Notísia foun


BAUKAU—Ema na’in-ida mate no na’in-tolu kanek kmaan iha akontesimentu dazastre uma lisan knua Auligia monu hanehan, iha loron Domingu (04/05/2020), bainhira família sira hala’o hela aktividade sau-batar derepenti  ai-rin tolu hosi ai-rin haat tohar.

Bainhira uma lisan ne’e tohar hanehan matebian ho naran Zacarias Fraga ho tinan hitu-nulu-resin-haat mate kedas iha fatin akontesimentu tanba ai-trabesa hanehan iha parte kabun no baku iha ulun fatuk.  Inkuantu na’in-tolu seluk hetan kanek no evakua kedas ba HoREX Baukau hodi hetan kuidadu intensivu.

Xefe Aldeia Loidua Suku Buibai Postu Administrativu Baukau vila Flaviano Ximenes da Silva Guterres, haktuir kronologia akontesimentu ne’e katak, hafoin matebian nu’udar lia na’in baku babadok maka’as iha uma okos hamosu vibrasaun akompana anin boot no derepente ai-rin uma kultura nian tolu tohar.

“Ami haree iha ai-rin tolu ne’e mak kulapur hotu, tuir ha’u nia haree bainhira kuandu sira baku babadok nakadoko akompaña ho anin hu’u bo’ot uitoan halo uma ne’e monu, iha sira na’in-haat nia leten, na’in-tolu kanek kmaan, maibé katua Zacarias Fraga mak mate liu,” Xefe Aldeia Loidua Flaviano ba Timor Post Segunda (4/5/2020) iha fatin akontesimentu.

Hafoin akontese xefe aldeia kontaktu kedas  Xefe Suku no parte seguransa (OPS) suku buibau, tún direita ba fatin akontesementu hodi haree ho matan. Nó iha domingu oras tuku ualu ho balun kalan no orienta família sira sobu uma refere hodi hasai mate isin hosi uma laran inklui vítima na’in tolu seluk.

Husi sorin seluk pontu fokal sala Emerzénsia HoREX Baukau Mario Belo, haktuir, vítima na’in tolu Duarte Alexandre Ximenes, Xisto Marcal no Evangelino  Ornai Neto  hetan trauma. No vítima hirak ne’e hafoin hetan tratamentu segunda dadersan alta ona husi ospital.

Iha tempu hanesan xefe departamentu asaun sosial munisípiu Baukau António do Nascimento Alves hatete, dadaun ne’e parte asaun sosiál munisípiu Baukau apoiu ona kaixaun ida ba matebian Zacarias Fraga bazeia ba pedidu husi autoridade suku Buibau.

“Autoridade suku Buibau haruka ona pedidu mai no vistu husi administrador postu administrative Baukau vila, ne’ebe ita apoiu ona kaixao ida, konaba apoiu seluk bainhira ita simu pedidu foun husi xefe suku mak ita apoiu tan”dehan António

Tuir informasaun mate isin la bele rai liu loron ida tanba situasaun estadu emergensia relasiona pandemia COVID-19 no tuir regra ministériu saúde ho organizasaun saúde mundial katak labele halibur ema barak. (gut)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,082
  • Page views today : 1,295
  • Total visitors : 37,966
  • Total page view: 52,293

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur