Notísia foun


DILI— Diretór Programasaun Komisaun Nasionál Kombate HIV-SIDA Timor-Leste (KNKS-TL), Venâncio Coelho, afirma dala barak joven sira utiliza Uma Koos sai hanesan fatin ransu livre no seksu livre.

“Atividade sira ne’ebé mak kontribui  mós ba tranzmisaun HIV-SIDA mak, ita nia relasaun livre sira iha li’ur no joven sira dala barak hola oportunidade ba kondisaun sira ne’ebé ke dala-ruma iha, atu bele halo atividade ransu livre no seksu livre nian, ezemplu ida mak iha Koos-Kosan sira ne’e,” Informa Venâncio, ba jornalista sira, iha universidade UNITAL-Bekora, sesta (28/02).

Venâncio dehan, komisaun foti uma koos, la’ós tanba iha indikasaun boot ba tranzmisaun HIV-SIDA, maibé Koos-Kosan mós parte ida hosi fatin sira ne’ebé mak kontribui ba problema ransu livre no seksu livre.

“Ita foti Koos-Kosan sira ne’e, la’ós tanba iha indikasaun boot ida dehan katak, úniku tranzmisaun HIV-SIDA ne’e akontese de’it iha Koos-Kosan, úniku relasaun  seksuál  livre ne’e akontese de’it iha Koos-Kosan, maibé Koos-Kosan ida ne’e rasik mós parte ida husi fatin sira ne’ebé ke kontribui ba problema ransu livre no seksu livre, tanba kuandu ita kolia kona-ba tranzmisaun HIV-SIDA, númeru barak liu ne’e mai husi relasaun seksuál livre, no Koos ne’e rasik mós fatin ida ne’ebé ke pesoál balu bele utiliza hanesan fatin hodi halo tranzasaun relasaun seksuál ninian, la’ós ho ninia parseiru permanente,” Venâncio afirma.

Venâncio relata, la iha pesoál ida mak halo kontrolu uma koos sira ne’e. úniku dalan mak governu tenke kria lei no regulamentu ruma hodi regulariza no kontrola.

La iha pesoál ida ne’ebé iha kompeténsia tomak hodi bele halo kontrola ba asuntu sira ne’e, uniku dalan mak tenke hakilar no husu ba governu no estadu hodi bele tau matan ba parte sira ne’e.

“Ita nu’udar ajente ba estadu nian, iha responsabilidade tomak hodi bele halo asaun kombate hothotu, ne’ebé ke ita bele konsidera katak, atividade sira ne’ebé mak fó risku ba tranzmisaun HIV-SIDA, ita tenke halo kontrola másimu, atu nune’e ita bele evita ona ita nia pontu ida dehan katak ransu livre ho seksu livre, ida ne’e mak ita nia intensaun, la’ós ita bandu ema atu labele halo relasaun seksuál ka labele loke Koos-Kosan,” Venâncio subliña.  (jry)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 802
  • Page views today : 927
  • Total visitors : 239,394
  • Total page view: 345,496