Notísia foun


DILI— Ministra Saúde Interina no atuál Vise Ministra Kuidadu Saúde Primária, Élia Antonia dos Reis Amaral, informa, teste amostra husi sidadaun na’in-lima ne’ebé deskonfia suspeitu ba Virus Korona (COVID-19) ninia rezultadu negativu. Inkuantu na’in rua sei haruka ran ka amostra ba teste iha Laboratórium iha Darwin-Austrália.

Liuhosi konferénsia imprensa, tersa (24/03), iha salaun MS-Kaikoli, Élia hatete, Ministériu Saúde simu ona rezultadu teste ba kazu suspeitu ba infesaun Virus Korona sidadaun na’in-lima ne’ebé MS haruka amostra ba Austrália hodi halo konfirmasaun ba teste ne’ebé Laboratóriu Nasionál Timor-Leste halo, ninia rezultadu hatudu negativu.

“Iha biban ne’e, Ministériu Saúde deklara ba públiku katak, ita simu ona rezultadu kazu ema suspeitu ba infesaun Virus Korona na’in-lima, ne’ebé ita haruka ba amostra ba Austrália hodi halo konfirmasaun ba teste ne’ebé ita nia laboratóriu nasionál halo, Gracas ba Na’i Maromak, rezultadu sai negativu,” Élia afirma.

Élia dehan, ema na’in-lima ne’ebé mak sente sintoma infesaun ne’e, la iha ligasaun ho surtu Virus Korona no livre husi moras refere.

“Rezultadu ida ne’e signifika katak, pasiente na’in-lima ne’ebé sente sintoma infesaun ne’e, la iha ba iha Virus Korona nian no sira hotu livre hosi moras ida ne’e,” Élia relata.

Élia hateten, ekipa medika ne’ebé mak akompaña no halo monitorizasaun ba pasiente na’in-lima ne’e, deside ona atu fó alta ba sidadaun hirak ne’e fila fali ba ida-idak ninia uma.

“Ekipa medika ne’ebé mak akompaña no monitorin pasiente na’in-lima, deside ona atu fó alta ka liberta sira hosi karantina, tanba sira nia kondisaun di’ak no rekupera ona hosi sintoma klíniku,”  Élia subliña.

Entretantu,  hafoin remata konferénsia imprensa, jornalista sira sei iha hela duvida no tenta atu husu pergunta kona-ba suspeitu na’in-lima ne’e sidadaun timoroan ka estranjeiru, durante ne’e suspeitu sira ne’e karantina iha ne’ebé, suspeitu sira ne’e hetan sintoma ba moras refere horibainhira inklui sidadaun sira ne’e tama mai Timor-Leste horibainhira? Maibé atuál Ministra Interina MS ne’e, la permite jornalista  sira atu husu pergunta.

Alende ne’e, tuir informasaun hosi fonte ofisial Ministériu Saúde, relata katak, sidadaun na’in-lima ne’e timoroan, ida mak Juiza timoroan ne’ebé serbisu iha Baukau, na’in-rua hosi fatin izolamentu Suai no na’in-rua seluk izola iha HNGV, no entre sidadaun na’in-lima ne’e, feto ida no mane na’in-haat.

Haruka ran ba Austrália

Hospital Nasionál Guido Valadares (HNGV), tanba deskonfia suspeitu ba Virus Korona (COVID-19).

Tuir fonte ofisial relata, ba jornalista sira iha HNGV, tersa (24/03), katak,  sidadaun timoroan na’in-rua ne’e foin mak mai hosi nasaun Japaun iha semana liubá, no tama iha fatin Izolamentu HNGV iha sesta liubá.

Fonte ne’e dehan, sidadaun na’in-rua ne’e, husi parte laboratóriu hasai ona raan haruka ba Dárwin-Austrália hodi halo teste,  maibé rezultadu seidauk mai.

Fonte ne’e hatete, daudaun ne’e sidadaun timoroan na’in-rua ne’e ninia kondisaun di’ak hela, no parte médiku sira halo hela kontrolu.

“Sidadaun na’in-rua ne’ebé mak ita asegura ne’e timoroan oan sira foin mak mai hosi Japaun iha loron hirak liubá, depois hetan sintoma, sira nia sample hasai ona haruka ba Austrália hodi halo teste,” Informa fonte ofisial ne’ebé lakohi públika naran.

Entretantu, jornalista sira tenta atu konfirma asuntu ne’e ba Diretór Klínika HNGV, maibé la iha fatin.

Aleinde ne’e, tuir observasaun ne’ebé jornalista Timor Post halo, hatudu katak, fatin izolamentu refere hetan seguransa másimu hosi pesoál seguransa HNGV nian inklui profisionál saúde HNGV nian. (jry)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 171
  • Page views today : 194
  • Total visitors : 238,361
  • Total page view: 344,315