Notísia foun


DILI—Sekretáriu Jerál FRETILIN, Mari Bim Amude Alkatiri afirma, nia parte preparadu ba infrenta kualker eleisaun inklui Eleisaun Antesipada (EA) bainhira Prezidente Repúblika Francisco Guterres Lú Olo desidi dalan ne’e mak bele hakotu impase polítika atuál.

Alkatiri dehan, FRETILIN prontu iha kualker tempu. “Partidu FRETILIN úniku partidu ke prontu ba, aban sé karik aban eleisaun ita halo,” Alkatiri hatete ba Jornalista sira hafoin partisipa selebrasaun loron nasionál veteranu iha Palásiu Governu, Dili, Tersa (03/03/2020).

Nia hatutan, FRETILIN iha nia estratejia rasik hodi infrenta kualker eleisaun. No ba oin FRETILIN otimista manan maioria absoluta.

“FRETILIN iha nia estratejia atu manan eleisaun tuir mai, manan ho maioria absoluta mesak i depois mak halo inkluzaun,” Alkatiri dehan.

Ambiasaun ida ne’e FRETILIN iha tanba hakarak formasaun governu ida ne’ebé metin hodi foku ba dezenvolvimentu nasionál.

“Porke ohin loron kuandu la maioria absoluta partidu ki’ik mak sai fali determinante,” Alkatiri salienta.

Antes ne’e Alkatiri afirma, lakohi oho-án iha formasaun governu dasia no prepara ba kaer ukun iha tinan 2023, tanba impase polítika atuál problema Prezidente CNRT Xanana Gusmão ho Prezidente Repúblika Francisco Guterres Lú Olo.

Situasaun polítika atuál nota pesimista sira FRETILIN nian ba hakotu bainhira involve iha governu foun, tanba Alkatiri dehan, sé FRETILIN mak ba hamutuk ho CNRT mós problema ho prezidente repúblika, FRETILIN lakohi oho an.

Tanba ne’e, Alkatiri hatete, Xanana ho Prezidente Repúblika maka tenke rejolve problema membru governu daualu na’in sia maioria husi CNRT ne’ebé la hetan pose.

Membru na’in sia ne’e kuaze tinan rua Prezidente Repúblika Francisco Guterres Lú Olo la fó pose tanba deskonfia pesoal sira ne’e iha problema ho justisa, maibé CNRT rasik lakohi troka membru hirak ne’e no defende nafatin tanba rajaun pejunsaun inosénsia. Ikus mai CNRT la fó votus a favor ba OJE 2020 hodi xumba no problema fila ba prezidente repúblika.

“Xanana mak rejolve problema ho prezidente Lú Olo, fasilita teb-tebes nasaun tomak, ne’e ita bele la’o lalais liu, se nia lakohi rejolve, problema ne’e iha sira na’in rua, la’ós iha ami,” Alkatiri subliña ba Jornalista sira hafoin hasoru malu ho delegasaun husi PD lideradu Sekretáriu Jerál António da Conceição, iha CCF, Komoro, Dili, Tersa (18/02/2020).

Maske nune’e, Alkatiri hatete, atu hetan solusaun imidiada ba situasaun polítika atuál maka tenke iha duni governu foun ida ne’ebé bele kontinua lori povu no nasaun ba oin.

“Solusaun imidiata, rejolve atu iha nono governu ida ke bele lori rai ne’e ba oin,” Alkatiri afirma.

Entretantu líder máximu husi partidu neen inklui CNRT, PD, KHUNTO, UDT, FM no PUDD asina ona akta koligasaun iha Sede Nasionál Partidu CNRT, Bairro dos Grilhos, Dili, iha loron Sábadu (22/02/2020).

Prezidente CNRT, Kayrala Xanana Gusmão hatete, partidu neen ne’e hatudu iha ona forma ba formasaun governu foun hodi nune’e bele hakotu impase polítika atuál.

Entretantu iha loron Sesta (21/02/2020), Prezidente Repúblika Francisco Guterres Lú Olo, afirma, prontu fó apoiu ba kualkér koligasaun foun ne’ebé forma husi partidu polítiku sira atu forma Governu foun.

Lú Olo dehan, governu foun ne’ebé iha hodi hakat liu impase polítika rai-laran.

“Ha’u hanoin importante maka partidu polítiku sira buka malu ba, depois maka bele fó hatene ba Prezidente Repúblika, kona-ba Governu ida ne’ebé maka sente ba di’ak atu bele lori ita-nia rai ne’e bá-oin. Prontu, Prezidente Repúblika sempre fó apoiu nafatin, atu ita bele ultrapasa krize ida-ne’e, atu bele hadi’a fali ita-nia Governu. Ita hakarak iha governasaun ida-ne’ebé sustentável durante tinan rua ka tolu nia laran, hodi iha fali orsamentu, iha fali programa atubele hala’o dezenvolvimentu”, Lú Olo subliña.

Entretantu Timor Post online fó sai ona informasaun iha loron Tersa (03/03/2020) katak, Prezidente Repúblika Francisco Guterres Lú Olo simu tiha ona karta pedidu sorumutu ho koligasaun foun lideradu Prezidente CNRT, Kayrala Xanana Gusmão, iha Palásiu Prezidensiál Nicolau Lobato, Bairro-pité, Dili.

Fonte kredivel Timor Post iha Palásiu Prezidensiál haktuir, koligasaun mak hato’o pedidu sorumutu ho prezidente repúblika iha semana kotuk, maibé prezidente repúblika seidauk desidi loron sorumutu nian tanba sei okupadu ho ajenda seluk.

Fonte ne’e dehan, pedidu ne’e la temi kona-ba indijitasaun primeiru ministru foun husi koligasaun foun ne’ebé harii husi partidu CNRT, PD, KHUNTO, UDT/FM ho PUDD. (ato)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 920
  • Page views today : 1,149
  • Total visitors : 84,767
  • Total page view: 118,956

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur