Estrutura husi Partidu Koligasaun, FUDD, UDT, MUDANCA no PDN nebe hamutuk iha Frenti Dezemvolvimentu Demokratiku (FDD) wainhira partisipa kampanha iha Tasi tolu Dili, 5 Maiu 2018.FOTO TATOLI

DILI—Prezidente Partidu Dezenvolvimentu Nasionál (PDN), Fernando Gusmão konsidera Forum Dezenvolvimentu Demokrátiku (FDD) sei legal tanba desizaun dissolve koligasaun ne’e la liuhusi husi konferénsia.

“Ba PDN ezisténsia FDD ne’e sei kontinua nafatin tanba ida ne’e mak ami kestiona asuntu ne’e kuaze tinan rua, ami keixa malu ba iha prokuradór, ami hato’o ba tribunal no KAK tanba tuir ami nia intendimentu katak FDD ne’e sei la disolve kuandu la liuhusi konferénsia koligasaun nian,” Fernando afirma kestaun ne’e ba Timor Post, Kuarta (12/03/2020), relasiona ho situasaun polítika atuál iha ne’ebé partidu UDT, Frenti Mudansa no PUDD halo desizaun keta-ketak hodi integra iha koligasaun foun ho CNRT, PD no KHUNTO atu forma governu dasia.

Relasiona ho kestaun ne’e m’os Prezidente Republika Francisco Guterres Lu Olo mos manda ona karta ba Tribunal Rekursu hodi konfirma legalidade husi koligasaun FDD nian.

Fernande dehan, nia parte hola pozisaun ne’e la’ós ho intensaun atu impede prosesu formasaun governu husi koligasaun ne’ebé lidera husi Prezidente CNRT, Kayrala Xanana Gusmão, maibé defende prinsípiu polítiku PDN nian.

Nia hatete, harii FDD ne’e liuhosi konferénsia ne’ebé delegadu sira mai hosi munisípiu 12 no RAEOA. Tanba ne’e, nia hatutan, bainhira seidauk iha konferénsia ida hodi dissolve koligasaun ne’e, PDN konsidera nafatin FDD legál.

Rajaun seluk, Fernando salienta, FDD sei eziste tanba partidu UDT, Frenti Mudansa ho PUDD deklara FDD laiha ona maibé to’o agora sei simu osan subvensaun públiku hosi konta bankaria koligasaun nian.

“Partidu tolu ne’e labele iha parte seluk dehan FDD disolve ona maibé sira simu osan kontinua lori FDD. Kadeira ne’ebé sira hetan ne’e povu ba vota ba FDD la’ós vota partidu idak-idak,” Fernando hatete.

Nune’e, nia konsidera partidu UDT, FM no PUDD ne’ebé mak iha tempu kampaña halo koligasaun hamutuk iha FDD prátika polítika ma-fé. Katak, haluha tiha nia maluk ne’ebé mak kontribui hodi hetan asentu parlamentár.

Tanba ne’e no liga ho situasaun polítika atuál ne’ebé líder polítiku sira liuliu partidu boot no líder nasionál sira la fó ulun ba malu hodi la tau a’as liu interese povu nian, maka Fernando afirma, dalan justu no demokrátiku liu prezidente repúblika deside eleisaun antesipada, maske durante ne’e nia defende atu solusiona situasaun ne’e partidu polítiku sira asentu parlamentar buka konsertasaun polítika hodi nune’e forma fali governu foun ka mantein governu daualu hodi lori hikas orsamentu jeral estadu ba hetan aprovasaun iha parlamentu nasionál.

Entretantu tuir líder polítiku husi UDT haktuir, iha loron 18 Juñu 2018, FDD dissolve ona no Tribunál Rekursu informadu. (ato)

 3 total views,  1 views today

Please follow and like us:

NOTÍSIA FOUN

PUBLISIDADE