Notísia foun


DILI— Polísia Nasionál Timor-Leste (PNTL) liuhusi Servisu Investigasaun Kriminál Nasionál (SIKN) halo investigasaun preliminária deskobre kazu droga ho tipu sabu-sabu kilogram 3,253 ne’ebé autoridade seguransa sita husi suspeitu CBM iha Aeroportu Internasionál Nicolau Lobato, Dili, iha relasaun ho kazu kazál timoroan ne’ebé to’o agora sei kastigu iha Indonézia.

SIKN fi’ar ida ne’e tanba kazu kazál timoroan bainhira autoridade seguransa Repúblika Indonézia nian kaptura iha Atambua-Indonézia iha loron 29 Maiu 2019, nia modu hanesan ho suspeitu CBM nian.

“Ita fiar kazu ida ne’e iha relasaun ho kazu ne’ebé ita atende iha tinan kotuk, se ita lembra karik iha kazu pil estasi musan hamutuk 4.874 lori ba Indonézia iha relasaun ho ema ne’ebé manda mai,” Inspetór Xefe Servisu Investigasaun Kriminál Nasionál (SIKN), Mozinho Correia subliña iha konferénsia imprensa, ne’ebé hala’o iha Kuartél Jerál PNTL Kaikoli, Dili, iha ne’ebé asiste mós husi suspeitu CBM.

Mozinho dehan, nia parte sei halo investigasaun klean ba kazu ida ne’e to’o deskobre rede sira ne’ebé halo servisu ida ne’e no involve timoroan sira.

Kazu involve CBM, autoridade seguransa deteta droga haruka husi Nasaun Nijéria mai Timor-Leste liuhusi Ajénsia DHL too Aeroportu Internasionál Nicolau Lobato iha loron 6 Janeiru 2020 ho Aviaun Citilink.

Droga ne’e hatama ho modus tau kompresór AC (Air Conditioner) karreta nian fui ho xumbu alumíniu ne’ebé solda metin.

Suspeitu CBM servisu iha restaurante ida Timor Plaza hanesan resepsionista maka ba foti pakote pesa kompresór ne’e iha Aeroportu.

Mozinho rekoñese, iha fulan Outubru 2019 suspeitu simu droga ho modu hanesan mós haruka ba Atambua Indonézia no parte autoridade la konsege deteta. (ato/cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 171
  • Page views today : 194
  • Total visitors : 238,364
  • Total page view: 344,318