Notísia foun


DILI—Partidu CNRT lideradu Kayrala Xanana Gusmão husu ba FRETILIN, PLP ho KHUNTO leganiza koligasaun no indizita Primeiru Ministru ida ba governu konstitusionál dasia nu’udar dalan hakotu impase polítika iha rai laran.

Prezidente Bankada Partidu CNRT, Duarte Nunes hatete, nia parte nu’udar partidu ne’ebé maioria ho kadeira 21 hamutuk ho PLP kadeira 8 no KHUNTO kadeira 5 iha formasaun governu daualu. Tanba ne’e, bainhira CNRT dada-an ona hatudu governu lideradu Primeiru Ministru Taur Matan Ruak monu ona.

Duarte dehan, defaktu FRETILIN ho kadeira 23 hakarak viabiliza governu daualu, maibé jurídikamente labele tanba tuir artigu 106 alinea dahuluk haktuir formasaun governu tenke mai husi partidu ne’ebé votus barak liu ka aliansa maioria parlamentar.

Hatudu katak, Duarte hatutan, CNRT sai ona husi aliansa maioria parlamentar ne’ebé forma governu daualu, no bainhira lakohi ba eleisaun antesipada maka FRETILIN nu’udar partidu mais votadu bele aranja fali koligasaun ka aliansa foun hodi forma governu dasia.

“Ha’u ko’alia bebeik ona, ha’u atu repete bebeik de’it, VIII Governu labele eziste ona, tanba CNRT sai ona, naton ne’e CNRT fó apoiu liu hosi bloku ida ba VIII Governu, bloku ne’e nakfera ona hela de’it 13 Deputadu, ne’e labele fó apoiu VIII Governu,” Prezidente Bankada CNRT, Duarte Nunes, ba jornalista iha uma fukun Parlamentu Nasionál, Kuarta, (13/05/2020).

“Bloku ida seluk mai ne’e seida’uk formal, tenke formal mak ema hotu fiar, nasaun ne’e ita labele inventa sasan, ita nunka la’o tuir lei ne’e. Lei ne’e hatudu dalan ita tenke tuir,” Duarte  subliña.

Liga ho deputadu sira husi FRETILIN, PLP ho KHUNTO hatama ona karta destituisaun ba Prezidente Parlamentu Nasionál, Duarte dehan, la presiza ho meius ida ne’e, tanba tuir nia, bainhira koligasaun husi partidu tolu ne’e legaliza ona no indijita ona primeiru ministru foun maka liu-deit husi eleisaun normal ida, sé mak manan bele ba assume fali pasta xefia iha órgaun estadu daruak ne’e.

Nune’e, Duarte salienta, la presiza pedidu destituisaun no ameasa sira atu vise prezidente parlamentu nasionál sira ba lidera meza hodi halo desizaun ba pedidu destituisaun ne’e, tanba bainhira akontese duni ne’e hatudu asaltu de poder.

“Ida ne’e labele akontese iha nasaun ne’e. Ita tenke hatudu ba mundu katak ita sei hanesan ne’e (kumpri lei), duke ita halo konfuzaun. Iha eleisaun sé mak manan ita fó parabens,” Duarte hatete.

Atu ba to’o iha ne’eba, Duarte kontinua husu ba FRETILIN, PLP ho KHUNTO atu formaliza sira nia koligasaun, hanesan saida mak sira (koligasaun lideradu CNRT) halo ona tuir orientasaun prezidente repúblika liga ho lei partidu polítiku no formasaun governu nian, maka sei laiha problema.

“Sira halo tiha ida ne’e (formaliza koligasaun) indizita primeiru ministru foun no haruka ba prezidente repúblika aseita. Ita bele halo ona eleisaun ba meza parlamentu nasionál,” Duarte subliña.

Maske nune’e, antes ne’e Deputadu Luis Roberto, hosi Bankada KHUNTO, hatete, KHUNTO seida’uk halo konferensia extra-ordinaria sai husi koligasaun foun lideradu CNRT hamutuk ho partidu haat seluk, PD, UDT, FM ho PUDD, tanba pozisaun KHUNTO klara mantein asegura ejistensia governu daualu to’o mandatu remata.

“Ami Partidu KHUNTO seida’uk Hamosu konferensia extra-Ordinaria ida, tanba sa maka ami seida’uk halo, ami fiar katak VIII Governu mantein nafatin, ita nia Prezidenti Repúblika mantein nafatin fó fiar ba VIII Governu nebe lidera hosi exelensia atual Primeiru Ministru Taur Matan Ruak, tanba ne’e ami KHUNTO mos ami hola parte ami sei mantein nafatin, ne’ebé ami seida’uk halo konferensia extra-Ordinaria para atu koresponde ba estetmentu polítika mai hosi Partidu sira seluk,” Luis afirma.

Entretantu iha loron Kuarta (22/04/2020), Sekretáriu Jerál FRETILIN, Marím Bim Amude Alkatiri asina nota esklaresimentu ida hodi halo klarifikasaun ba públiku kona-ba relasaun partidu nian ho governu daualu lideradu Primeiru Ministru Taur Matan Ruak (TMR).

Iha nota esklaresimentu ne’ebé Timor Post asesu ne’e haktuir, iha konferénsia FRETILIN nian reitera ka reforsa mandatu Sekretariu Jeral nian atu halo esforsu tomak ho objetivu atu loke fila fali dalan ba diálogu atu buka entendimentu ida ne’ebé bele hakotu impase polítiku.

Pasu ida ne’e tuir FRETILIN hanesan meius ida hamihis konflitu potensial sira, entaun baze ba entendimentu ne’ebé hala’o ho PLP nu’udar partidu ne’ebé lidera governu labele mosu husi “aliansa” ida ne’ebé tau hamutuk de’it númeru mandatos husi partidu ki’ik sira atu bele forma Governu foun.

“Ita tenki buka atu reforsa lejitimidadi Governu ne’ebé ativu nian hodi bele permiti katak sei laiha interupsaun ka hakotu forsadu ba estabilidade governativa, tanba ida ne’e sei bele loke dalan ba alternánsia ne’ebé la normal no ita lakoi atu sai nu’udar prátika polítika iha nasaun ne’ebé sistema sofre hela krizi identidade, ne’ebé provoca tendénsia atu hamoris no hametin poder informal kontra poder formal,” subliña iha nota klarifikasaun.

Hatutan iha nota ne’e, atu konsistenti no koerenti ho hanoin ida ne’e maka, iha loron 21 fulan Marsu, FRETILIN no PLP hahu prosesu no hari Plataforma Entendimentu. FRETILIN halo parte ba ida ne’e ho knaar nu’udar partido bo’ot liu iha Timor-Leste, ho lejitimidadi ne’ebé husi votus povu iha eleisaun 2018, no PLP halo parti ho knaar nu’udar Partidu husi Primeiru Ministru VIII Governu Konstitusional nian.

Nune’e, liu husi nota entendimentu ida ne’e, klaru ona katak apoiu FRETILIN nian mai ho objetivu polítiku ida atu reforsa lejitimidadi VIII Governu Konstitusional nian no atu garanti estabilidade governativa to’o tinan 2023, no la’ós atu hari “Aliança” parlamentar atu bele forma Governu ida foun.

“FRETILIN ho nia lejitimidade mai atu habot no hametin lejitimidade VIII Governu atu hametin estabilidade governativa no ajuda hahu prosesu atu  hakotu impasse polítiku no loke dalan atu kuriji prátika ne’ebé discrimina malu la inklusivu no hahu vida no kultutura institucional foun iha República Democråtica de Timor-Leste – ita nia Estado de Direito Demokrático,” hatete iha nota klarifikasaun. (flo/cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 339
  • Page views today : 396
  • Total visitors : 77,715
  • Total page view: 108,861

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur