Notísia foun


DILI—Observadór Polítika husi Universidade de Dili (UNDIL) Francisco Martins alias Mausoro preokupa tebes ho vontade polítika husi órgaun estadu nian ba hakotu lalais impase polítika iha rai laran, hodi foku ba dezenvolvimentu nasionál.

“Vontade polítika órgaun soberarania atu lalais foti medidas,  hanesan agora, ajuda koligasaun foun, ka deklara eleisaun antisipada, ita presiza iha serteja ruma, nune labele hamosu nafatin interpretasaun oioin iha sosiadade nia le’et,” Mausoro afirma ba Timor Post via telefone, Sexta (06/03/2020), relasiona ho koligasaun foun ne’ebé forma husi CNRT, PD, KHUNTO, UDT, FM ho PUDD lidera husi Kayrala Xanana Gusmão ba hasoru Prezidente Repúblika Francisco Guterres Lú Olo, maibé Xefe Estadu tau kestaun ba legalidade koligasaun ne’e nian ba formasaun governu dasia.

Mausoro dehan, koligasaun tenke la’o tuir duni regra normal sira, maibé saida mak hatudu daudaun tuir nia seidauk hatudu vontade atu solusiona impase.

“Premeiro, tenkiser la’o tuir saida mak konstituisaun da repúblika. Liga ba kontekstu formasaun governu foun prienxe ona rekejitus husi konstituisaun ka la’e. Sé priensxe ona, ita hein atu kompleta tan de’it rekejitus formais sira seluk,” Mausoro subliña.

Entretantu kestaun ne’ebé prezidente repúblika foti kona-ba legalidade koligasaun foun nian liuliu husu atu koligasaun halo uluk konferénsia tuir lei partidu polítiku nian, nune’e bele hetan rekoñesimentu no garante mós estabilidade governativa.

Hafoin sorumutu ho Lú Olo, liuhusi konferénsia ba imprensa, Porta-vóz Koligasaun, António da Conceição haktuir, iha aspeitu polítiku, koligasaun prienxe ona rekejitus tanba iha ona maioria parlamentar, maibé prezidente repúblika tau kestaun ba lei partidu polítiku katak, koligasaun seidauk prienxe, nune’e koligasaun seidauk bele fó resposta kedas ba prezidente repúblika.

“Iha aspeitu polítiku koligasaun iha ona kondisoens tanba iha ona partidu neen mak hamutuk forma koligasaun foun ba harii governu ida, maibé tuir lei partidu polítiku tenke liuhusi konferénsia, tanba ne’e maka koligasaun seidauk iha pozisaun hodi bele hatan kedas ba prezidente repúblika,” subliña Sekretáriu Jerál PD ne’e ba Jornalista sira iha Palásiu Prezidensiál Nicolau Lobato, Bairro-pité, Dili, Sexta (06/03/2020).

Entretantu Primeiru Ministru atual Taur Matan Ruak aprejenta tiha ona pedidu rejignasaun ba prezidente repúblika iha loron Tersa (25/02/2020). Liu ona semana hirak prezidente repúblika seidauk dekreta pedidu rejignasaun ne’e.

Governu daualu lideradu Taur Matan Ruak monu tanba orsamentu jerál estadu 2020 nian xumba iha parlamentu nasionál hafoin CNRT la a favor. Koligasaun ne’ebé hahoris governu daualu maka CNRT, PLP no KHUNTO liuhusi eleisaun antesipada 2018.

Rajaun CNRT fó pozisaun ne’e tanba nia membru na’in hitu durante tinan rua governu daualu la hetan pose husi prezidente repúblika. No konsidera governasaun Taur Matan Ruak laiha kapasidade. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,381
  • Page views today : 2,325
  • Total visitors : 74,313
  • Total page view: 103,583

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur