Notísia foun


DILI—Porta-vóz Aliansa Mudansa ba Progresu (AMP) afirma, nia rasik mak hakoi tiha ona aliansa ida ne’e iha loron 20 Janeiru 2020, tanba CNRT oho mate iha loron 17 janeiru 2020, bainhira partidu maioria iha aliansa ne’e la fó votus a favor ba proposta Orsamentu Jerál Estadu (OJE) 2020 iha Parlamentu Nasionál.

Partidu tolu ne’ebé hamutuk forma AMP hodi infrenta eleisaun antesipada 2018 liu ba kompostu husi CNRT, PLP ho KHUNTO. Rejultadu husi eleisaun antesipada ne’e partidu tolu ne’e ida-idak hetan kadeira, CNRT kadeira 21, PLP kadeira 8 no KHUNTO kadeira 5.

Ho kadeira ne’ebé partidu tolu ne’e hetan hamutuk kadeira 34 no konsege forma governu daualu lideradu Primeiru Ministru Taur Matan Ruak.

Estruturalmente, Xanana Gusmão mak hanesan Prezidente AMP, Taur Matan Ruak hanesan Porta-vóz, no José da Silva Naimori Bucar hanesan konsilleru Máximu.

“CNRT oho tiha ami (AMP) iha 17 janeiru no ha’u hakoi tiha iha 20 janeiru tinan ne’e (2020),” Taur afirma ba Jornalista sira hafoin hasoru malu ho Prezidente Repúblika Francisco Guterres Lú Olo, Kinta (30/01/2020), iha Palásiu Prezidensiál Bairro-pité, Dili.

Maske nune’e, Taur subliña, agora daudaun hanesan Primeiru-Ministru kontinua kontaktu nafatin ho prezidente repúblika no mós órgaun soberanía sira seluk atu buka solusaun ba situasaun atuál.

Entretantu membru sira husi partidu CNRT ho KHUNTO afirma sira nia pozisaun hanesan ba destinu Aliansa Mudansa ba Progresu (AMP) ne’ebé tuir Primeiru Ministru Taur Matan Ruak, fahe malu ona tanba proposta Orsamentu Jerál Estadu (OJE) 2020 nian ne’ebé nia parte propoen sumba iha parlamentu nasional, iha loron Sesta (17/01/2020).

Sekretáriu Jerál CNRT, Francisco Kalbuadi Lay ho Prezidente Konsellu Diretiva Nasional (CDN sigla Portugués), Dionísio da Costa Babo Soares, hatete, AMP harii husi partidu tolu, CNRT, PLP ho KHUNTO. Nune’e, partidu tolu ne’e seidauk iha desizaun ida kona-ba divórsiu.

” AMP seidauk deside buat ida, tanba ne’e ita sei servisu hanesan baibain. Laiha isu dehan katak ida ne’e no ida ne’e ba atu sai,” Dionísio ba Jornalista sira iha Palásiu Governu, Dili, Tersa  (22/01/2020).

Ministru Negósiu Estranjeiru no Kooperasaun (MNEK) ne’e husu atu Jornalista sira halo konfirmasaun ne’e iha SekretáriuJerál AMP nian, tanba hanesan ministru nia la ko’alia barak kona-ba assuntu polítiku nian.

Entretantu Deputadu husi bankada KHUNTO atuál Vise Daruak Prezidente Parlamentu Nasionál, Luis Roberto la rekoñese deklarasaun Taur Matan Ruak ne’ebé hatete AMP laiha ona, tanba kestaun ne’e pretense ba koligasaun la’ós kompeténsia Primeiru Ministru nian.

Luis dehan, Taur nia deklarasaun ne’e fó sai bainhira ba hasoru prezidente repúblika nu’udar primeiru ministru la’ós hanesan Prezidente ba PLP.

“Ha’u nia konsiderasaun haree ba deklarasaun primeiru ministru nian nu’udar xefe governu la’ós hanesan presidente do partido,” Luis hatete ba Jornalista Timor Post iha Parlamentu Nasionál, Tersa (21/01/2020).

Nia dehan, situasaun polítika atuál, nia parte kontinua entrega ba primeiru ministru ho prezidente repúblika atu buka solusaun di’ak liu nune’e bele hakotu ona impase polítika iha rai laran no konsentra ba dezenvolvimentu nasionál.

“Bele interpretasaun públiku ninian relasiona ba iha ita nia primeiru ministru atual agora ko’alia, ema bele interpreta prezidente partidu mak ko’alia más ba ha’u nu’udar membru parlamentu konsidera ida ne’e nu’udar primeiru ministru mak ko’alia,” Luis hatutan.

Nia dehan, deklarasaun Taur nian kona-ba AMP bele mós tanba haree ba proposta orsamentu jeral estadu sumba iha parlamentu nasional hatudu ona AMP naksobu ona. Maibé nia reafirma, AMP to’o agora sei eziste hela. (cao)

 

 

 

Please follow and like us:

NOTÍSIA FOUN

Site Statistics

  • Users online: 0 
  • Visitors today : 515
  • Page views today : 670
  • Total visitors : 77,891
  • Total page view: 109,135

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur