Notísia foun


DILI—Iha semana daruak fulan Abril to’o Domingu (12/04/2020) ema hamutuk na’in neen maka tama klandestinamente husi fronteira terrestre.

Husi ema na’in hirak ne’e, na’in rua tama to’o tiha Dili maka autoridade sira foin hetan informasaun no foti medida hodi ba lori husi sira nia uma ba hatama iha kuarentena.

Fonte kredivél Timor Post ne’ebé akompaña prosesu ne’e haktuir, ema na’in rua ne’e tama husi fronteira to’o iha Dili ba tiha ona ho sira nia família maka polísia foin rona hodi ba toma medidas.

“Ita preokupa tanba sira tama mai illegal. Maibé la ho moras di’ak, se ho moras ita bele mate hotu. Di’ak liu maka sira tenke ba para iha kuarentena atu nune’e parte saúde bele halo teste no kotrola sira nia saúde di’ak loos mak sira bele fila,” fonte ne’e haktuir.

Relasiona ho ema tama klandestinamente husi fronteira, Porta-Vóz Sentru Intergradu Jestaun Krize (SIJK) Doutór Sérgio Lobo liuhusi konferénsia ba imprensa, iha loron Domingu (12/04/2020) haktuir, ema hirak ne’ebé tama klandestinamente ne’e Forsa Tarrefa Intervensaun Rápida foti kedas medida adekuada hodi lori kedas sira ba iha fatin kuarentina.

Doutór Sérgio dehan, preparasaun SIJK nian atu responde ba posibilidade sira ba entrada klandestina, husi fronteira terrestre di’ak no metin tebes.

“Polísia Unidade Fronteira halo patrullamentu ororas no autoridade komunitáriu sira hetan ona instrusaun klara atu apoia iha prosesu ne’e tomak,” Doutór Sérgio subliña.

Entretantu dadus kumulativamente, hahú husi 6 Abril Timor Leste rejista suspeitu hamutuk 116.

Iha loron 11/04/2020 iha suspeitu hamutuk 64, no iha loron 12/04/2020 aumenta tan suspeitu 52.

Husi teste laboratórium ba suspeitu 116 ne’e, na’in rua mak pozetivu hanesan fó sai ona ida nu’udar sidadaun estranjeiru rekopera ona no timoroan feto ida mak hal’o hela tratamentu iha sala izolamentu iha Sentru Saúde Vera Kruz, Dili.

Menus na’in rua rejista hanesan kazu ne’e, sura ba total suspeitu 114. Husi númiru ne’e, rejultadu teste laboratóriu fó sai ema na’in 52 mak negativu, no na’in 62 mak sei hein rejultadu.

Doutór Sergio hatete, kazu rua ne’e importadu hotu. Signifika, nia dehan, seidauk iha trasmisaun lokal.

“Kazu rua ne’e importadu. Ne’e signifika katak iha rai laran seidauk iha transmisaun lokál. Ita husu barak ba Nai Maromak atu ita kontinua ho situasaun ida ne’e,” Doutór Sérgio subliña.

Maibé nia dehan, husu tulun ba Maromak maibé timoroan hotu mós tenke tulun atu la’o tuir regra sira hotu ne’ebé fo sai ona husi parte saúde no kumpri estadu emerjénsia atu virus da’et ne’e labele akontese iha Timor hanesan rai seluk iha mundu.

Halo izolamentu ba ema sira ne’ebé presiza halo izolamentu, primeiro atu fó atendimentu di’ak liu ba sira, Segundo importante liu tan atu evita moras ne’e hada’et ba ema seluk. (cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 1,406
  • Page views today : 2,372
  • Total visitors : 74,338
  • Total page view: 103,630

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur