Notísia foun


DILI—Líder másimu FRETILIN ho PD marka tiha ona sorumutu hodi diskuti kona-ba situasaun polítika rai laran liga ho orientasaun Prezidente Repúblika Francisco Guterres Lú Olo ba partidu polítiku sira halo movimentasaun polítika molok nia foti desizaun.

Ajenda ne’ebé Timor Post asesu husi ofisiál komunikasaun Komité Sentrál FRETILIN (CCF sigla Portugués) haktuir, sorumutu ne’e hala’o iha loron Tersa (18/02/2020), hahú iha oras, tuku 08:30.

Entretantu Sekretáriu Jerál Partidu FRETILIN, Mari Bim Amude Alkatiri, hafoin hasoru malu ho Primeiru Ministru Taur Matan Ruak iha Palásiu Governu, Segunda loro-kraik (17/02/2020), konsidera situasaun polítika atuál hanesan raan iha urat halai laloos.

Nune’e, hatan ba jornalista sira kona-ba orientasaun Prezidente Repúblika Francisco Guterres Lú Olo ba partidu sira iha parlamentu nasionál atu halo movimentasaun hodi hetan solusaun, ho diplomasia Alkatiri hatete, hanesan ema bonito ida hein de’it ema sé mak atu ba hasoru.

“Ha’u hatete ona ba ita boot sira ida ne’e, katuas Bonito hein de’it ema se mak atu mai,” Alkatiri subliña.

Iha sorin seluk, mediadór ba situasaun polítika atuál José Manuél Ramos Horta haktuir, nia rasik hasoru malu ona ho Prezidente Partidu CNRT Kayrala Xanana Gusmão, no dehan líder karismátiku ne’e halo hela diálogu iha partidu laran no ho partidu sira seluk ne’ebé asentu parlamentar relasiona ho situasaun polítika atuál.

Tuir fonte kredivél Timor Post haktuir, Partidu CNRT sei halo konferénsia nasionál iha fulan Fevereiru ne’e nia rohan hodi halo desizaun ba sira nia pozisaun ba formasaun governu dasia. Maske nune’e, fonte ne’e dehan, komunikasaun ho partidu seluk asentu parlamentar lao dadauk liuliu ho PD, KHUNTO, UDT/FM no PUDD.

Entretantu rejultadu diálogu entre líder istóriku sira ne’ebé hala’o iha Palásiu Prezidensiál, Segunda (10/02/2020) kuaze oras hitu nia laran, konsege rejumu pontu tolu ne’ebé sai hanesan alternativu ba hakotu impase polítika iha rai laran.

Pontu tolu ne’e líder istóriku sira prefere entre ida maibé buka atu solusiona ho dalan polítika, maibé mós ho baze ba konstituisaun.

Hafoin diálogu Prezidente Repúblika, Francisco Guterres Lú Olo ba Jornalista sira subliña pontu tolu ne’e mak hanesan, dahuluk, eleisaun antesipada hanesan rekursu ikus liu; daruak, partidu polítiku sira ne’ebé asentu parlamentar nasionál hotu-hotu tenke halo movimentu polítiku oinsá mak bele dezeña opiniaun no hakarak atu bele hetan solusaun ba impase polítiku ida ne’e; no datoluk, primeiru ministru sei mantein nafatin primeiru ministru ba governu daualu to’o hetan solusaun ba situasaun polítika atuál.

Lú Olo dehan, liuhusi dalan diálogu ida ne’e nia fi’ar katak sei iha solusaun ida ne’ebé di’ak liu ba Timor Leste nia situasaun polítika hodi labele sakrifika nafatin dezenvolvimentu nasionál.

“Liu husi hanoin di’ak husi líder sira hotu para bele ultrapasa situasaun,” Lú Olo hatete.  (cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 1,289
  • Page views today : 2,166
  • Total visitors : 74,221
  • Total page view: 103,424

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur