Notísia foun


DILI—Ministr Reforma Lejislativa i Assuntu Parlamentar, Fidelis Leite Magalhães fó atensaun ba jornalista sira atu kuidadu bainhira halo intrepretasaun ba desizaun sira governu nian kona-ba implementasaun estadu emerjénsia.

“Ezemplu ida mak notísia kona-ba medida sira ne’ebé gvernu foti ona to’o agora. Iha televizaun sempre dehan katak antes ne’e governu desidi ona taka atividade komersiál sira. Maibé, realidade iha dekretu la dehan ida ne’e,” Fidelis hakerek iha nia pájina Facebook, iha loron Sexta (10/04/2020).

Fidelis klarifika, dekretu governu nian dehan atividade komersiál sira, inklui vendedor ambulante sira, sei la’o normal maibé tenke implementa rekejitu hygiene nian hanesan fase liman beibeik, uza maskra, hala’o distánsia sosial no seluk tan.

Entretantu governante ne’e afirma, husi semana oin ba oin governu sei hatun regra foun sira ne’ebé sei tos liu tan bazeia ba rekomendasaun husi tékniku espesialista sira.

Fidelis la temi regra foun ne’ebé sei aplika iha parte ne’ebé, maibé subliña, bainhira timoroan sira hamutuk sei manan. “Hamutuk Ita Sei Manan,” Fidelis dehan.

Iha parte seluk, antes ne’e Fidelis mós halo klarifikasaun kona-ba apóiu governu nian ba uma kain sira no ba trabalhador sira katak, nia rasik foin halo aprejentasaun ba Konsellu Ministru hafoin rekolla proposta husi liña ministerial sira no seidauk hetan aprovasaun.

“Ami tenke ajusta regulamentu no aumenta tan pontu balun, mak sei apresenta fali hodi halo desizaun iha reuniaun Konsellu Ministru semana oin,” Fidelis klarifika hafoin nia halo aprejentasaun iha Konsellu Ministru iha loron Kinta (09/04/2020).

Maske nune’e, tuir observasaun Jornalista Timor Post iha terrenu, autoridade lokál balun halo ona lista ba komunidade sira relasiona ho informasaun katak governu sei fó subsísiu ba kada uma kain ho total osan Dolar Amerikanu Atus Ida ($100) iha fulan ne’ebé Timor Leste aplika estadu emerjénsia.

Situasaun ne’e hamosu konfuzaun iha públika liuliu foin sa’e sira ne’ebé seidauk forma família maibé hela ketak husi família seluk. Nune’e mós funsionáriu públiku no privadu sira bele hetan hotu subsídiu ne’e ka lae.

Governu Timor Leste liuhusi Ekipa Informasaun Jestaun Krize deklara rejista pasiente pozetivu ba virus corona (COVID-19) sa’e ba na’in rua, inklui timoroan na’in ida no seluk sidadaun estranjeirunu’udar pasiente dahuluk ne’ebé rejista no Timor Leste deklara iha loron 21 Marsu 2020.

Iha loron Kinta (09/04/2020), sidadaun estranjeiru ne’e alta husi sala izolamentu tanba rekopera ona. No iha loron hanesan rejultadu teste ba timoroan ida nu’udar estudante ne’ebé foin fila husi Indonézia liuhusi fronteira rai iha loron 1/04/2020 hetan estatutu pozetivu ba virus perigozu ne’e.

Porta-vóz Ekipa Inforasaun Jestaun Krize, Sérgio Lobo informa ba Jornalista sira, Sexta (10/04/2020) katak,  pasiente pozetivu timoroan ne’e evakua ona ba sala izolamentu iha Sentru Saúde Vera Kruz, Dili.

Tuir informasaun pasiente pozetivu timoroan ho identidade feto ida ne’e tama iha karantina Hotel Katuas. Durante tama husi fronteira Mota-Ain ekipa sir aba tula hodi tama ba kuarentena nia halo kontaktu ho ema barak iha kuarentena laran no simotoan seluk ne’ebé sira halo viajen hamutuk husi Indonézia mai Timor Leste.

Maske nune’e, Doutór Sérgio Lobo klarifika, nia parte halo ona identifikasaun ba ema hotu ne’ebé durante ne’e halo kontaktu ho pasiente ne’e no sei halo teste ba sira.

“Maibé durante iha karantina nia hela mesak iha kuartu ida,” Doutór Sérgio subliña.

Entretantu Xefe Estadu Maior Jenerál FALINTIL-Forsa Defeza Timor Leste (F-FDTL), Maijor Jenerál Lere Anan Timur afirma, moras da’et corona (COVID-19) la’ós krize militár no polítika maibé entre moris no mate. Tanba ne’e líder máximu forsa armada ne’e husu atu timoroan tomak tenke kuidadu.

“Agora ita labele halimar ho situasaun ida ne’e purke dala ruma ita tauk direitu umanu, kazu ida agora ne’e la’ós krize militar ka krize politika maibé krize entre vida ho mate, tanba ne’e ha’u husu ba komunidade atu kompriende situasaun,” Lere subliña ba jornalista sira hafoin Timor Leste deklara rejista pasiente virus corona sa’e ba ema na’in rua.

Iha Sentru Konvensaun Dili (CCD sigla Portugués) Lere mós partisipa iha reuniaun kona-ba implementasaun regra estadu emerjénsia. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 687
  • Page views today : 1,009
  • Total visitors : 73,619
  • Total page view: 102,267

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur