Notísia foun


DILI—Prezidente Repúblika  Francisco Guterres Lú Olo husu ba povu tomak atu lalika fi’ar ba buatus hotu kona-ba situasaun rai laran no espekulasaun sira relasiona ho karta ne’ebé nia simu husi Prezidente CNRT Kayrala Xanana Gusmão.

“Ha’u hakarak atu husu ba ita bo’ot sira, no ba povu tomak, atu lalika fi’ar buatus ka rumores sira hotu, problema ne’e (impase polítika) iha ona ha’u nia liman husik ha’u mak resolve,” Lú Olo afirma ba Jornalista sira hafoin partisipa iha serimónia selebrasaun loron FALINTIL-FDTL, iha Kuartel Jerál F-FDTL, Fatuhada, Dili, iha loron Domingu (02/02/2020).

Xefe Estadu dehan, konteúdu husi karta Xanana nian, nia mak bele hatene, no públiku la presiza hatene.

“Ha’u bele hatete momos katak, ha’u simu duni karta, husi señor Kay Rala Xanana Gusmão, ne’ebé haruka tuir husi nia Sekretáriu Jerál haruka ba ha’u, maibé ha’u hakarak atu hatete ba ita bo’ot sira katak, karta ne’e nia konteúdu ha’u mak hatene no ha’u labele fo sai ba ita bo’ot sira atu hatene,” Lú Olo subliña.

Prezidente Repúblika hahú tiha ona diálogu ho partidu polítiku sira asentu iha parlamentu nasionál, sosiedade sivíl inklui konviksaun relijiosu sira, jurista, veteranu, ekonomista no emprejáriu sira, no sei rona mós konsellu estadu hodi foti desizaun ikus ba hakotu impasse polítika iha rai laran.

Situasaun polítika sai manas liu tan bainhira bankada CNRT la fó votus a favor ba proposta Orsamentu Jerál Estadu (OJE) 2020 ne’ebé Primeiru Ministru Taur Matan Ruak ho nia membru governu sira aprejenta iha jeneralidade iha parlamentu nasional.

Ho situasaun ida ne’e, Timor Leste agora la’o deit ho orsamentu duodésimu. Katak laiha orsamentu ba dezenvolvimentu fíziku sira to’o prezidente repúblika hakotu impase polítika ne’e liuhusi dalan diálogu no iha fali proposta OJE foun. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,405
  • Page views today : 2,370
  • Total visitors : 74,337
  • Total page view: 103,628

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur