Notísia foun


DILI-Organizasaun jornalista rua hanesan Timor-Leste Press Union (TLPU) ho Asosiasaun Jornalista Timor-Leste (AJTL) hetan apoiu husi Uniaun Europeia (UE) iha Timor-Leste ho karregamentu pulsa ho valór $20 kada membru (jornalista) inklui maskara hamutuk 250 resin, liuhusi programa JERE OSAN POVU NIAN HO DI’AK (Gerir bem o dinheiro público).

Apoiu ne’e entrega simbolikamente husi Embaixadór UE iha Timor-Leste, Andrew Jacobs no reprezentante embaixadór Portugal iha Timor-Leste, Cristina Faustino ba Prezidente TLPU, Manuel Pinto ho nia omologu Zevonia Vieira, iha salaun Borja da Costa, travesa Sergio Vieira de Melo, domingu (03/05/2020).

Prezidente TLPU, Manuel Pinto agredese ba UE inklui Portugal liuhusi Camões-Instituto da Cooperação e da Língua, ne’ebé mak jere programa JERE OSAN POVU NIAN HO DI’AK, iha situasaun pandemia COVID-19 hodi fasilita di’ak liután jornalista timoroan sira hodi presta servisu ida di’ak liután ba públiku liuhusi oferese informasaun ne’ebé kredivel, rigór no izenta.

“Iha Timor-Leste Press Union, ami komunga prinsípiu fó sai informasaun tenke eduka,” Ezekutivu TLPU, Manuel Pinto friza durante nia intervensaun molok simu simbolikamente apoiu pulsa no maskara husi UE no reprezentante embaixada Portugal ba TLPU no AJTL perante profisionál komunikasaun sosiál sira hotu.

“Eduka oinsá mak sosiedade ida ne’e komprende COVID ne’e saida? Oinsá nia prevensaun? i ajuda mós oinsá fó informasaun ba públiku kona-ba se ema ruma kona karik COVID saida mak nia tenke halo? Ida ne’e mak sai hanesan ami (TLPU) nia misaun sagradu iha kobertura lorloron”.

Manuel Pinto, iha biban hanesan, rekoñese katak informasaun ne’ebé jornalista sira oferese ba públiku seidauk bele atinji ba públiku tomak tanba jornalista bainhira fó informasaun la depende mesak ba kapasidade jornalista ninian atu fó informasaun maibé depende mós ba oportunidade ne’ebé mak iha atu fasilita jornalista sira ho materiál sira ne’ebé mak iha.

Iha kontestu ida ne’e, moras COVID ne’e mosu iha mundu halo ema hotu atrapalla. Bainhira Estadu no Governu estabelese tiha CIGC (Sentru Integradu ba Jestaun Krize, sigla Portugés) fasilita tebes jornalista sira tanba atualiza dadus informasaun kona-ba COVID-19 ne’e rasik iha Timor-Leste, tantu liuhusi plataforma media hanesan jornál, televizaun no rádiu no mós online sira hotu.

Prezidente Manuel Pinto mós espera katak apoiu ida ne’e la’ós to’o de’it iha biban ne’e maibé buka esplora mós oportunidade seluk no kria tan programa seluk hodi kolabora malu nafatin ba oin.

“Ami hein katak tulun ne’e la to’o iha COVID ne’e de’it maibé ita sei esplora nafatin oportunidade seluk atu konsensializa, eduka ita-nia sosiedade liuliu povu Timór nu’udar sidaudaun saida mak bele kontribui ba nasaun no dezenvolvimentu nasaun nian; sira mós iha dever alende direitu”.

Iha fatin, hanesan prezidente AJTL, Zevonia Vieira agradese mós apoiu ne’ebé mak disponibiliza husi UE ba jornalista timoroan sira iha situasaun pandemia COVID-19 ne’e hodi hamenus sira-nia difikuldade sira hodi fasilita informasaun ba públiku hodi bele iha kumprensaun kona-ba COVID-19 ne’e rasik.

Enkuantu, perante membru no estrutura TLPU no AJTL, embaixadór Andrew Jacobs hateten, iha kontestu COVID-19 no Estadu Emerjénsia iha Timor-Leste, media sira iha papel importante tebes atu garante diseminasaun atualizadu ba informasaun loos ba públiku. Jornalista sira iha funsaun importante tebes atu kombate pandemia globál ida ne’e.

Jornalista sira presiza halo relatóriu ida mak loos atu kombate informasaun falsu barak mak sirkula kona-ba coronavirus, espesialmente husi media sosiál. Ida ne’e aumenta inseguransa, ansiedade, prekonseitu no rasismu. Ita tenke serbisu hamutuk atu hapara ida ne’e. Agora importante liu jornalista sira halo sira-nia serbisu ho liberdade no loos atu kontra informasaun la loos no notísia falsa, atu garante sidadaun sira hetan asesu ba informasaun importante no konfiansa.

Maibé iha tempu ida mak presiza tebes jornalista sira, barak mak lakon sira-nia rendimentu tanba iha korte ba saláriu sira no atrazu ba pagamentu sira, buat sira ne’e tanba redusaun ba ekonomia no restrisaun sira husi estadu emerjénsia.

Tanba ida ne’e, atu marka loron Mundiál ba Liberdade Imprensa, Uniaun Europeia no Camões, I.P., ho akordu husi Asosiasaun Jornalista sira no Uniaun Jornalista sira Timor-Leste, bele fó daudaun ba jornalista sira pulsa ba telefone, pulsa 20 USD ba ema ida, atu ajuda selu internet no komunikasaun sira no maskara 250 mak importante tebes ba sira-nia serbisu.

No mós, husi “OSAN POVU NIAN JERE HO DI’AK Uniaun Europeia no Camões I.P. sei ajuda atu proteje jornalista na’in 140 nia subsisténsia ba fulan tolu tuir mai, atu suporta mós ho estájiu, fó mós apoiu finanseiru ba produsaun no publikasaun ba artigu sira, no mós sosa fatin publisidade.

Iha loron Mundiál ba Liberdade Imprensa, Uniaun Europeia sente orgullu tebes atu apoia jornalista timoroan sira liuhusi inisiativa “Osan Povu Nian” iha tempu difisil ida ne’e. Situasaun ekonómiku ne’ebé difisil mak rezulta husi COVID-19 signifika katak jornalista sira-nia subsisténsia hetan ameasa bo’ot iha tempu ida mak ita presiza liu sira”.

“Jornalista sira presiza meiu sira hodi reporta loloos no atualizadu atu nune’e públiku bele hetan informasaun kona-ba COVID-19, oinsá atu proteje sira-nia aan rasik no ema sira ne’ebé sira hadomi, no oinsá ninia kombate hala’o daudaun. Laiha tempu ida mak importante liu ba media livre no independente la’ós deit atu moris, maibé atu mós dezenvolve. Jornalizmu independente mak importante liu atu fó ba públiku asesu ba informasaun loos no atu kontra informasaun la loos kona-ba pandemia ida ne’e,” Andrew Jacobs dehan.

Entretantu, asiste serimónia entrega pulsa no maskara símbolika ne’e asiste direta husi membru definitivu inklui ezekutivu sira husi TLPU no AJTL. (*)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,232
  • Page views today : 2,063
  • Total visitors : 74,164
  • Total page view: 103,321

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur