Notísia foun


DILI—Eis Membru Asembleia Konstituinte nu’udar mós Jurista Senior Timoroan Manuel Tilman afirma, ho Primeiru Ministru Taur Matan Ruak nia desizaun retira pedidu demisaun husi Prezidente Repúblika Francisco Guterres Lú Olo, hatudu sinál negativu iha relasaun (kazamentu) alias asinatura plataforma entendimentu polítiku entre PLP ho FRETILIN.

Tanba, Tilman hatete, Taur nia desizaun ne’e loke dalan ba mosaun sensura husi koligasaun foun lideradu Kayrala Xanana Gusmão ho baze artigu 112 (d). Katak, bainhira mosaun sensura aprovadu governu daualu monu, governu dasia mosu bele mai husi koligasaun foun tanba atinji maioria parlamentár ho kadeira 34 ou rejultadu husi eleisaun antesipada.

Entretantu plataforma ne’ebé PLP (8) ho FRETILIN (23) asina iha loron 21/03/2020, iha Hotel Timor, Dili, la’ós hanesan aliansa maioria parlamentár ida (tanba iha de’it kadeira 31) maibé atu loke dalan ba governu dasia, maibé mós iha pontu seluk hatete mantein governu daualu.

Inkuantu koligasaun foun iha kadeira 34 husi CNRT (21), PD (5), KHUNTO (5), UDT (1), FM (1) no PUDD (1).

Tanba ne’e, Tilman dúvida ho rajaun polítika husi Taur retira pedidu demisaun tanba iha presaun ruma hatudu koligasaun PLP ho FRETILIN sei la funsiona ba oin.

“Karik nia (Taur) retira, mosaun sensura iha parlamentu nasionál koligasaun ne’ebé Xanana Gusmão nian hatán ba ne’e bele halo mosaun sensura,” Tilman subliña maibé dehan retira karta demisaun la viola regra, maibé dalan atu hamosu fali governu foun só bele mosu hosi aliansa maioria parlamentár ida ou rejultadu husi eleisaun antesipada.

Como governu ida foun ne’e, governu ida uluk parte importante hola parte hosi CNRT, ida ne’e agora ho porsentu 34 bele halo mosaun sensura, halo to’ok mosaun sensura mak ita hodi haree, rezultadu final tenke iha maioria kualifikada,” Tilman hatutan.

“Primeiru ministru ida be hatama tiha karta demisaun tuir mai hasai fali demisaun ne’e ita iha ne’ebé mak ida ne’e, see hanesan partidu Xanana nian bele hatama mosaun sensura, mosaun sensura ne’e mak liu hosi parlamentu nasionál governu tenke monu duni,”  nia reafirma.

“Mosaun sensura ne’e hanesan luta polítika ne’ebé sériu, katak tenke debate duni iha parlamentu nasionál, sasán ida ne’ebé monu hanesan agora mak hatama tiha pedidu demisaun ikus retira fali tama fali ba mosaun sensura, ita ba defende an fali katak ha’u iha maioria parlamentu nian, see Xanana mak hatama mosaun sensura, ne’e (Taur) difisil atu mosu iha parlamentu atu defende nia an,” Tilman salienta.

Entretantu Primeiru Ministru Taur Matan Ruak retira tiha ona nia pedidu demisaun husi Prezidente Republika Francisco Guterres Lu Olo ho rajaun tanba ho situasaun atual atake virus corona (COVID-19) presiza timoroan hotu liuliu nia hanesan Primeiru Ministru atu halo servisu maka’as liu tan.

Taur afirma kestaun ne’e hafoin hala’o enkontru ho Prezidente Republika Francisco Guterres Lu Olo iha Palasiu Prezidensial, Bairro-Pite, Dili, Kuarta (08/04/2020.

Antes ne’e Primeiru Ministru Taur Matan Ruak aprejenta karta demisaun ka rejignasaun ba Prezidente Repúblika Francisco Guterres Lú Olo, iha loron Tersa (25/02/2020), iha Palásiu Prezidensiál Nicolau Lobato, Bairro-pité, Dili.

Taur hatete, nia foti desizaun ne’e tanba ejijensia politika iha rai laran inklui iha ona koligasaun foun ne’ebe atu forma governu dasia. (tp)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 528
  • Page views today : 696
  • Total visitors : 77,904
  • Total page view: 109,161

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur