Notísia foun


DILI—Reitor Instituto Supeiro Cristal (ISC) Sebastião Pereira husu Governu Timor – Leste,  liuhosi Ministéiru Negosius Estranjeirus  no Kooperasaun (MNEC), atu evakua lalais estudante ISC hamutuk ho  dosente sira kauze na’in 10 resin, ne’ebé oras ne’e daudaun hala’o hela estudu  iha Guangxi Normal University (GXNU) Xina.

“Ita foin simu informasaun husi estudante no dosente ISC, ne’ebé hala’o estudu iha Guangxi Normal University katak, virus Corona to’o ona iha Xina Súl, besik Guangxi Normal University.  Tanba  ne’e estudante no desente sira iha de’it ona uma laran. Atividade  hotu kuaze paradu total,”dehan Sebastião Pereira ba Timor Post iha kampus ISC, Balide – Dili, sabádu (01/02).

Nia dehan laiha meius urgente hodi evakua estudante sira ne’e, fila mai Timor – Leste, nune’e husu ba MNEC, atu bele koopera ho militar Aero Indonesia nian, iha ne’ebé oras ne’e mós, evakuan hela sira nia sidadaun husi Xina mai Indonesia.

“Problema seriu ida mak ai – han ba sira menus. Tan ne’e ami husu ba Ministeiru Negosius Estranjeirus no Kooperasaun, se bele halo koordenasaun ho forsa Aero Indonesia nian, hodi evakua lalais, ita nia estudante hirak ne’e, liu –liu ba estudante ISC, atu fila mai Timor – Leste, temporaria, se bele tau sira iha Bali de’it mós di’ak,” nia husu.

Nia konta sesta(31/01) ne’e, atIvidade iha Guangxi Normal University, la’o hanesan baibain maibé tama iha sabádu(01/012), atividade hotu paradu, tanba virus ne’e, alastra ona ba Xina Súl no fatin seluk ho lalais tebes.

“Iha loron kinta- sesta ne’e, ami simu informasaun husi ita nia estudante sira katak atividade hotu la’o ho di’ak.  Maibé  agora, situasaun la normal tanba relasiona ho virus Corona ne’ebé kuaze alastra ba teritoriu Xina tomak ho lalais,” nia hato’o.

Antes termina, Reitor ne’e informa mós katak, parte ISC konsege hato’o ona karta ida ba MNEC, hodi haree ba situasaun ne’e, liu –liu haree ba posibidade sira hodi evakua tiha estudante ISC, ne’ebé  daudaun ne’e seidauk fila mai Timor – Leste.

“Ami halo ona karta ida ba MNEC, hodi husu no haree urgente ba situasaun ida ne’e.  Kona ba, ita nia estudante sira ne’ebé hala’o estudu iha Xina.   Ita nia estudante sira ba aprende lian Mandarin. Ba Dosente sira hasai kursu iha nivel mestradu  nian, iha parte negosiu no jestaun,” hato’o husi Reitor, hodi hakotu.(ely)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 1,082
  • Page views today : 1,295
  • Total visitors : 37,946
  • Total page view: 52,266

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur