Notísia foun


DILI—Intrepretasaun oioin ba artigu 86 alinea F kona-ba loron 60 prezidente repúblika foti desizaun liga ho situasaun polítika atuál, maibé saida mak tenke tetu uluk maka governu daualu eziste hela maske ho de’it orsamentu duodésimu no iha mós koligasaun foun ne’ebé preparadu ba formasaun governu dasia.

Jurista Senior Timoroan Avelino Coelho hatete, bainhira kaer ba artigu ne’e sura husi loron ne’ebé Orsamentu Jerál Estadu (OJE) 2020 nian xumba iha Parlamentu Nasionál iha loron 17 Janeiru 2020, maka prazu ba desizaun tenke iha loron 17 Marsu 2020.

Maibé Avelino subliña, tanba prezidente repúblika liuhusi diálogu nasional no iha meja redonda entre líder istóriku sira hasai pontu tolu ne’ebé Prezidente Repúblika Francisco Guterres Lú Olo rasik mak deklara ona katak, eleisaun antesipada rekursu ikus, orienta movimentasaun iha parlamentu nasionál no Taur Matan Ruak kontinua lidera governu daualu to’o hetan solusaun polítika, maka prezidente repúblika tenke foti uluk desizaun ba pontu rua ne’ebé iha ona meza leten maka pedidu demisaun ba Primeiru Ministru Taur Matan Ruak no koligasaun foun lideradu Kayrala Xanana Gusmão hodi forma governu dasia.

Avelino hatutan, kaer ba opsaun tolu husi meja redonda líder istóriku sira ne’e, hodi apar ho dezenvolvimentu polítika to’o ohin loron, ezije prezidente repúblika atu tetu entre kontinua nafatin governu daualu ho insidénsia parlamentár ho tetu sira kona-ba garantia estabilidade governativa, ou entrega ba forsa polítika foun hodi forma governu dasia.

“Prerogativamente iha prezidente repúblika nia liman, maibé mezmu iha hanoin insidénsia parlamentar ba oitavo governo presiza mós iha garantia katak iha sustentabilidade maioria parlamentar. Ha’u hanoin dalan sira ne’e nakloke hela, maibé últimu kazu kuandu haree katak labele duni iha intendimentu atu hakat ba formasaun nono governo, maka hanoin katak dalan ne’ebé di’ak liu maka eleisaun antesipada,” Avelino salienta.

Polítikamente, tuir Avelino, koligasaun foun ne’ebé forma husi CNRT, PD, KHUNTO, UDT, FM no PUDD, iha hela forsa no prienxe duni rekejitus sira ba forma governu foun tanba iha kadeira 34. Maibé nia dehan tan, atu to’o ba ida ne’e, uluk liu maka prezidente repúblika tenke dimite uluk Taur Matan Ruak husi Primeiru Ministru.

“Agora! sé la aseita demisaun no la loke dalan ba formasaun governu foun, no la garantia maioria parlamentar (insidénsia parlamentar) hodi aprova orsamentu jerál estadu ba tinan oin, hanoin dalan ikus liu maka disolusaun parlamentu ba eleisaun antesipada,” Avelino afirma.

“Ne’e opsoens ne’ebé maka momentu (Loron 10/02/2020) enkontru meza redonda,” Avelino reafirma. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 726
  • Page views today : 875
  • Total visitors : 84,573
  • Total page view: 118,682

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur