Notísia foun


DILI—Deputada husi bankada KHUNTO Olinda Guterres husu ona deskulpa relasiona ho akujasaun falsu ne’ebé nia rasik espalla kona-ba ameasa hasoru Konsilleru Máximu Partidu KHUNTO José da Costa Naimori Bucar.

Via telefone ba Sekretáriu Jerál Partidu CNRT, Jacinto Rigoberto, Deputada Olinda hatete, saida mak nia ko’alia iha reuniaun líder bankada antes ne’e katak Jacinto Rigoberto ho grupu ida armadu ba halo ameasa iha rejidénsia Bou Naimori, ne’e nia “naran ko’alia de’it”.

“Akujasaun falsu ne’e implika tebes ba ha’u no ba ha’u nia família nia situasaun. Pániku no iha trauma nia laran, mezmu-ke Distinta Deputada Olinda iha sábadu dader telefone ha’u hodi husu deskulpa, katak, nia ko’alia iha enkontru líders bankada ne’e naran ko’alia de’it, tan rona husi ema, no nia iha hela kondisaun saúde ne’ebé mak ladun di’ak,” Jacinto haktuir ba Jornalista sira iha Sala Bankada CNRT, iha uma fukun Parlamentu Nasionál, Tersa (28/04/2020).

Akujasaun ne’ebé Deputada Olinda lansa no deputadu sira husi FRETILIN mós konsumu no halo deklarasaun iha plenária bainhira debate pedidu estensaun estadu emerjénsia, katak, Jacinto ho grupu ida ne’e ba Bou Naimori nia uma, tau foupa ninja hamutuk ho ema na’in-haat, ho kilat, uza karreta pickup, laiha xapa matríkula.

“Ha’u rejeita no lamenta tebes ho akuzasaun falsu ne’e,” Jacinto afirma.

Nia dehan, ho akuzasaun falsu ne’e halo públiku no iha media sosial ema balun ne’ebé iha diferénsia polítika aproveita julga no halo atake ba nia pesoal, partidu CNRT rasik, no sobu unidade iha koligasaun foun ne’ebé KHUNTO mós hola parte ba.

Jacinto haktuir, iha Kinta dader (23/04/2020) nia ba duni iha Bou Naimori nia uma, maibé ba ho nia karreta rasik no xapa matríkula kompletu hodi halo komunikasaun no koordenasaun tanba KHUNTO nu’udar partidu ida neebé formalmente hamutuk ho partidu lima seluk iha AMP laran.

“Ha’u la’ós ba halo komunikasaun hodi sobu fali partidu seluk nia aliadu. Durante hasoru Bou Naimori, ami ko’alia iha ambiente ne’ebé amigavel, iha ámbitu iha AMP nia laran hanesan baibain,” Jacinto haktuir.

Tanba ne’e, nia husu ba Deputada Olinda atu klarifka fali ba públiku kona-ba informasaun no akujasaun falsu ne’e, tanba nia hatutan, laiha lójika ba nia ho CNRT rasik ba ameasa fali KHUNTO ne’ebé mak hamutuk hela iha AMP nia laran.

To’o notísia ne’e públika, Timor Post seidauk konsege halo konfirmasaun ho Deputada Olinda.

Entretantu Vise Xefe Bankada CNRT, Patrosinio Fernandes husu ba Ministériu Públiku no Polísia Nasionál Timor Leste atu halo investigasaun ba misaun no objetivu husi kazu ida ne’e, ne’ebé tuir CNRT hanesan tentativa ba harahun unidade iha koligasaun foun ne’ebé CNRT, KHUNTO,PD, UDT, FM no PUDD froma ona.

Vise Xefe Bankada CNRT ne’e mós husu ba Deputada Olinda atu klarifika ba públiku sobre informasaun falsu ne’e atu labele husik hela konfuzaun. (cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 169
  • Page views today : 236
  • Total visitors : 80,836
  • Total page view: 113,364

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur