Notísia foun


DILI—Saudozu Clemetino dos Reis Amaral hakotu iis iha loron-domingu madrugada (08/03/2020) ho idade 83 iha Hospital Nacional Guido Valadares (HNGV) tanba sofre moras cardíaca.

Saudozu Clementino, Vikeke-oan, hakerek na’in artigu sira no poezia motivasaun ho ativu halo públikasaun barak iha Diáriu Diáriu Timor Post.

Durante tempu portugés no indonézia, defensór ba direitus umanus, polítiku, no edukadór iha universidade oioin iha rai laran no rai liur.

Saudozu Clementino nu’udar membru ba Komisaun Inquérito sobre Massacre Santa Cruz 12 Novembru 1991 iha Díli, inkluindu ativamente partisipa iha Komisi Nasional Hak Asasi Manusia (KOMNAS HAM) ba kazu sira violasaun direitus umanus iha Indonézia no Timor-Leste.

Saudozu Clementino nu’udar membru Asembleia Konstituente RDTL iha 2001-2002 no eleitu sai deputadu hosi partidu Klibur Oan Timor Asuwa’in (KOTA) ba períodu 2002 – agostu 2007.

Hanesan eis-membru Asembleia Konstituente no eis-deputadu Parlementu Nasional iha Lejizlatura Dahuluk, Saudozu Clementino foti parte ativu hatu’ur no aprova Konstituisaun RDTL ne’ebé agora sai matadalan hodi hátan norma fundamental sira ba Timor-Leste independente.

Prezidente Repúblika Francisco Guterres Lú Olo liuhusi Xefe Casa Civil presta omenajen ba matebian eis-deputadu Clementino dos Reis Amaral, deputadu primeira lejislatura husi Bankada KOTA.

Reprezentante povu iha Uma Fukun Parlamentu Nasionál, Segunda (09/03/2020), hato’o votus prazer ba Eis Deputadu Primeiru Lejislatura Clementino dos Reis Amaral, ho votus a favor 37, laiha abstensaun no konra.

Bancada CNRT senti tristi tanba lakon timor-oan potensial ida, polítiku ida ne’ebé matenek no di’ak tebes, haraik án no determinante iha nia-luta hodi defende ita-nia rai no povu terus na’in sira durante iha nia moris.

Partidu CNRT ho laran susar tebes hakarak hato’o Boa Viagem ho Domin ba Saudozu Clementino dos Reis Amaral. “Ami mós husu Nai Maromak atu haraik forsa no koragen ba Oan, Beioan no Família Enlutada.  Adeus Companhero! Deskansa ho Hakmatek iha Aman Maromak Nia Kadunan Santu! Amém! Amém! Amém!,” subliña bankada CNRT iha uma fukun Parlamentu Nasionál iha loron Segunda (09/03/ 2020).

Mate isin Saudozu Clementino dos Reis Amaral haloot iha semteriu Bekusi, Dili. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 737
  • Page views today : 1,109
  • Total visitors : 73,669
  • Total page view: 102,367

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur