Notísia foun


DILI—Prezidente Parlamentu Nasionál, Arão Noe subliña, normalmente substituisaun deputadu ka deputada ida iha parlamentu nasionál depende ba naran iha lista tuir lei deputada ida sai tenke substitui husi deputada ida, labele troka ho deputadu.

Tanba ne’e, Arão haktuir, kona-ba substituisaun Saudoza Albina Marçal, durante deputada ne’e sei moras no baixa iha ospitál hetan substituisaun husi deputada Bendita Magno. Maibé tuir Arão, se iha desizaun seluk ne’e depende ba Partidu CNRT.

“Depende ba naran iha lista tuir lei deputada ida sai tenki substitui husi deputada ida, labele troka ho deputadu. Se deputadu mak sai bele troka ho deputadu ka deputada,” Arão klarifika ba Timor Post via telefone, Sábadu (04/01/2020).

Nia hatutan, sé kandidatu ida la konkorda atu ba substitui deputadu ka deputada ida bele halo deklarasaun katak nia la disponivel atu ba troka deputadu/a ida, partidu bele husu fali ba kandidatu tuir mai iha lista.

“Subtituisaun hotu-hotu iha parlamentu nasionál la’o nune’e, sein deklarasaun husi kandidatu ne’ebé naran uluk parlamentu nasionál sei la simu substituisaun ne’e,” Arão salienta.

Antes ne’e Timor Post haktuir lista kandidatu ba deputadu iha eleisaun antisipada iha 12 Maiu 2018, ne’ebé Aliansa Mudansa ba Progresu (AMP) hatama ba Tribunál Rekursu, husi parte Partidu CNRT nian, Cedelizia Faria dos Santos maka nu’udar feto naran tuir kedas kandidatu sira ne’ebé substitui ona deputadu eleitu sira.

Cedelizia iha lista 51 tuir lista AMP nian, maibé tanba mosu bankada keta-ketak iha parlamentu nasionál, maka tuir lista (husi CNRT nian) Cedelizia tama iha lista 27.

Bazeia ba lista CNRT nian ne’e, hafoin Oscar de Araújo troka Xanana Gusmao; José Virgilio R. Fereira troka Kalbuadi Lay; Veneranda Lemos troka Jacinto Rigoberto; Patrocinio Fernandes dos Reis troka Dionisio Babo Soares; no Virgina Ana Belo troka Virgilio Smith; Cedelizia iha posibilidade maske Natalino dos Santos iha lista 26, tanba haree husi persentajen feto husi CNRT hanesan deputada iha Parlamentu Nasional.

Deputada husi CNRT hamutuk na’in-9 inklui Saudoza Albina Marçal iha Parlamentu Nasional. Inkuantu mane hamutuk na’in-12.

Maske nune’e, tanba Cedelizia atualmente assume hela pasta hanesan Sekretária Jerál Parlamentu Nasionál, maka, durante Saudoza Albina Marçal sei moras, Bendita Moniz Magno (naran/feto iha lista CNRT tuir kedas Cedelizia ho Brígida Correia) mak substitui hela.

Entretantu tuir fonte kredibel Timor Post haktuir, partidu sei halo hela diskusaun ba assuntu ne’e.

“Durante Saudoza Albina moras, kompaneira Bendita mak assume hela responsabilidade ida ne’e, maibé tuir lista haree husi persentajen feto, kompaneira Cedelizia mak uluk, tuir Brigida mak Bendita no tuir fali Rosa Soares. Partidu sei haree hela tanba kompaneira Cedelizia atualmente assume hela Sekretária Jerál iha Parlamentu Nasionál,” subliña fonte ne’e.

Saudoza Albina Marçal Freitas alias Bia Shana Falu hakotu ona iis Hospital Nacional Guido Valadares (HNGV), Dili, iha loron Sábadu (28/12/2019), tanba moras kankru ne’ebé reprejentante povu ne’e enfrenta durante ne’e. (cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 1,059
  • Page views today : 1,509
  • Total visitors : 80,311
  • Total page view: 112,590

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur