Notísia foun


DILI—Komunidade sira hetan hikas peskador Justino Lopes iha loron Domingu (09/02/2020), maizumenus oras, tuku 17:14, iha tasi ibun Tasi Tolu hateke husi rezidénsia Abílio Araújo nian, hafoin durante loron tolu nia laran nia sai husi uma ho nia kolega na’in rua ba halo peska iha tasi área Karantina, Tasi Tolu, Dili.

Komunidade sira hetan isin mate Justino namlele hela, nune’e komunidade sira fó hatene ba malu no autoridade sira mós to’o iha fatin ne’eba hodi ba lori sai husi tasi laran, no kontaktu kedas ba ambulánsia lori kedas ba Hospital Nacional Guido Valadares (HNGV), Dili.

Autoridade sira inklui membru F-FDTL sira husi Fujileiros maka akompaña prosesu ne’e ba ospitál hodi halo autópsia ba matebian hodi hatene motivu husi akontesimentu ne’e.

Tuir komunidade balun ne’ebé ba asiste mós prosesu buka tuir matebian durante loron tolu haktuir, lia nain sira halo tuir maka lafaek lori hikas matebian sai husi tasi laran. Maibé mós komunidade seluk hatete, sé lafaek maka tata no haan matebian nia isin labele kompletu hela de’it. Katak, ho lia nain sira nia hamulak lafaek bele lori sai fali maibé isin la kompletu ona.

Tuir observasaun jornalista Timor Post haktuir, iha loron datoluk buka tuir matebian, iha dader lia nain sira ho família sira hamulak duni iha tasi ibun, lori matebian nia hena no material peskas nian hodi bolu matebian ho hamulak no família sira tanis no halerik, husu perdaun ba lulik sira iha tasi laran no husu ba nain hotu atu lori hikas matebian nia isin maske sira la hatene loloos motivu husi akontesimentu ba Justino tanba lafaek mak tata no haan duni.

Hafoin hamulak, membru F-FDTL husi Fujileiru sira mós ba ajuda família sira hodi tún ba luku iha tasi hodi buka maibé la konsege hetan. No iha lorokraik maka komunidade sira ne’ebé la’ós ba asiste ema buka matebian maka hetan fali iha tasi laran no hakilar ba ema hotu rona hodi ba foti sai matebian.

To’o notísia ne’e hatun Timor Post seidauk hetan rejultadu autópsia husi HNGV.

Peskadór Justino Lopes ne’ebé ba tasi no la fila ba uma hahú iha loron 06/02/2020, mosu deskonfiansa tolu, entre ema mak oho soe ba tasi, mout-bele tanba korente tasi mak dada no lafaek mak haan duni.

Peskadór Justino (23) husi Suku Makili, Postu Atauru, Munisípiu Dili, hela iha Tasi Tolu. Nia ba hala’o atividade peska iha tasi area Kuarentena, Tasi Tolu,  Dili, kinta kalan (06/02/2020), oras, tuku 19:00 Otl. To’o kalan boot Justino la fila ba uma.

Komandante Operasaun Polísia Nasionál Timor Leste (PNTL), Armando Monteiro hatete, bainhira nia parte simu informasaun husi família no komunidade sira katak lafaek maka tata no lori lakon tiha Justino, ekipa husi Unidade Polísia Fronteira tún kedas ho ró ba tasi hodi buka tuir, to’o kalan hetan de’it Justino nia kalsa no kilat tasi iha tasi laran iha area Justino halo atividade peska ba.

Nune’e, Armando dehan, nia parte kontinua buka tuir Justino nia isin no sei halo investigasaun klean atu hatene kronolojia loloos husi akontesimentu ne’e.

Entretantu komunidade ida ne’ebé ba asiste ema buka tuir Justino iha tasi parte tasi tolu nian hatete, ema hotu bele dehan lafaek mak tata Justino, maibé presiza halo investigasaun klean tanba, bele mós loos, maibé mós bele ema maka oho so’e ba tasi ka fatin seluk, ou nia mout maka lafaek haan ka mout tanba korente tasi maka dada lakon tiha.

Tanba ne’e, komunidade ne’ebé lakohi fó sai nia identidade ba Timor Post subliña, tuir loloos polísia mós tenke halo investigasaun ba Justino nia kolega sira ne’ebé halo peska hamutuk, no husu informasaun klean liu tan husi família sira kona-ba Justino nia atividade lorloron. (cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 1,385
  • Page views today : 2,208
  • Total visitors : 71,391
  • Total page view: 98,702

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur