konsiste hosi presupostu formal tolu, nomeadamente, (1) Rekerimentu subskritu hosi mínimu Deputadu sira nain-sanulu, (2) Obrigatoriamente halo ajenda ba votasaun, (3) Prazu la bele liu loron lima, no presupostu materiál-esensiál ida, dezignadamente, O pedido de destituição, DEVIDAMENTE JUSTIFICADO. Bele dehan katak, PRESUPOSTU MATERIÁL NE’E SAI ODOMATAN BA PRESUPOSTU FORMÁL SIRA-SELUK.

Espresaun “ o pedido de destituição, DEVIDAMENTE JUSTIFICADO” rasik fundamenta ba prinsípiu rua, nomeadamente, PRINCÍPIO DE JUSTIÇA no PRINCÍPIO DE SEGURANÇA JURÍDICA ne’ebé sai FIM ka FINALIDADE hosi Direitu. KATAK, ARTIGU NE’E BELE IHA KONFLITU HO ARTIGU NO PRINSÍPIU SIRA SELUK, MAIBÉ SIRA NE’E HOTU HAKRUK BA PRINSÍPIU RUA NE’E (JUSTISA NO SEGURANSA JURÍDIKA)!!! Iha literatura balun, ideia ne’e konsidera nu’udár JUSTA CAUSA. Nune’e, sa mak Jurista Me. Pe. Júlio Crispim dehan ne’e loos, haree hosi ponto de vista técnico jurídico. NUNE’E, LA BELE APLIKA REGRA NARNARAN KUANDU SEIDAUK HATENE NINIA PRINSÍPIU.

RAZAUN DEVIDAMENTE JUSTIFIKADA (JUSTA CAUSA) BA PPN rasik la estabelese iha CRDTL no RPN, nune’e, BAZE LEGÁL ATU TETU PPN NIA “SALA KA PEKADU” MAK SA? IHA LAKUNA NE’E DOUTRINA SA MAK ITA UZA? BAZE MAK KONFIANSA POLÍTIKA (BELE DE’IT MANIPULADA) KA BAZE MAK LEI? Ba kestaun ne’e ORDENAMENTU JURÍDIKU orienta atu fila ba SIÉNSIA JURÍDIKA kona-ba regra sira ba INTEGRASAUN JURÍDIKA BA LAKUNA [CCT art. 9.º].

Atu bele halo INTEGRASAUN ba lakuna ne’e, tenke hatene lai norma integrativa [CCT art. 9.º] hanesan tuirmai:

Primeiru, iha kazu sira-ne’ebé lei la prevé sei reguladu tuir norma aplikável ba kazu análogu sira (Os casos que a lei não preveja são regulados segundo a norma aplicável aos casos análogos) [CCT art. 9.º n.º 1]. Ideia ne’e doutrina permite atu halo integrasaun liuhosi kazu sira-ne’ebé análogu, katak, bele halo analogia legis ka analogia iuris.

Segundu, iha ANALOGIA ba KAZU OMISU karik iha razaun justificativa sira atu prosede regulamentasaun hosi kazu sira-ne’ebé previstu iha Lei (Há analogia sempre que no caso omisso procedam as razões justificativas da regulamentação do caso previsto na lei) [CCT art. 9.º n.º 2]. Ideia-ne’e refere ba analogia legis ne’ebé entende nu’udár aplikasaun norma sira-ne’ebé mai hosi kazu sira-ne’ebé SUBSTANSIALMENTE DIFERENTE, MAIBÉ, KONTINJENTEMENTE IDÉNTIKU. Ezemplu, Jurista Me. Pe. Júlio Crispim dehan bele uza JUSTA CAUSA (RAZAUN DEVIDAMENTE JUSTIFIKADA) hosi Responsabilidade Criminal e Obrigações Constitucionais de Presidente da República (PR) [CRDTL art. 79.º] NE’E TANBA LEI NO DOUTRINA PERMITE ATU HALO ANALOGIA LEGIS. Katak, POZISAUN rua-ne’e (PR no PPN) la hanesan SUBSTANSIALMENTE (eleito por povo e eleito por Deputados), maibé, KONTINJENTEMENTE hanesan (ÓRGAUN SOBERANU NE’EBÉ MAK IHA IMUNIDADE HOTU). nune’e, IDEIA NE’EBÉ FO SALA BA NO HATUUN JURISTA NO DEHAN KATAK, PPN HO PR NE’E LA HANESAN HOSI NINIA NATUREZA (eleito por povo e eleito por Deputados) NO, KONSEKUENTEMENTE, LA BELE APLIKA NORMA BA PR, NE’E LA LOOS!!! Hatene fo sala TENKE fo BAZE LEGÁL, LA’OS KO’ALIA POLITIKAMENTE DE’IT! Jurista Me. Pe. Júlio Crispim Ximenes Belo, Drs., Ldto., MDpri. KO’ALIA LOOS KONA-BA TÉKNIKA JURÍDIKA BA INTEGRASAUN LAKUNA HO BAZE LEGÁL IHA CCT art. 9.º n.º 2 (LA’OS ENVENTA HANESAN POLÍTIKU SIRA BALUN).

Terseiru, iha falta kazu análogu, situasaun rezolve tuir norma ne’ebé mak intérprete (Tribunál) kria, karik lejila tuir ESPÍRITU HOSI SISTEMA (Na falta de caso análogo, a situação é resolvida segundo a norma que o próprio intérprete criaria, se houvesse de legislar dentro do espírito do sistema) [CCT art. 9.º n.º 3]. Norma ida-ne’e, refere ba analojia iuris, katak, iha AUZÉNSIA ba norma análoga sira, intérprete (Tribunál) bele rekorre ba PRINCÍPIOS GERAIS DO DIREITO  bazeia ba ESPÍRITU HOSI SISTEMA (implika rekursu ne’ebé amplu), hodi kria NORMA AD-HOC IDA ATU RESPONDE NO HALO INTEGRASAUN BA LAKUNA REFERE. Karik, ita análiza hotu lejislasaun timorense ezistente, TUIR ESPÍRITU ORDENAMENTU JURÍDIKU TIMORENSE, HASAI EMA IDA HOSI NIA KARGU KA NIA SERVISU TENKE HALO HO JUSTA KAUZA, SE LAE IMPLIKA RESPONSABILIDADE JURÍDIKA HOSI SIRA-NE’EBÉ MAK EFETUA AKTU REFERE!

Ideia kona-ba JUSTA CAUSA (DEVIDAMENTE JUSTIFICADA) ne’e rasik fundamenta ba Princípio de Justiça no Princípio de Segurança Jurídica, ne’ebé sai FIM ba Direitu. Bele dehan katak, hasai ema ida hosi ninia kargu LA HO RAZAUN NE’EBÉ JUSTA sei viola PRINCÍPIO DE JUSTIÇA, enkuantu, hasai ema ida hosi ninia kargu la ho BAZE LEGÁL ATU SAI SASUKAT KA MEDIDA ba NINIA SALA sei viola PRINCÍPIO DA SEGURANÇA JURÍDICA NO INCERTESA JURÍDICA.

2.5. Hatama Hikas PL OGE 2020 hosi VIII Governu Konstitusionál Implika violasaun ba Princípio Primado da Lei

Fundamenta ba faktu no baze legál sira-ne’ebé temi tiha ona, bele dehan katak, VIII Governu Konstitusionál la iha ona dalan atu hatama tan PL OGE 2020 iha sesaun ne’e no sesaun lejislativa tuirmai. KARIK, hakarak OBRIGA AAN HATAMA, actus ne’e bele konsidera nu’udár violasaun ba PRINCÍPIO PRIMADO DA LEI [CRDTL art. 2.º n.º 2]. Katak, Lei no CRDTL dehan LA KARESE ATU HATAMA HIKAS IHA SESAUN LEJISLATIVA NE’E NO SESAUN LEJISLATIVA TUIRMAI, MAIBÉ, VIII GOVERNU KONSTITUSIONÁL, nu’udár ORGAUN SOBERANU ida, tanba de’it hetan APOIU, hosi PP balun, HAREE CRDTL NO LEI NE’E HANESAN LA VALE TIHA DE’IT, nune’e OBRIGA AAN NAFATIN ATU HATAMA PL OGE 2020 (HANESAN MOS IDA RETIRA TIHA HATAMA FALI DEPOIS SUMBA).

 

III. KONSIDERASAUN FINÁL

            Hosi esplikasaun ne’ebé temi tiha ona bele konklui katak: 1) Iha opiniaun kruzada entre Deputadu hosi FRETILIN no CNRT kona-ba PL OGE 2020 “não votada” ka “não aprovada”; 2) Mudansa iha meza parlamentár ne’e nesesáriu ba formasaun Governu foun hodi rezolve impase atuál iha RDTL; 3) Hanoin katak VIII Governu bele hatama hikas PL OGE 2020 ne’e la loos juridikamente; 4) Intervensaun hosi Jurista Me. Pe. Júlio Crispim  ne’e tuir hela téknika jurídika ba INTEGRASAUN LAKUNA; 5) Karik VIII Governu hakarak obriga aan hatama PL OGE 2020, actus refere sei viola PRINCÍPIO PRIMADO DA LEI.

REFERÊNCIA BIBLIOGRÁFICA

CANOTILHO, J.J. Gomes. Direito Contitucional e Teoria da Constituição, 6Ed. Almedina: Coimbra, 2012.

CUNHA, Paulo Ferreira. Direito Constitucional Aplicado, Viver a Constituição, a Cidadania e os Direitos Humanos. Quid Juris: Lisboa, 2007.

DE LIMA, Pires & Antunes Varela, Código Civil Anotado, Volume I (artigos 1.º a 761), 4.ª Edição Revista e Actualizada. Coimbra Editora: Coimbra, 1987.

GOUVEIA, Jorge Bacelar. Direito Constitucional de Timor-Leste. Gráfica de Coimbra, LDA.: Coimbra, 2012.

MIRANDA, Jorge. Manual de Direito Constitucionál, Vol. II, Tomo III e IV. Coimbra Editora: Coimbra, 2010.

MIRANDA, Jorge. Manual de Direito Constitucionál, Vol. III, Tomo V, VI e VII. Coimbra Editora: Coimbra, 2010.

PEREIRA, António Pinto. Princípios Gerais de Direito, 1.ª Ed.. Coimbra Editora: Coimbra, 2013.

VASCONCELOS, Pedro Carlos Bacelar. Constituição Anotada, República Democrática de Timor-Leste. Empresa Diário do Minho, Lda.: Braga, 2011.

Please follow and like us:

NOTÍSIA FOUN

Site Statistics

  • Users online: 1 
  • Visitors today : 297
  • Page views today : 348
  • Total visitors : 196,029
  • Total page view: 283,393

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur