Notísia foun


DILI-Deputadus sira husi Bankada Parlamentár PLP, FRETILIN ho KHUNTO, hatama tiha ona karta rekerimentu destituisaun meza Prezidente Parlamentu Nasionál, iha loron Tersa (05/05/2020).

Karta rekerimentu ne’e bazeia ba artigu 16-b husi rejimentu Parlamentu Nasional.

Hakerek iha karta ne’ebé Timor Post asesu haktuir argumenta sira katak, destituisaun ida ne’e sira hala’o tanba sira preokupa ho serbisu sira ne’ebé parlamentu hala’o ho Prezidente Parlamentu atual nia lideransa.

“Husi kedas inísiu V Lejislatura, parlamentu nasional hatudu ona defisiensia boot ida iha ninia funsionamentu, liuliu kona-ba elaborasaun no aprovasaun lejislasaun importante no nesesariu sira, pur ezemplu hanesan Lei Anti Korupsaun (ne’ebé diskuti ona liu tinan 2 maibé to’o agora seidauk finaliza), no mós sesaun plenaria sira parlamentu nian barak liu mak hala’o sein ajenda no iha deit períodu antes de orden do dia,” deputadu sira argumenta iha sira nia rekerimentu.

Kestaun hirak ne’e akontese tanba Prezidente Parlamentu Nasional lahatudu ninia kapasidade lideransa ne’ebé presiza atu okupa fatin ba lidera Orgaun Soberania ida ne’e.

“Sr. Arão Noe, Prezidente Parlamentu Nasional atual, la komporta nu’udar Prezidente husi Orgaun Soberanu ida ne’e, maibé komporta fali hanesan nia Presidente bankada CNRT, no tanba ne’e nia lakon ami nia komfiansa tan nia demostra falta de solidariedade institusional, espesialmente ho akontesimentu resente wainhira S.E. Prezidente Parlamentu Nasional partisipa iha reuniaun Konsellu de Estadu aprezenta pozisaun no opiniaun ida afavor ba renovasaun, hanesan prezidente husi orgaun ne’ebé ami hotu hola parte, liu deit loron balu iha plenaria parlamentu nasional nian, nia vota kontra tiha ninia pozisaun inisial kona-ba renovasaun Estadu Emerjensia,” deputadu asinante sira hatutan.

Nune’e mós, iha loron sira ikus ne’e, “ami verifika katak prezidente parlamentu nasional boikota funsionamentu parlamentu nasional nian hodi la konvoka reuniaun liders bankada semana liu ba kotuk, konsekuentemente, Parlamentu Nasional laiha plenaria iha Segunda no Terca (loron-4 no loron-5 fulan-Maiu tinan-2020).”

“Ida ne’e tentativa momós atu paraliza Parlamentu Nasional nia funsionamentu normal no tenta provoka krizi institusional ida atu dudu ba disolusaun orgaun ida ne’e no obriga atu hamosu eleisaun, tuir deklarasaun ne’ebe prezidente CNRT halo tiha ona.”

Ho razaun hirak ne’e, mak deputadu sira, liu husi sira nia karta rekerimentu, husu ba prezidente parlamentu nasional atu ajenda votasaun ba destituisaun ba Prezidente Parlamentu liu husi dalan votasaun sekretu iha sesaun plenaria parlamentu nian. (flo)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 1,250
  • Page views today : 1,788
  • Total visitors : 80,502
  • Total page view: 112,869

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur