Notísia foun


DILI—Reprejentante povu iha uma fukun Parlamentu Nasionál hamutuk na’in-18 maka asina petisaun kontra desizaun Prezidente Repúblika Francisco Guterres Lú Olo ne’ebé durante ne’e konsideradu mosu violasaun klara i grave liga ho situasaun polítika rai laran.

Petisaun ne’e liuhusi Advogadu Privadu Manuél Tilman ho Miguel Faria entrega tiha ona ba Tribunál Rekursu,  Tersa (05/05/2020).

Hafoin entrada petisaun insiál ba tribunál, via telefone ba Timor Post, Advogadu Miguel Faria subliña, petisaun ne’e deputadu sira mak asina nu’udar reprejentante povu kontra desizaun sira prezidente repúblika nian iha ne’ebé bainhira simu pose nu’udar xefe estadu jura katak kumpri konstituisaun no órden jurídiku sira ne’ebé estabelese iha RDTL.

“Tanba ne’e, haree ba aktu sira interior, prezidente repúblika nia desizaun la kondiz ho konstituisaun, maka deputadu sira reprejentante povu fó fi’ar ba advogadu sira hodi hala’o asaun petisaun inisiál no entrada iha tribunál rekursu,” Advogadu Miguel subliña.

Nune’e, Advogadu Miguel klarifika, petisaun ne’e reprejenta deputadus la reprejenta partidu.

“Asaun ida ne’e reprejenta deputadu la’ós reprejenta partidu,” Advogadu Miguel hatete.

Nune’e mós hafoin entrega petisaun ba Tribunál Rekursu, Advogadu Manuél Tilman afirma, Timor Leste nu’udar nasaun demokrátiku, hotu-hotu tenke kumpri lei inklui Prezidente Repúblika.

“Entaun ami mai iha ne’e (Tribunál Rekursu) tanba Prezidente Repúblika promete kumpri lei, maibé aktu Prezidente Repúblika nian seidauk responde ba Konstituisaun Repúblika Demokrátika Timor Leste,” Tilman subliña ba Jornalista sira iha edefísiu Tribunál Rekursu, Dili.

Entretantu antes ne’e Prezidente Partidu CNRT, Kayrala Xanana Gusmão deklara lori prosesu liga ho desizaun sira durante ne’e Prezidente Repúblika Francisco Guterres Lú Olo foti liga ho situasaun polítika iha rai laran ne’ebé konsideradu hamosu violasaun klara i grave ba obrigasaun konstitusional tuir artigu 79 (2).

Prosesu ne’e hanaran petisaun inisiál ba Tribunál Rekursu atu husu fiskalizasaun ba Tribunál Rekursu atu deklara katak iha duni violasaun klara ka la’e prinsípiu konstitusionais, liuliu liga ho desizaun la fó posse ba membru governu sira husi CNRT no prosesu sira to’o indizitasaun Primeiru Ministru ba governu dasia ne’ebé prezidente repúblika nonok tiha de’it iha dalan klaran.

Liuhusi konferénsia ba imprensa iha Sede Sentral CNRT, iha Bairro dos Grillhos, Dili, Kinta (30/04/2020), Xanana akompaña husi Advogadu Manuél Tilman ho Miguél Faria, Xanana afirma, atu defende lia loos no kaer metin nafatin estadu direitu demokrátiku maka prosesu ba tribunál rekusru.

“CNRT buka atu hatudu responsabilidade ba nasaun. Ita iha hela krize institusional,” Xanana hatete.

Xanana subliña istória sira harii governu Aliansa Mudansa ba Progresu (AMP) lideradu Taur Matan Ruak no hafoin eleisaun antesipada iha Parlamentu Nasionál mosu fali Aliansa Maioria Parlamentár ne’ebé haforsa governu daualu.

Xanana mós ko’alia kona-ba rajaun sira CNRT xumba Orsamentu Jerál Estadu (OJE) 2020, tanba la konforma ho normas, sistema finanseiru no ejekusaun.  Tanba ne’e, bainhira OJE xumbadu primeiru ministru rasik dehan governu AMP laiha ona. Nune’e, Prezidente Repúblika hola medida sira halo diálogu no iha solusaun tolu katak, últimu rekursu mak eleisaun antesipada, tuir halo movimentasaun polítika no mantein primeiru ministru governu daualu.

Xanana mós haktuir prosesu sira kontinuasaun to’o mosu koligasaun foun ida ne’ebé forma husi CNRT, KHUNTO, PD, UDT, FM ho PUDD, maibé ikus mai prezidente repúblika husik tia de’it prosesu hirak ne’e iha dalan klaran. (cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 508
  • Page views today : 662
  • Total visitors : 77,884
  • Total page view: 109,127

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur