Notísia foun


Husi: Teodoro M. Mota

Minarai no gas sai faktor importante ba ekonomia TL iha tempu agora no futuru. Tuir planu strateziku dezenvolvimentu 2011-2030 TL hasai ona vizaun konaba dezenvolvimentu setor petrolifera. Analiza SWOT nudar metodu planu stratejia ajudu hodi evalua no identifika Forsa (Strength), Frakeja (Weakness), Oportunidade (Opportunity) no Ameasa (Threats) liga ho kompetisaun negosiu no planeamentu projeitu ba dezenvolvimentu industria mina no gas.

1. Forsa (Strength):
I. Timor Leste iha Fundu Petroleum agora dadaun pur volta US$ 17 billioens e tal, receitas nee mai husi rezultadu produsaun faan mina no gas iha Tasi Timor, kampu Bayu Undan no ect.

II. TL sei iha potensia petroleum seluk nebee lokaliza iha tasi laran (offshore) no rai maran (onshore). Potensia petroleum iha offshore mak hanesan kampu Greater Sunrise (GS) potensia gas 6.7 trillion cubic feet (Tcf) reserva rekuperavel no 280 milhoens de barrels condensate (MMBBls) (Fontes Informasaun: Timor Gap E.P).

III. Potensia petroleum seluk nebee mak deskoberta ona mak hanesan kampu Jahal, Kuda Tasi, Squilla no Krill lokaliza iha Block 11-106, opera husi kompanya Eni, INPEX no TIMOR GAP. Inklui liu 65% área ne’ebé mamuk, prospetus no deskoberta ona hanesan kampu gas Kelp Deep 13 TCF, Chuditch 0.75 Tcf, sst, lokaliza iha ex-JPDA. Tuir kontratu fahe produsaun ou production sharing contract (PSC) iha área Esklusiva (Eni, Galp and KOGAS halo hela explorasaun). Iha área Exklusiva, 85% sei mamuk, katak seidauk iha lisensa de explorasaun. Enkuantu iha Timor Gap onshore block (bloku rai maran); Block A (PSC TL-OT-17-08), B, and C (PSC TL-OT-17-09).

IV. TL nia potensia Petroleum iha rai maran mak: Aimaulin Seep, Horba Seep, Holmesel Seep, Lour Seep, Aisaleuk Seep, Atalele Seep, Aliambata Seep no Badulobo Seep. Fatin sira nee konsidera potensia ou prospetu ba petroleum ou konsidera nudar gas natural nebee suli husi rai okos sai mai rai leten ou bain-bain hanaran gas seep. Fatin sira nee identifika liu husi SURVEI AÉREO GEOFÍSIKA, nebee kompostu husi estudu Aero Magnetic and Radiometric; atu deteta fatuk nia Magnetismu no Radioactive, Aero Gravity: atu deteta densidade husi fatuk no Survei Aéreo Geofísika mais detalhadu (Magneto Telluric no Electromagnetic (EM)) (Fontes Informasaun: Timor Gap E.P).

V. Tuir studu Timor-Leste ninia potensia total Petroleum Initial in Place (PIIP) pur volta 12.6 – 45 Bilioens Barrels Oleo Ekivalente (BOE). Kompanya minarai nasional Timor Gap (TG) halo ona estimasaun katak rekursus ne’e bele rekuperáveis, mak 6.3 Bilioens Barrels Oleo Ekivalente (BOE) US$ 378 Bilioens. Se uza kustu pur barril bele atinje to’o US$ 35 Billioens, entaun presiza gastus ba atividades oi-oin iha enjenharia, fabrikasoens, “services” hahu husi fabrikas kiik to’o bót, konstrusaun, operasaun, manutensaun, explorasaun no sst, bele konsume fundu to’o valor US$ 220 Billioens. Husi dadus refere fo certeza boot ba TL hodi dezenvolve seitor petroliferu hodi sustentabiliza fundu petroliferu (Timor Gap, EP 2019).

VI. Ho partisipasaun TL via Timor gap (TG) iha kampu Greater Sunrise (GS) ho maioria asoens 56.56% fo green light, fo certeza no reforsa TL nia pozisaun hodi asegura nia rekursu no foti desijaun, liu-liu asegura pipe line no hari TLNG.

VII. Realizasaun Fronteira Maritima asina iha dia 06 marsu 2018 fo benefisiu boot ba TL, tamba kampu minarai Bayu Undan, kampu minarai kitan, kampu bufalo, no kampu laminaria carolina 100% tama iha area TL no timor mak nain ba rekursu, nunee receitas husi kampu hirak nee 100% tama hotu ba kofre estadu. Nunee mos potensia ba industria ikan.

VIII. Estudu pipeline mai TL tama ona ba faze FEED (Front End Engineering Desing). Wainhira tama ona faze FEED signifika hakat liu ona conceptual desing no estudu feasibility. Iha faze nee, molok hahu EPC (Engineering, Procurement and Construction), estudu barak nebee hala’o ona hodi buka hatene problema teknika, inklui estimasaun kustu investimentu ba projeitu pipeline. Rezultadu husi nemak hanaran “FEED package” nebee kontenta dokumentus holistiku nudar baze husi oferesaun kontratu EPC.

IX. Timor Leste iha kompanya minarai nasional mak Timor Gap, fungsaun hodi hala’o negosiu iha setor industria mina no gas. TL mos iha Autoridade Nacional do Petróleo no Minerais mak ANPM, fungsaun maneja no regula aktividade minerals no petroleum tantu iha rai maran (onshore) no tasi laran (offshore), inklui iha Extrative, Industry, Transparancy, no Initiative (EITI). Sira nee hotu kategoriza nudar TL nia forsa.

X. Timor leste iha rekursu humanu nebee adekuadu sai gestor hodi jere potensia rekursu minerals, mina no gas iha teritoriu TL.

2. Frakeza (Weakness):
I. Sei laiha rendementu ba taxa ne’ebe signifikante, dependente maka’as ba industria no fundu petroliferu, nunee politika diversifikasaun sei minim tebes.

II. Investidor iha setor industria minarai minim tebes, nunee kompetitividade merkadu servisu mos sei ki’ik tebes.

III. Timor Gap, e.p seidauk iha fundu independente hodi hala’o politika ho negosiu iha industria mina no gas.

IV. Programa bolsa estudu nebee governu oferese ba Timor oan seidauk maksimiza ho diak, liu-liu seidauk resposta propria ba gap nebee kondisaun TL enfrenta.

V. Rekrutamentu staff ba entidade governu liu-liu ANPM, IPG, Timor Gap tenke baze ba meritu, professionalism no livre KKN.

VI. Office Timor Gap seidauk hamri’ik mesak to’o agora sei aluga fatin, maske Timor Gap kompanya minarai nasional reprezenta orguilu nasaun nian. Nunee, bele implika ba kualidade dezempena.

VII. Mega projeitu pipeline, planta LNG, Refinaria no Suai-supply base sei lori impaktu negativu ba ambiental, projeitu nee sei kria potensia ba emisaun karbon ba atmosfir no sei kria material polusaun hanesan hydrogen sulfide (H2S), mina, lisu, be foer no lisu seluk ho kuantidade boot nebee bele estraga kondisaun enviromentu. Ezemplu risku ba biodiversidade no ekolojia tasi nebe akontese iha dezastre Deepwater Horizon mina nakfakar estraga animal no rikusoin iha tasi laran.

VIII. Minim lei konaba Analisis Dampak Lingkungan (AMDAL) no modul nebee komprehensivu hodi hala’o AMDAL ba projeitu. AMDAL tenke kompostu planu jere eviromentu nebee detailu esplika konaba jere no atuasaun polusaun, jestaun planu ba dejastre no mekanismu hodi kontrola no minimija impaktu negativu tantu kultura no sosial. Objektivu reve lei hodi kontrola polusaun no difini klaru konaba konstraint ou batasan zat-zat polusaun, inklui CO2, gas, no material kimika nebee estraga tasi ben, kualidade be no estruktura rai, inkui isu konaba polusaun sunu gas. Lei mos tenke define klaru sobre dezvantelasaun projeitu depois de perioudu operasaun hodi asegura katak labele husik hela foer, material kimika no poizon sira seluk nebee bele hafoer no estraga rikusoin sira iha teritoriu TL. Rekomendasaun seluk kada lei nebe halo tenke esplika klaru konaba nia sensaun, nunee karik kompanya ou empregador kontra lei bele submete an ba justisa no kumpri tuir lei nebe vigor.

IX. Seidauk iha dadus digitalizadu no organizadu konaba numeru rekursu humanu nebee servisu iha area minarai no non-mineral, inklui dadus digitalizadu no organizadu hodi promove potensia rekursu Timor nia ba nasaun estranjeiru hodi atria IOC para halo investimentu.

X. To’o agora kompanya Timor Gap seidauk hatama receitas ba kofre estadu.

3. Oportunidade (opportunity):
I. Wainhira pipeline gas mai TL no harii planta LNG sei iha oportunidade kria kampu serbisu ba timor oan barak bele to’o mil ba pozisaun tekniku no non-tekniku. Esperiensia hatudu iha nasaun seluk bele absorve kampu serbisu ba ema hamutuk 12000 tantu ema husi estudu area minarai no non-minarai. Tuir informasaun husi Timor Gap ep., Eng. Francisco Monteiro, pipeline gas mai TL sei iha oportunidade kria kampu servisu bele kobre to’o 10.000 pessoas (Fontes informasaun; Timor Gap ep., Eng. Francisco Monteiro deklarasaun iha noticias gmntv.tl, edisaun 12 maio 2019).

II. Wainhira harii planta LNG iha TL sei fo oportunidade no garantia sustentabilidade industria petroleum. Fasilidade refere laos deit produs ou likifika gas husi kampu greater sunrise (GS) ho potensia rezervatoriu gas 7.7 tcf (trillion cubic feet), maibe mos sei produs kampu seluk lokaliza iha tasi Timor identifikadu ho rezervatoriu gas mak kampu gas Chuditch ho rezerva 0.7 tcf, kampu gas Kelp Deep ho estimasaun rezerva 8.4 – 13.6 tcf, no potensia gas em jeral iha teritoriu TL (Fontes informasaun: ANPM).

III. Wainhira dada pipeline gas no harii planta LNG iha TL sei iha oportunidade hodi sustentabiliza Fundu Petroleu wainhira kampu minarai Bayu Undan (BU) nia produsaun remata. Tuir informasaun husi ConocoPhillips nudar kompanya operador iha BU katak estimasaun kampu BU nia life time to’o tinan 2022 sei la ekonomis (kustu operasaun boot liu kustu rekoperasaun).

IV. Wainhira harii planta LNG iha TL sei fo vantajem ekonomia rai laran: vantajem premeiru mosu kedan wainhira komesa hari konstrusaun ba projeitu, konstrusaun pipeline nebee dada husi tasi laran to’o mai rai maran inklui aktividade seluk. Aktividade hirak nee sei konsume fundus billioens dollar amerikanu. Montante hirak mak ekonomia timor nia sei hetan tulun hadia povu nia moris. Osan ba emprejariu lokal no osan ba empregador timor oan rasik hodi hadia rendimentu iha sira nia moris. Oportunidade vantajem seluk hetan husi jasa-jasa durante konstrusaun projeitu no sosa sasan husi rekursu lokal. Maneira seluk nebee fasil hodi tulun dudu ekonomia lokal wainhira projeitu hahu mak emprejariu no povu TL prepara hahan no uma ba empregador no kompanya husi estranjeiru hodi aluga ou hola uma, hotel, modo, hahan iha restaurante no nesesidade loron-loron nebee produs no prepara husi negosiu lokal. Ikus mai sei estimula ekonomia rai laran no tulun hadia povu nia moris.

V. Wainhira dada pipeline gas no harii planta LNG iha TL sei fo vantajem taxa ba governu: vantajem fijiku nebee hetan husi dezenvolvimentu projeitu mak vantajem taxa. Vantajem taxa mak rendimentu nebee governu TL hetan husi empregador no emprejariu tantu nasional no internasional. Taxa nebee emprejariu no empregador sei selu ba governu, inklui aktividades ekonomia nebee iha posibilidade sei mosu durante periodu konstrusaun no operasaun projeitu. Konsekuensia taxa husi aktividade projeitu upstream no downstream depende kondisaun taxa nebe governu TL prepara. Apakah sei kria taxa iha rai laran?, apakah sei halo regulamentu foun konaba taxa ba fasilidade?, no ect.

VI. Oportunidade no benefisiu seluk mak benefisiu direita husi produsaun mina no gas natural mak bele uja hanesan kobustivel no bele produs produtu ou sasan kimika hanesan pupuk, sepatu, roupa, lem, triplex, tinta, plastiku, roda, bola, CD, tasu, oklu, payung, pasta, mangeira, fiu eletrisidade, fatin cas ahi ou terminal ahi, metro, pinsel, sasan halimar ba labarik kiik, supeita, kadeira, butyl ou fatin mina morin, camera dijital, no ect. Sasan ou equipamentus sira nee hotu produs husi mina no gas natural. Signifika sei hamoris industria no ekonomia husi area nee (SPE, 2019).

VII. Oportunidade no benefisiu adisional husi planta LNG no refinaria mak uja fasilidades laos deit likifika gas ou produs mina husi rai laran, maibe mos bele importa mina no gas husi nasaun seluk hodi halo prosesamentu molok faan ba merkadu (SPE, 2019).

VIII. Oportunidade seluk TL hetan mak profit rezultadu faan mina no gas kampu GS. Komersialidade kampu minarai no gas depende ba rezerva mina no gas, presu no demanda gas iha merkadu.

IX. Oportunidade intermu fahe produsaun iha kampu greater sunrise (GS). Profit indikator nebee bain-bain uja iha industria minarai mak; net present value (NPV), internal rate of return (IRR), benefit cost ratio (B/C), no payback of time (POT). Kompanya sempre investa wainhira valor IRR boot liu minimum actractive of return (MARR). Analizasaun project economics nudar sasukat ba companya operador, joint venture no host country foti desijaun ba dezenvolvimentu projeitu kampu GS. Ho realijasaun fronteira maritima (FM) hamosu regime espesial foun iha kampu GS, maibe fo vantajem boot ba TL. Tuir akordu FM preve katak pipeline gas mai TL sei fahe rendimentu 70% mai TL no 30% ba Australia. Redimentu husi royalty 10% (5% ba governu no 5% ba kontraktores). Husi 5% ba governu sei fahe tutan ba governu TL no Australia ho percentajem 70%:30%. Enkuantu 5% seluk ba kontraktores. Rendimentu seluk TL sei hetan husi investimentu kustu capital. Kustu kapital mak tuir kontratu hare liu ba kustu peskijas hotu nebee hahu husi explorasaun geolojia, seismiku, ou buka minarai no gas husi inisiu to’o hetan petroleum ou deskobre mina no gas. Kustu kapital tuir maneira kontratu nebee iha kuandu wainhira kompanya investa osan ona hodi buka mina no gas, estadu tenke selu 100% hafoin aumenta tan 127% hanesan kreditu investimentu (investment credit ou IC). Nee maneira kontratu uja hodi atrai ekonomikamente ba kontraktores sira hodi halo investementu iha ita nia rai. Ho partisipasaun 56.56% TL nia iha dezenvolvimentu kampu GS, signifika TL mos sei benefisia husi instrumentu IC 100 + 127% (GSSR, 2018).

X. Nunee mos oportunidade no benefisiu regime kontratu iha kampu greater sunrise (GS) depois de Fronteira Maritima (FM). Rendimentu upstream pipeline gas mai TL rejultadu sei fahe 70% ba TL no 30% ba Australia. Downstream exceptu karik IOC ruma hakarak investa entaun konserteja 100% mai TL. Fahe lukru iha kampu GS tuir kontratu sei fahe 50% ba governu (husi 50% nee sei fahe 70% ba TL no 30% ba Australia) no 50% seluk ba kontraktores. Kontratu fahe rezultadu sei aplika mos ba produsaun produtu liquidu no gas iha kampu GS. Ho partisipasaun TL iha kampu GS sei hetan benefisiu dobru liu tan ba receitas TL. Rendimentu ba TL iha GS sei mai husi royalty, lukru, impostu, no reimbolsa ba kustu capital, domestic market obligation (DMO) no ect. Enkuantu kompanya sei hetan benefisiu husi profit share, cost recovery (CR), internal rate of return (IRR), no instrumentus fiskal seluk (Hamburg, 2010).

XI. China, Korea selatan, Taiwan, Jepan no ect nudar nasaun konsumedores. Nunee mos nasaun barak mak sei presija tebes LNG tamba nesidade no ekonomia rai laran, elektrisidade, transportasaun, gas ba nesesidade uma laran hodi tein, hotel, restaurante, no ect. Inklui nasaun sira eropa mos sai konsumedor ba LNG. Signifika futuru mai presu LNG autentikamente sei sae makas. Nunee nesesidade merkadu LNG sei massiva. Hare ba demanda no kresimentu nesesidade LNG fo certeza no oportunidade ba TL hodi harii TLNG.

4. Ameasa (Threats):
I. Ho realizasaun fronteira maritima difinitivu hamosu regime special foun iha kampu mina no gas Greater Sunrise (GS), katak desijaun atu dezenvolve kampu GS tenke mai husi nasaun rua Australia no TL. Karik iha futuru mak Australia la konkorda ou veta signifika fo ameasa ba TL nia ekonomia.

II. Minarai no gas nudar industria petroleum naun renovaveis nunee loron ruma sei remata, kuandu la iha politika diversifikasaun future mai sei fo ameasa ba TL nia ekonomia.

III. Folin mina no gas iha merkadu fluktuativa nunee kuantidade receitas rekuperativa la masimu.

IV. Tuir estudu no prediksaun global 2025 sei iha flooding LNG, tamba nasaun barak mak agora dezenvolve LNG. Nasaun hirak nebee agora LNG makas mak Qatar, Australia, Amerika, Nigeria, Rusia, Norwey, Filipina, Singapore, Indonesia, libya, no ect. Nasaun sira nebee agora presija LNG makas mak Jepan, Korea, Cina, no ect. Iha futuru mak flooding LNG signifika sei iha surplus ba merkadu nunee bele kauza presu LNG la estabil ou monu (BP & Pertamina, 2018).

V. Iha parte seluk, nasaun barak agora dezenvolve reservoir uncoventional hanesan coalbed methane (CBM), shale gas, no ect. Hodi responde ba sira nia ekonomia no energia rai laran, nunee sira hahu redus importasaun mina husi nasaun estranjeiru. Nunee hatarde kresementu merkadu ba industria mina no gas.

VI. Iha 2019 Indonesia hahu dezenvolve no utiliza kelapa sawit ou programa biodiesel 20% (B20) nudar energia nunee iha tempu badak sei halo teste B30, nunee sei redus merkadu konsumedor liu-liu afetadu ba nasaun sira nebee 100% ba fossil fuel.

VII. Iha parte seluk nasaun barak agora dezenvolve industria bateria hodi responde ba sira nia nesesidade energia rai laran no hamenus dependensia ba mina. Industria batrea ekonomia kustu baratu, numeru konsumidor barak, kria polusaun ba environmentu ki’ik kompara ho mina no gas. Nunee warning ba nasaun sira nebee 10% dependente ba fossil fuel.

VIII. Inestabilidade politika no seguransa fo ameasa ba investidor hodi halo investimentu iha TL, nunee la iha merkadu servisu no numeru dezempregu gradual aumenta kada anum. Dadus hatudu 2015 TL nia numeru dezempregu 11%.

IX. Impasse politika hamate ekonomia rai laran tamba la iha investimentu no la iha sirkulasaun osan ba baze nunee hatarde kresementu ekonomia rai laran.

X. Data 2015 hatudu Indonesia nia rezerva provadu gas ou proven reserve total 98 tcf (trillion cubic feet). Iha ASIA Indonesia sai nasaun rangkin terseiru eksportir LNG depois Australia no Qatar. Indonesia nia LNG mai husi kampu Arun, Bontang no Tangguh, nunee intensidade merkadu LNG kompetitivu no sai ameasa ba nasaun sira nebee post-konflitu foin planu atu hahu hari industria LNG. God Bless TL.

Referensia:
[1] Journal no livru : SPE (2019), Livru: BP no Pertamina (2018), no Hamburger (2010).
[2] Internet web: http://noticias.sapo.tl/portugues/info/artigo/1531899.html
[3] Internet web:http://web.anpm.tl/
[4] California Energy Commission. “Liquefied Natural Gas Safety.” Asesu dia 15 Oktober 2007, web:http://www.energy.ca.gov/lng/safety.html
[5] Internet web:http://www.tatoli.tl/…/31-marsu-2019-fundu-pertoleu-sae-ba…/
[6] Internet web:https://www.youtube.com/watch?v=mHUb01eKH0E
[7] TVTL, GMNTV no Radio (8 Dezembru 2018): “Semináriu nasional kona-ba asuntus relasionadus ho fronteiras marítimas no nia impaktu ba atividades petrolíferas.”, Sentru Konvensaun Dili (CCD).
[8] TVTL, GMNTV no Radio (8 Janeiru 2019): “Aprezentasaun husi Chefi negosiador, ANPM, Timor Gap ep., kona-ba asuntus relasionadus ho fronteiras marítimas no sosa asoens conocophillips no shell energy.”, Parlamentu Nasional (PN).
[9] Internet web:https://www.facebook.com/TimorSeaBoundary/
[10] Atlantic LNG (2007). Web: http://www.atlanticlng.com/
[11] Internet web:https://www.timorgap.com/databases/website.nsf/vwall/home
[12] internet web; http://gmntv.tl/…/explorasaun-kampu-gs-sei-fo-servisu-ba-…/…

Please follow and like us:

NOTÍSIA FOUN

Site Statistics

  • Users online: 2 
  • Visitors today : 829
  • Page views today : 1,047
  • Total visitors : 44,473
  • Total page view: 60,378

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur