Notísia foun


DILI—Veteranu sira liuhusi Konsellu Kombatete Libertasaun Nasionál (KKLN), iha loron Segunda (03/02/2020) kumri konvite Prezidente Repúblika Francisco Guterres Lú Olo hodi partisipa iha reuniaun hodi husu hanoin sira ba hakotu impasse polítika iha rai laran.

Iha sorumutu ne’e, KKLN rekomenda hanoin prinsiál rua ba xefe estadu hodi tetu no halo desizaun. Dahuluk, KKLN husu ba prezidente repúblika atu foti desizaun ho imparsiál ho baze mak konsituisaun RDTL nian.

“Ami husu ba prezidente repúblika atu fó solusaun ba impase polítika ne’ebé iha  ho imparsialidade, tuir lei ne’ebé hakerek ona iha konstituisaun alias tuir kna’ar ne’ebé konstituisaun fó ba prezidente repúblika,” Prezidente KKLN, Vidal de Jesus “Riak Leman” haktuir ba Jornalista sira hafoin sorumutu iha Palásiu Prezidensiál, Bairro-pité, Dili.

Aleinde ne’e, Riak subliña, KKLN mós husu ba lider katuas sira inklui Xanana, Alkatiri, Ramos Horta, Taur, Lere no Lú Olo rasik atu buka túr hamutuk hodi hakotu ona impase polítika rai laran tanba, povu hakarak moris hakmatek, iha estrada di’ak, bee, eletrisidade no situasaun ekonomia ne’ebé estavel.

“Uluk iha funu, sira na’in hira ne’e mak hamutuk, ho povu no veteranus sira hodi hakotu funu ne’ebé naruk tebes i ema barak mak mate, nebe, impase polítika ne’ebé iha ha’u hanoin buat kiikoan,” Riak hatete.

Entretantu ba Jornalista sira, Riak husu ba povu tomak atu túr hakmatek atu akompaña de’it sá solusaun mak órgaun estadu sira ho líder polítika  sira foti hodi hakotu impasse polítika rai laran.

Riak foti ezemplu iha krize 2006, polítiku na’in sira mak problema maibé povu sira tuir maka ikus mai povu sira rasik maka sai vítima. Tanba ne’e, nia husu atu povu hakmatek iha fatin hodi fó oportunidade ba ukun nain sira rejolve problema.

“Ami husu ba povu tomak, veteranu, foinsa’e sira, túr hakmatek lalika hanoin barak, fi’ar iha ita nia maun boot sira, liuliu prezidente repúblika atu hasai desizaun hodi hakotu impase ida ne’e. di’ak liu ita túr hakmatek, krize 2006 ne’e hatudu tiha ona ba ita. Ita kiik halo problema nufin ita kiik nia uma mak hetan sunu, nebe, ida ne’e ezemplu ida hatudu ba ita, di’ak liu ita hakmatek hodi hein ita nia maun boot sira atu rejolve problema ida ne’e,” Riak hatete.

Prezidente Repúblika hahú tiha ona diálogu ho partidu polítiku sira asentu iha parlamentu nasionál, sosiedade sivíl inklui konviksaun relijiosu sira, jurista, veteranu, ekonomista no emprejáriu sira, no sei rona mós konsellu estadu hodi foti desizaun ikus ba hakotu impasse polítika iha rai laran.

Situasaun polítika sai manas liu tan bainhira bankada CNRT la fó votus a favor ba proposta Orsamentu Jerál Estadu (OJE) 2020 ne’ebé Primeiru Ministru Taur Matan Ruak ho nia membru governu sira aprejenta iha jeneralidade iha parlamentu nasional.

Ho situasaun ida ne’e, Timor Leste agora la’o deit ho orsamentu duodésimu. Katak laiha orsamentu ba dezenvolvimentu fíziku sira to’o prezidente repúblika hakotu impase polítika ne’e liuhusi dalan diálogu no iha fali proposta OJE foun.  (yto/cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,401
  • Page views today : 2,365
  • Total visitors : 74,333
  • Total page view: 103,623

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur