Notísia foun


DILI —Impaktu husi atake virus corona ka COVID-19 iha mundu rejulta Timor-Leste nia investimentu monu maka’as ho montante Biliaun U$1.8.

Ministra Finansa Ein-Ezersísiu atuál Vise-Ministra Finansa, Sara Lobo Brites, rekoñese Timor-Leste nia karteira investimentu liuliu iha asaun (saham) hanesan Bonds no Equity ne’e monu tanba merkadu finanseira internasionál afetadu ho situasaun COVID-19.

MAske nune’e, governante ne’e hatete ema hotu-hotu akompaña presu minarai mós monu ne’ebé afeta tebes ba Timor-Leste nia reseita ba fundu minarai.

Vise-Ministra Finansa ne’e argumenta, karteira investimentu ne’e Timor-Leste halo investimentu ba tempu naruk entaun impaktu negativu sira-ne’e lalika hanoin atu muda fali karteira investimentu.

“Ita mantein hanesan ne’e tanba ita nia investe iha merkadu asaun ninia volatilidade ne’e aas katak loron ida tún no semana ida sa’e fila-fali maibé kuandu situasaun ne’e normál nia rekupera fila-fali . Ida ne’e la signifika ita muda ninia karteira investimentu”, dehan Sara Lobo Brites,  ba jornalista sira iha Sentru Konsensaun Dili (CCD-sigla portugés), Sabadu (28/03).

Ministra Finansa Ein-Ezersísiu ne’e esplika, invstimentu asoens iha Bonds no Equity ne’e monu ne’e afeta merkadu hotu-hotu la’ós Timor-Leste de’it.

Ministra Finansa Ein-Ezersísiu responde asuntu ne’e hodi fó resposta ba Governadór Banku Sentrál Timor-Leste (BCTL-sigla portugés), Abrão Vasconselhos, hatete valór fundu minarai lakon kuaze biliaun $1.8 tanba kauza hosi merkadu finanseira internasionál.

Antes ne’e Governadór Banku Sentrál, Abrão Vasconselhos dehan, asuntu ne’e bainhira hamutuk ho Ministra Finansa Ein-Ezersísiu, Sara Lobo Brites, hala’o audiénsia ho Komisaun C (Finansa Públika) ligadu ho pedidu urjénsia ba autorizasaun transferénsia extraordinária hosi fundu petrolíferu, iha plenária Parlamentu Nasionál, sesta ne’e.

Governadór BCTL ne’e hatete, infelismente períodu semana tolu ka haat ikus ne’e dezenvolvimentu iha merkadu finanseira internasionál ne’e iha impaktu boot tebes hosi coronavirus no fatór sira seluk

“Ita iha queda (monu) signifikante tebes iha ita-nia valór fundu petróleu. Banku Sentrál sei publika relatóriu loron 10 abríl mas iha fatin ida-ne’e (Parlamentu Nasionál) ha’u kompartilla uitoan ho ita boot sira to’o iha semana kotuk ne’e ita-nia fundu ne’e ninia valór lakon kuaze  Biliaun 1.8 de dolares tanba kauza hosi merkadu internasionál”, Governadór BCTL informa ba deputadu sira, iha PN  Sesta (27/03).

Nia haktuir, kazu hosi merkadu mundiál ne’e maoria iha Equity mais ida-ne’e sé kompara dezde fundu ida-ne’e harii 2005 to’o agora Timor-Leste iha periódiu negativu rua ka tolu hanesan ne’e maioria iha períodu pozitivu.

“Mas infelismente períodu ida agora ne’e negativu dala-rua ka dala-tolu de’it mas ida agora ne’e nia hu’an iha maka’as loos mak ida agora ne’e, loron-loron ita la haree mudansa ka alterasaun. Ita-nia opsaun agora ne’e ita hanoin dehan tanba merkadu monu ita lakohi halo desizaun. Banku Sentrál hanoin katak di’akliu ita halo desizaun ida ladún loos iha momentu ida hanesan ne’e (situasaun COVID-19) do que ita hanoin tenke loos mak no fim ita sala”, dehan Governadór BCTL. (res)

Please follow and like us:

Site Statistics

  • Users online: 2 
  • Visitors today : 1,414
  • Page views today : 2,402
  • Total visitors : 74,346
  • Total page view: 103,660

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur