Notísia foun


DILI—Konsellu Polítika Nasionál (CPN sigla Portugués) Partidu CNRT deklara, ofisialmente retira husi governu daualu ne’ebé forma husi CNRT, PLP ho KHUNTO hafoin eleisaun antesipada 2018.

Desizaun ne’e fó sai hafoin iha loron 30/04/2020, halo ona reuniaun buka solusaun ba situasaun polítika rai laran no iha loron 8/05/2020 CPN kontinua halo reuniaun hodi aborda assuntu refere no reafirma desizaun sira mak hanesan, retira husi governu daualu no emite liberdade de eskoilla ba membru CNRT sira ne’ebé iha governu daualu ho opsaun katak, sira bele rejigna-an ou kontinua mantein iha governu maka lakon kedas lasus polítikus ho partidu.

Rejolusaun ne’e hetan aprovasaun ho unanimidade husi membru CPN-CNRT iha Sede Nasional CNRT iha Bairro dos Grilhos Dili, asina husi Vise Prezidente CNRT, Virgilio Smith no Adjuntu Sekretáriu Jerál Jacinto Rigoberto.

CNRT foti desizaun ne’e tanba konsidera iha manobra polítiku hahu kedas husi formasaun governudaualu ne’ebé Prezidente Repúblika Francisco Guterres Lú Olo la fó posse ba membru governu na’in-7 husi CNRT no kontinua mosu manobra polítiku iha desizaun Xefe Estadu nian ba prosesu formasaun governu dasia.

Maske nune’e, CNRT ezije nafatin ba Lú Olo atu kumpri nia orientasaun hodi hakotu impase polítika no bazeia ba nia orientasaun ho pontu tolu ne’ebé fó sai ona dia 10/02/2020.

CNRT mós nafatin tau kestaun ba legalidade governu daualu hafoin CNRT retira ona, laiha ona maioria iha governu daualu tanba iha aliansa ba forma governu ne’e hela deit PLP ho KHUNTO ho kadeira 13 deit. Nune’e, maske rona katak FRETILIN atu fó apoiu no nia membru sira atu tama tan iha governu daualu, maibe tenke liuhusi formasaun governu foun alias governu dasia.

“Tanba CNRT sai tiha ona husi governu, PLP ho KHUNTO la reprejenta legalmente maioria parlamentar,” Vise Prezidente CNRT, Virgílio Smith afirma liuhusi konferénsia ba imprensa, iha loron 11/05/2020, iha Sede Nasionál CNRT, Bairro dos Grilhos, Dili.

“CNRT hein katak, partidu tolu, FRETILIN, PLP ho KHUNTO sei halao ida-idak nia konferénsia nasional atu halao koligasaun foun ho difinisaun klara,” Virgílio subliña.

No husu ba Primeiru Ministru Taur Matan Ruak tenke retira husi Primeiru Ministru hodi nune’e bele iha fali indizitasaun foun husi koligasaun foun husi FRETILIN, PLP ho KHUNTO. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,675
  • Page views today : 2,453
  • Total visitors : 83,648
  • Total page view: 117,496

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur