Notísia foun


DILI—Sekretáriu Estadu Komunikasaun Sosiál (SEKOMS) Mericio Akara konsidera asaun husi Ministra Saúde Interina no Vise Ministra ba Kuidadu Saúde Primária, Élia Antonia dos Reis Amaral fó informasaun ba públiku ne’e individuál.

“Legalmente situasaun emerjénsia agora komandu direita husi primeiru ministru. Laiha tan komandu A ou B, instrusaun ba ema ida (Dr. Rui Araújo) atu fó sai informasaun, ida agora MS ne’e asaun individual,” Akara afirma kestaun ne’e relasiona ho membru Sentru Integradu Jestaun Krize (SIJK), Doutór Rui Maria de Araújo dirize konferénsia ba imprensa, iha loron Kinta (02/04/2020) hodi fó sai dadus kona-ba suspeitu ba COVID-19 hahú husi fulan Feverieru to’o agora hamutuk 35, inkuantu Ministra Saúde Interina no Vise Ministra ba Kuidadu Saúde Primária, Élia Antonia dos Reis Amaral, iha loron hanesan fó sai katak suspeitu hamutuk 23, pozetivu nafatin na’in ida iha faze rekoperasaun.

Akara hatete, Governu lideradu Primeiru Ministru Taur Matan Ruak (TMR) estabelese tiha ona SIJK lidera rasik husi Primeiru Ministru. Nune’e, nia dehan, gabinete husi SIJK maka iha kompeténsia tomak atu anunsia informasaun ba públiku.

Maske nune’e, Élia defende katak, SIJK nu’udar ekipa tékniku ne’ebé hala’o de’it servisu, maibé informasaun hotu-hotu tenke fó sai ofisialmente husi Ministériu Saúde.

“Ba iha asuntu tékniku ami mak apoiu ida ne’e sei responsabilidade ba ida ne’e, hanesan mós ha’u hatene ona katak, konsidera ba iha Laboratóriu Nasionál ne’ebé mak hola parte ba iha Ministériu Saúde no ha’u mak relata informasaun ne’ebé mak iha. No dadus sira ne’e tenke foti husi Ministériu Saúde, ida ne’e mak importante liu.” Élia subliña.

Tuir observasaun Jornalista Timor Post, situasaun iha salaun sentru mídia ba COVID-19 iha CCD, iha loron hanesan lori minutu de’it mosu konferénsia ba imprensa husi autoridade na’in tolu ho asuntu hanesan maibé dadus la hanesan.

To’o notísia ne’e públika Timor Post seidauk hetan konfirmasaun husi Primeiru Ministru Taur Matan Ruak kona-ba

Estrutura SIJK

Entretantu Primeiru-Ministru iha loron 31/02/2020 despaisu ida, númeru 015/PM/III/2020, hodi nomeia estrutura ba SIJK mak hanesan tuir mai:

1. Brigadeiru Jenerál, João Miranda “Aluk”, atuál Diretór CIGC nu’udar 2º Komandante Operasionál.

2. Kapitaun Mar e Guerra, Pedro Klamar Fuik atuál Diretór Institutu Defeza Nasionál (IDN), nu’udar Estadu Maiór Koordenadór

3. Sérgio Lobo, Eis Ministru Saúde, nu’udar Koordenadór ba Forsa Tarefa ba Prevensaun no Mitigasaun ba Pandemia Covid-19.

4. Rui Maria de Araújo, eis Primeiru-Ministru no eis Ministru Saúde, nu’udar Koordenadór Ligasaun Ofisiál ba Forsa Tarefa.

5. Francisco Guterres, eis Sekretáriu Estadu Seguransa, nu’udar Koordenadór ba ekipa Estudu no Análize Risku.

6. Aurélio Guterres, eis Ministru Negósiu Estranjeiru no Kooperasaun, nu’udar Koordenadór Destakamentu Reasaun Rápida.

7. Dionísio Santos, Gabinete Primeiru-Ministru, nu’udar Koordenadór Administrasaun no Finansa.

8. José da Costa, atuál Prezidente Agência Tatoli.IP, nu’udar Koordenadór ba Unidade Informasaun Públika.

9. Afonso Henriques Corte-Real, Xefe Gabinete Primeiru-Ministru, nu’udar Ligasaun Ofisiál ba Komandu Operasionál (Primeiru-Ministru).

10. Nuno Machado Reis, asesór jurídiku Gabinete Primeiru-Ministru nian nu’udar Asesór Jurídiku ba Sala Situasaun.

PM Taur rasik hanesan Komandante Operasionál ba Sala Situasaun Hosi Sentru Integradu ba Jestaun Krize.  sé mak iha liu kompeténsia atu anunsia informasaun kona-ba COVID-19 iha Timor Leste ba públiku liuhusi mídia. (jry/cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 778
  • Page views today : 1,170
  • Total visitors : 73,710
  • Total page view: 102,428

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur