Notísia foun


MANUFAHI—Miguel da Costa (64) ho nia oan feto Jacinta da Costa (19) hakotu iis hafoin haan kadiuk tasi iha Aldeia Kolkau, Suku Uma Bereloik, Postu Administrativu Alas, Munisípiu Manufahi.

Xefe Suku Bereloik Bernardo Fernandes Flores via telefone ba Timor Post, Tersa (11/02/2020), haktuir, akontesimentu ne’e iha loron Segunda, (10/02/2020).

Tuir kronolojia, Xefe Suku ne’e haktuir, Miguel ho Jacinta ba halo to’os, maibé iha dalan besik tasi peskador sira soe rede ba tasi no hatun dadauk ikan no hetan mós kadiak. Nune’e, Jacinta maka foti kadiauk hodi lori ba tein iha uma ba nia ho nia aman haan.

Xefe Suku hatutan, vítima na’in-rua haan kadiuk ne’e iha tuku sia dader. No iha tuku 12 meiudia, sira hahú muta, to’o tuku rua lorokraik aumenta tan ho iis boot maka Miguel hakotu iis kuaze tuku tolu lorokraik ne’e kedas.

Tanba ne’e, Xefe Suku haktuir tan, ambulánsia husi Sentru Saúde Alas nian tula kedas Jacinta hodi evakua ba Sentru Enternamentu Saúde Munisipíu Manufahi.

Entretantu Médiku Jerál Sentru Enternamentu Saúde Munisipíu Manufahi, Cristovão Corte Real Leo ba Timor Post hatete, nia parte simu duni pasiente Jacinta da Costa iha Segunda (10/02/2020) kalan ne’e no halo kedas tratamentu ba nia saúde.

Nia haktuir, bainhira nia parte halo atendimentu, pasiente ne’e laiha forsa, Iis boot, muta dala lima. “Ho ida ne’e mai ami tau oksijéniu, tau aimoruk promethazine,” Cristovão hatete ba Jornalista Timor Post iha nia kna’ar fatin, Tersa, (11/02).

Nia hatutan, hafoin tau aimoruk no oksijeniu to’o dader, maibé pasiente ne’e kontinua fali kabun moras, iis boot nafatin, kosar, malirin, tensuan sae ba 120 no respiratóriu iha 48. No haree ba ninia sintomas labele mellora maka nia foti desisaun transfere pasiente ba ospitál referál Maubisse.

Tuir observasaun Jornalista Timor Post, ambuánsia evakua pasiente Jacinta husi Sentru Enternamentu Saúde Munisipíu Manufahi iha dader oras, tuku ualu hodi lori ba ospitál referál Maubisse. Maibé konfirmadu, pasiente to’o iha dalan klaran labele augenta no iis kotu.

Jacinta kaben-nain. Jacinta husik hela nia kaben ho oan na’in ida. Tuir informasaun, Jacinta hakotu iis ho oan ida iha nia kanotak.

Ho akontesimentu ne’e, Xefe Suku Bereloik Bernardo Fernandes Flores husu ba nia komunidade hotu atu kuidadu ho konsumu kadiuk ka animal fuik sira ne’ebé dala rum abele afeta ba ema nia saúde no hakotu vida.

“Tanba ne’e hakarak apela ba komunidade sira katak bainhira hetan kadiuk tasi labele haan arbiru se lae afeita ba vida,” Bernardo subliña. (lcl)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 910
  • Page views today : 1,129
  • Total visitors : 84,757
  • Total page view: 118,936

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur