Notísia foun


DILI—Deputada bankada KHUNTO Olinda Guterres iha nia intervensaun iha deklarasaun votu hafoin votasaun ba jeneralidade Orsamentu Jerál Estadu (OJE) ba tinan fiskal 2020 iha plenária Parlamentu Nasionál, Sesta (17/01/2020), arepende hamutuk iha koligasaun Aliansa Maioria Parlamentar (AMP) hodi forma governu daualu.

Olinda ho lian maka’as afirma kestaun ida ne’e tanba hafoin deate loron tolu tutuir malu no ikus ba votasaun iha jeneralidade ne’e, deputadu sira husi bankada CNRT nu’udar partidu boot liu iha AMP hafoin PLP tuir KHUNTO ne’e la a favor ba proposta lei orsamental ne’e, hodi rejulta la kontinua ba debate espesialidade.

Deputadu sira husi CNRT hiit hotu kartaun kór matak nu’udar kartaun abstensaun , ho nune’e votus a favor hamutuk 13 de’it, kontra 15, abstensaun hamutuk 25.

Nune’e, iha deklarasaun votu, Olinda deklara, sei lakohi repete tan nia desizaun hamutuk ho koligasaun ida tuir nia tau aas liu interese partidu duke interese povu no nasaun nian.

“Ha’u la mai ho laran moras, ha’u mai ho firme ba partidu ida ne’e (KHUNTO) katak, osan ida ne’e (OJE 2020) bele pasa, maibé “ao fim ao cabo” la pasa fali. Ita mai luta iha ne’e afinal ita nia laran la fó ba povu ne’eb’e luta ba ita mai tur iha ne’e,” Olinda hatete.

“Agora mak KHUNTO nia matan foin moos. Saida mak ita boot sira halo mai iha parlamentu ida ne’e. Ita polítika, polítika fo’er. Polítika la moos ida. Ha’u uluk ha’u hatene ida ne’e, ha’u la mai hamutuk ho ita boot sira. Ha’u salah pilih,” Olinda hatutan.

Nia konsidera OJE 2020 la pasa ne’e tanba deputadu sira tau liu interese partidu aas liu povu nia interese hodi barilla hotu governu nia hanoin.

“Ha’u nia fuan ne’e moras, biar ha’u nia partidu foun, karik iha loron ruma ita boot sira bolu ha’u mos ha’u sei fila kotuk ba ita boot sira,” Olinda hatete.

Entretantu iha intervensaun deputadu husi bankada KHUNTO, Luis Roberto atuál Vise Daruak Prezidente Parlamentu Nasionál hatete, nia desizaun hodi vota a favor ba proposta lei OJE 2020 tanba hakarak ho orsamentu ne’e bele responde nesesidade povu ho nasaun nian.

“Ha’u la tau interese partidu maibé ha’u kuda interese nasionál iha fuan. Tanba ne’e ha’u vota a favor ba orsamentu 2020 hodi responde ba nesesidade povu i estadu nian,” subliña Luis Roberto.

Entretantu, iha oportunidade ba deklarasaun votu ne’e tuir observasaun Timor Post haktuir, deputadu sira husi bankada apoiu governu rua, PLP ho KHUNTO aproveita, nune’e mós bankada sira opozisaun, maibé CNRT hili dalan nonok.

Ho rejultadu votasaun ba jeneralidade OJE 2020 ne’e, signifika proposta ne’e la hakat ona ba espesialidade. No tuir konstituisaun, governu sei iha oportunidade ba dala ida tan hodi aprejenta hikas proposta foun ba OJE 2020 nian. Maibé, bainhira la aprova tan maka konstituisaun fó kompeténsia ba Prezidente Repúblika dissolve Parlamentu Nasional ho hakat ba eleisaun antesipada.  (cao)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 968
  • Page views today : 1,367
  • Total visitors : 80,220
  • Total page view: 112,448

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur