Notísia foun


DILI—The World Health Organization (WHO) deklara ona katak, moras Virus Corona sai hanesan situasaun emerjénsia global no atensaun internasionál nian.

Tanba ne’e, iha loron sábadu (01/02) lokraik, Ministériu Saúde hamutuk ho UN rezidente no Organizasaun Mundial Saúde (OMS), realiza enkontru urjénsia iha Ministériu Saúde Kaikoli, hodi diskute kona-ba preparasaun Ministériu Saúde nian kona-ba moras refere, bainhira infiltra tama mai Timor-Leste.

“Ministériu Saúde hamutuk ho UN rezidente no mós Organizasaun Saúde Mundial hala’o enkontru urjente para bele pasa informasaun sobre moras Corona Virus ne’ebé sai ona situasaun emerjénsia global no saida mak Ministériu Saúde atu halo.  Tanba ida ne’e mak hamutuk ho parseiru sira oinusa atu bele kontribui ba papél Ministériu Saúde nian, atu bele iha preparasaun urjente liuliu oinusa atu hametin liña koordenasaun ho parseiru liña ministerial sira.” informa Diretora Jerál Prestasaun Saúde Ministériu Saúde, Odete da Silva Viegas ba jornalista sira, hafoin remata enkontru.

Odete dehan, iha enkontru ne’e mós, kolia kona-ba atu halo desiminasaun informasaun regular ba públiku inklui ministériu relevante, sosiedade sivíl no mós eskola públiku sira. Alende ne’e kolia mós kona-ba preparasaun Ministériu Saúde nian bainhira moras refere akontese iha Timor.

“Ita hatene katak moras ne’e komesa espalla ona ba país sira seluk, infelizmente Timor seidauk iha kazu, maibé oinusa Ministériu Saúde nia preparasaun hamutuk ho UN sira, atu bele iha ona apoiu lojístika saida mak ita bele iha no oinusa kuandu iha kazu saida mak ita bele halo, ne’e hahú kedas husi pasajeiru sira tama mai husi pontu entrada sira, se ita kazu transfere ba iha fatin izolamentu iha Sentru Formoza ho Ospitál Nasionál Guido Valadares.” Odete informa.

Odete hateten, iha enkontru ne’e, parte sira deside atu kolia ho embaixada China no Ministériu Negósiu Estranjeiru, karik iha posibilidade atu halo Karantina ba pasajeiru sira ne’ebé mak fila husi nasaun afetadu.

“La’ós sidadaun China de’it, maibé ba pasajeiru hothotu ne’ebé mak hala’o viajen ba iha area afetadu. No ohin iha diskusaun ita hanoin mós katak, atu labele tama iha Timor, ita bele halo Karantina iha Indonesia-Bali no mós Australia, tanba prosesu  inkubasaun ba moras corona, hahú husi loron ida to loron sanulu resin haat. Se pasajeiru ne’e kuandu nia halo viajen mai, pasajeiru ne’e bele tranzmite moras ba iha pasajeiru sira seluk. Ida ne’e mak ohin ami diskute.” Odete relata.

Odete admite katak, iha tempu badak Ministériu Saúde hamutuk Organizasaun Saúde Mundial sei realiza planu asaun konkreta ida.

“Iha Tempu Curtu Prazu, ami espalla ona informasaun liuhusi kanál televizaun, hodi alerta 24 oras situasaun husi OMS kona-ba kazu mate hira, afeta hira no país hira mak agora daudaun afetadu. No iha tempu badak ami sei halo mós enkontru hodi fó sai informasaun diáriu ba públiku kona-ba situasaun atuál moras ne’e.” Katak Odete.

Odete haktuir, Organizasaun Mundial Saúde (OMS) hamutuk ho UN rezidente sira, iha kometimentu apoiu ekipamentu ba Ministériu Saúde.

“Ekipamentu ne’ebé mak sira atu apoiu mak, protesaun ba iha professional saúde inklui mós pesoál sira husi Alfándega no Migrasaun. Ekipamentu ne’e Faru kompletu hamutuk kedan ho nia Ókulu, Masker ho Luvas.” Odete subliña. (jry)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,385
  • Page views today : 2,209
  • Total visitors : 71,391
  • Total page view: 98,703

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur