Notísia foun


DILI—Timoroan sira maioria estudante ne’ebé durante ne’e hela iha Indonézia, balun iha Jakarta, Jogjakarta, Kupang, Atambua no seluk tan kuaze atus kontinua nadodon tama husi Mota-ain ho objetivu ba Dili tanba númeru kazu ba virus Corona (COVID-19) loron ba loron aumenta iha nasaun viziñu ne’e.

“Ami agora iha mota-ain tama ona iha parte ita nian (Timor Leste), ami kuaze atus ida mak iha ne’e, halo hela pasa revista no husi parte médiku sira koko hela ami ida-idak hodi prevene moras da’et COVID-19,” informa estudante timoroan ida ne’ebé hala’o viajen husi Jogjakarta ba Kupang – Atambua ne’ebé to’o ona iha Mota-ain-territóriu Timor Leste nian.

Estudante ne’e haktuir, iha Mota-ain autoridade seguransa sira asegura hela sira no sei akompañia sira to’o Dili, maibé sira kontinua preokupa tanba rona iha dalan ema halo asaltu ba sira tanba hatudu ona sidadaun balun ne’ebé la kompriende no deskonfia sira mak lori tama virus husi rai liur.

“Maske seguransa sira akompaña ami ba Dili maibé ami nafatin preokupa tanba sira ne’ebé ba uluk ona Dili ema asaltu iha karantina,” estudante timoroan ba Timor Post, Sábadu (28/03/2020) via redese sosail no lakohi públika nia identidade.

Autoridade seguransa sira haktuir sei akompaña timorroan sira ne’e to’o Dili no tama hotu iha karantina durante loron 14 tuir regras ministériu saúder no rekomendasaun husi organizasaun mundial saúde nian.

To’o notísia ne’e públika Timor Post tenta halo konfirmasaun ho parte saúde iha fronteira kona-ba teste ba timoroan sira ne’e balun keta hetan sintoma COVID-19 maibé seidauk hetan resposta.

Atualizasaun kazu husi virus corona (COVID-19) to’o loron Sábadu (26/03/2020) rejista ema ne’ebé afetadu  hamutuk 597,250, mate hamutuk 27,365 no rekopera hamutuk 133,363.

Husi númeru ne’e sei kontinua ema mate la too oras no barak liu iha nasaun Itália no España. Nasaun rua ne’e númiru ema mate barak no sae lalais tebes husi loron ba loron kompara ho akontesimentu fofoun iha Wuhan-Xina.

Virus ne’e hahú mosu iha tinan 2019 nia rohan iha sidade ida iha Xina ho naran Wuhan. Husi ne’e hahú da’et ba nasaun sira seluk iha kontinente Ázia, Áfrika, Amérika no Austrália.

Iha Indonézia ema na’in 1,046 mak afetadu, na’in  87 mak mate ona, no rekopera na’ni 46.

Entretantu iha Timor Leste foin rezista ona kazu ida ema estranjeiru ne’ebé pozetivu ona virus corona no parte saúde asegura ona iha sala izolamentu.

Prezidente Repúblika Francisco Guterres Lú Olo deklara ona estadu emerjénsia no hahú aplika iha loron Sábadu (28/03/2020) oras 00:00 to’o 26 Abril 2020.

Deklarasaun Estadu Emerjénsia abranje territóriu nasionál tomak ho fundamentu hadook ema hotu ne’ebé hela iha Timor-Leste husi kalamidade públika.

Governu hatama Proposta Estadu Emerjénsia tanba konsidera coronavirus nu’udar pandemia nune’e presiza medida preventiva lalais atu la hadaet moras at ne’e babeibeik no hamate ema barak.

Estadu Emerjénsia sei parsialmente suspende direitu, liberdade no garatia balun sidadaun ninian nu’udar dalan di’ak liu ba prevensaun transmisaun COVID-19, liuhusi kontrolu sanitáriu iha portu no aeroportu, liberdade ba sirkulasaun, direitu ba reuniaun, manifestasaun no rezisténsia, atividade sosiál no direitu traballadór sei limite atu salva povu nia moris.

Estadu Emerjénsia la signifika hapara atividade hotu-hotu. Atividade balun sei para no balun sei la’o nafatin atu garante povu nia moris loron-loron ninian.

Deklarasaun Estadu Emerjénsia sei laiha efeitu ba moris, integridade fízika, kapasidade sivíl no sidadania, la retroativu ba lei penal, defeza ba prosesu kriminal, liberdade ba konsiénsia no relijiaun, la sai sujeitu ba torturasaun, eskravatura, tratamentu kruel, dezumanu no la diskriminativu.

“Governu husu ba Prezidente Repúblika atu hala’o prosesu ne’ebé fó dalan legál ba Estadu Timor-Leste tomak hamriik hasoru inimigu boot ne’e. Hafoin simu pedidu husi Governu atu deklara Estadu Emerjensia, Prezidente Repúblika, haree ba rekizitu konstitusional, haruka karta ba Prezidente Parlamentu Nasional, akompaña ho mensájen klaru ida, tanbasá ita presiza liuhusi períodu ida ho Estadu Emerjénsia. Parlamentu Nasionál hatán ba pedidu ida ne’e ho responsabilidade tomak,” Prezidente Repúblika hatete iha ninia mensajen ohin ba povu.

Esperiénsia nasaun seluk hatudu katak tarde foti medida restritu halo sira falla iha medidas preventiva. Haree husi esperiénsia país sira ne’e, Prezidente dekreta Estadu Emerjénsia bazeia ba pedidu husi Governu no autorizasaun husi Parlamentu Nasionál:

“Ha’u dekreta Estadu Emerjénsia atu prevene kalamidade públika ida akontese ba ita, husi COVID-19. Ha’u dekreta tanba Konstituisaun fó dalan ba Estadu Emerjénsia bainhira iha kalamidade públika. Ha’u dekreta ho autorizasaun husi Parlamentu Nasional. Ha’u halo ida ne’e ho responsabilidade tomak, nu’udar Prezidente Repúblika, atu proteje ita-nia ema, atu la husik moras coronavíris destroi ita ida-idak no ita-nia Povu no País,” Prezidente Repúblika hatete.

Prezidente Repúblika louva esforsu husi instituisaun no sidadaun ida-idak hodi hamenus movimentu no atividade ho ema barak. Igreja Katólika Timor-Leste implementa Dekretu Papál, suspende missa ho sarani, iha igreja laran, no husu fiar-na’in sira tuir misa lihusi televizaun no rádio no reza iha uma. Eskola, universidade no atividade desportu taka temporária.

Prezidente Repúblika hatete katak moras ne’ebé ohin loron sai inímigu global la diskrimina ema, feto ka mane, labarik, klosan ka idozu, riku ka kiak, katóliku ka relijiaun seluk, rasa no etnia ne’ebé de’it, rai malirin ka manas, dezenvolvidu ka lae, kiik ka boot.

Iha ninian mensajen ba povu, Prezidente Repúblika mós husu labele diskrimina hasoru ema ne’ebé hetan moras COVID-19 ka foin iha sintomas.

Prezidente Repúblika husu Povu tomak nian husik ekipa Estadu hala’o nia servisu ho apoiu husi Organizasaun Mundiál Saúde.

Governu hatama Proposta Estadu Emerjénsia ba Prezidente Repúblika iha 23 marsu. Iha 24 marsu, Prezidente Repúblika rona hanoin sira husi Konsellu Estadu no Konsellu Superior Defeza no Seguransa, ne’ebé fo opiniaun favoravel ba deklarasaun Estadu Emerjénisia. Iha 26 marsu, Parlamentu Nasionál ho unanimidade aprova mensajen Prezidente Repúblika husu Estadu Emerjénsia ho votus 64 afavor.

Iha 21 marsu, Ministra interina Saúde anunsia kazu pozitivu ida iha Timor-Leste.

Governu sei regula medida sira ne’ebé presiza foti ba implementasaun Dekretu Prezidensiál kona-ba Estadu Emerjénsia. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 201
  • Page views today : 274
  • Total visitors : 80,868
  • Total page view: 113,402

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur