Notísia foun


DILI—Pasiente ne’ebé pozetivu hetan virus corona (COVID-19) iha nasaun viziñu Indonézia aumenta ba 34 inklui na’in rua ne’ebé rekopera ona no na’in ida mate iha Provínsia Bali.

Númiru ne’e hatudu sei iha pasiente 31 mak iha hela situasaun izolamentu iha ospital no klínika sira iha Indonézia.

Sita iha AFP (Agence France-Presse), pasiente ne’ebé mate iha Bali iha loron Kuarta (11/03/2020) ne’e sidadaun Inglaterra.

Pasiente ne’e feto ho idade 53 tama ospitál kleur ona ho moras komplikadu inklui virus corona.

Entretantu iha Timor Leste sei livre hela husi virus Corona. Governu kontinua halo esforsu sira ba prevensaun nian no hetan apoiu maka’as husi parseiru sira inklui WHO, embaixada Austrália no Xina.

Tuir dadus husi WHO (World Health Organization), virus Corona invade ona nasaun hamutuk 102 iha mundu ho totál kazu 105.586, no mate ona tanba virus ne’e ema hamutuk 3.584.

Virus Corona sai preokupasaun global, no nasaun barak mak afetadu ona. Iha nasaun barak governu hola desizaun oi-oin atu satan virus ne espalla iha sira nia nasaun. Barak mak desidi hapara atividades eskola, ou atividades hirak ne’ebé iha ligasaun ho agrupamentu ema nian. Medidas ne’e hanesan prevensaun ida.

Iha fulan-janeiru tinan 2020, Organizasaun Saúde Mundiál (OSM) kualifika epidemia Koronavirus (KOVID-19) nu’udar estadu emerjénsia saúde internasionál.

Koronavirus mosu iha sidade Wuhan, provínsia Hubei, Sentru Xina. Tuir kontajen OSM nian, to’o agora (iha nia relatóriu loron 9 fulan-marsu) kazu koronavirus ne’ebé konfirma ona maka hamutuk 109.577, no husi númeru ne’e, kazu hamutuk 80.904 mosu iha Xina. Kazu COVID-19 mosu ona iha nasaun 104, ne’ebé hamate ona ema hamutuk 3.809 (3.123 iha Xina no 686 iha nasaun sira seluk).

Sinál no sintoma klíniku sira-ne’ebé komún liu husi COVID-19 maka liuliu sintoma respiratóriu sira, hanesan isin-manas, me’ar no susar atu dada-iis. Ba pasiente sira-ne’ebé iha situasaun grave liu, infesaun ne’e bele hamosu pneumonia no to’o komplikasaun sira-ne’ebé sei halo ema mate.

Governu, ho apoiu husi Organizasaun Saúde Mundiál, foti ona medida oin-oin atu prevene no limita surtu KOVID-19 iha Timor-Leste. Maibé, atu garante susesu husi asaun sira-ne’e hotu, populasaun tomak tenke hala’o knaar importante ida hodi evita moras ida-ne’e bele da’et habelar. 

Nu’udar medida preventiva sira, OSM husu ba populasaun atu tenke:

  1. Taka inus no ibun bainhira me’ar ka fani;
  2. Fase liman beibeik;
  3. Labele besik (metru 1) ba ema sira ne’ebé iha sintoma klíniku respiratóriu (me’ar, fani no susar atu dada-iis);
  4. Karik iha sintoma klíniku respiratóriu (isin-manas, me’ar, fani no susar atu dada-iis), tenke uza máskara;
  5. Te’in na’an no manu-tolun halo tasak didi’ak molok atu han;
  6. Ema hirak ne’ebé presiza máskara atu taka ibun mak ema sira-ne’ebé ho sintoma klíniku respiratóriu ka sira ne’ebé fó asisténsia direta ba ema sira ho sintomas ne’e; maibé la’ós ba ema hotu-hotu. (cao)
Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,134
  • Page views today : 1,625
  • Total visitors : 80,386
  • Total page view: 112,706

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur