Notísia foun


DILI—Timor Leste rejista iha loron Kuarta (15/04/2020) pasiente ne’ebé konfirmadu pozetivu ba moras da’et corona alias COVID-19, sa’e ba na’in ualu inklui sidadaun estranjeiru ne’ebé rekopera ona iha loron 10/04/2020.

Porta-Vóz Sentru Integradu Jesaun Krize, Sérgio Lobo haktuir, atualmente pasiente pozetivu na’in hitu mak asegura hela iha sala izolamentu Vera Kruz, Dili.

Pasiente na’in hitu ne’e, na’in ida tama iha loron 10/04/2020, na’in rua tama iha loron 13/04/2020, tuir fali na’in rua tama iha loron 14/04/2020 no na’in rua tama iha loron 15/04/2020.

Pasiente hirak ne’e iha istória viajen no kontaktu ida de’it. Na’in ualu sa’e hamutuk Travel husi Kupaun to’o Batugade. No kontinua husi Batugade ba Dili sae karreta Bis hamutuk ho pasajeiru seluk ne’ebé mai hotu husi Kupaun hamutuk ema na’in 21 no ba hela hamutuk iha fatin kuarentena Hotel Katuas, Dili, iha loron 1/04/2020.

Doutór Sérgio haktuir, to’o loron 15/04/2020 iha oras 12:00 rekolla dadus, total ema ne’ebé sei iha kuarentena hamutuk 569, inklui iha Dili hamutuk 456 no iha munisípiu sira hamutuk 113. Suspeitu ne’ebé halo ona teste 210, na’in neen kazu provavel, na’in 31 sei hein rejultadu, na’in 167 mak negativu no na’in ualu pozetivu inklui ida ne’ebé rekopera ona.

Iha oportunidade, Doutór Sérgio mos haktuir, husi dadus iha leten inklui mós ona teste ba kondutór na’in rua no ajudante na’in haat ne’ebé ministériu saúde aluga tula pasajeiru sira husi Batugade ba Dili iha loron 01/04/2020.

Doutór Sérgio husu ba públiku liuliu família afetadu sira atu labele pániku tanba pasiente na’in hitu dadauk iha izolamente ho kondisaun di’ak hela.

“Husu ba populasaun atu labele pániku. Husu atu konfia nafatin ba governu liuliu ministériu saúde. Kazu sira ne’ebé pozetivu ne’e husi grupu ida de’it,” Doutór Sérgio hatete. (cao)

Please follow and like us:

NOTÍSIA FOUN

Site Statistics

  • Users online: 6 
  • Visitors today : 1,235
  • Page views today : 2,067
  • Total visitors : 74,167
  • Total page view: 103,325

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur