Notísia foun


DILI—Prezidente Repúblika Francisco Guterres Lú Olo, iha loron 15/04/2020, manda karta ba Primeiru Ministru Taur Matan Ruak hodi afirma nia aseitasaun ba desizaun retira hikas pedidu demisaun ne’ebé hatama iha loron 24/03/2020.

Iha loron 08/04 2020, Primeiru-Ministru deklara katak ba Prezidente Repúblika kona-ba moras COVID- 19 no medida sira ne’ebé Governu implementa ona atu moras ne’e labele hadaet babeibeik iha Timor-Leste. No dada-sai fali karta pedidu demisaun husi Primeiru-Ministru.

Nune’e, tuir komunikadu ba imprensa ne’ebé Timor Post asesu haktuir, Prezidente Repúblika haruka ona karta ba Primeiru-Ministru katak aseita Primeiru-Ministru dada-sai karta pedidu demisaun ne’e.

Iha komunikadu ne’e, haktuir, kona-ba artigu 112°, alínea b) Konstituisaun RDTL, kompete ba Prezidente Repúblika simu ka la simu pedidu demisaun husi Primeiru-Ministru.  Kompete mós ba Prezidente Repúblika, aseita ka lae pedidu dada-sai pedidu demisaun husi Primeiru-Ministru, bainhira Prezidente Repúblika seidauk foti desizaun kona-ba pedidu demisaun.

Liu husi karta ne’e, Prezidente Repúblika reafirma katak Primeiru-Ministru sei hala’o nafatin ninia knaar baibain ho efeitu konstitusional  no legál hotu-hotu.

Prezidente Repúblika hatete mós katak sei fó kolaborasaun institusional ne’ebé presiza atu Primeiru-Ministru bele hala’o ninia mandatu nu’udar Xefe Ezekutivu, atu asegura funsionamentu regular VIII Governu Konstitusional, tuir ita-nia Konstituisaun Repúblika.

Hasees-an husi COVID -19  no asegura rekuperasaun husi efeitu aat husi inundasaun Dili iha 13 marsu 2020 tama iha ámbitu interese nasional, Prezidente afirma. Iha mós karta ne’e, Prezidente Repúblika deklara katak Estadu Timor-Leste presiza prepara no hahú rekuperasaun ekonómika no sosiál. Husi asuntu interese nasional sira ne’e mak Prezidente Repúblika konfirma nesesidade atu asaun governativa husi Primeiru-Ministru no VIII Governu Konstitusional kontinua nafatin. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 522
  • Page views today : 681
  • Total visitors : 77,898
  • Total page view: 109,146

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur