Notísia foun


DILI— Arsebispu Virgílio do Carmo da Silva, SDB, subliña, selebrasaun troka tinan tuan ho foun ho folin boot liu maka la’ós despede de’it tinan tuan ho ksolok sasan mundu nian, maibé oportunidade mós ba ema ida-idak atu despede mós hahalok, jestu no desizaun a’at sira, hodi simu tinan foun ho moris foun.

Arsebispu hatete, dala barak iha selebrasaun iha momentu espesial ida ne’e, ema gasta enerjia hotu hodi buka ksolok ne’ebé folin laek.

“La’ós despede de’it tinan tuan, maibé oportunidade atu despede hahalok a’at, despede jestu a’at no desizaun a’at sira,” Arsebispu afirma iha nia omília iha selebrasaun misa iha kalan despede tinan tuan 2019 no simu tinan foun 2020, iha loron 31/12/2019, iha Igreja Katedral, Dili.

Arsebispu hatutan, labele sukat ksolok ho sasan ne’ebé iha. “Dala barak gasta ita nia enerjia hodi buka ksolok iha fatin ne’ebé sala. Buat balun ne’ebé dala ruma sala no husik liu de’it,” nia dehan.

Ema ruma matenek no neon nain iha ita nia leet, tenke hatudu ho hakraik an ho hahalok matenek ninian, tanba matenek husi Nai Maromak mak laran mos, hatene sadia, hatene perdua no hatene fo domin ba malu.

Entretantu iha omília ne’e mós Arsebistu ko’alia kona-ba justisa. Amu dehan, justisa mak sei hamoris dame. Laiha dame bainhira laiha justisa. Justisa mak xave ba dame iha mundu. Valor ne’ebé buras iha mundu maka tenke iha justisa ne’ebé loos.

Arsebispu liga ba situasaun real iha rai laran, hodi hatete, liafuan deskonesidu sai tiha kultura ida iha sosiedade nia leet. Afinal liafuan ne’e hodi falun tiha justisa, krime.

“Ita tenke kombate hahalok ida ne’e. Sarani lolo’os tenke so’e no husik tiha hodi kaer metin kultura dame no justisa sosial ne’ebé loos mak kultura lolo’os timor nian,” Arsebispu hatutan.

Nia salienta, relasaun ne’ebé atu buras tenke hakiak konfiansa atu labele halo abut deskonfiansa metin iha família no sosiedade nia leet.

Arsebispu dehan, funu hahú tanba labele suporta diversidade ema seluk nian. Hakuak metin idealizmu no halo diferensia iha sosiedade. Tenke destroi hahalok lori destroisaun ba dame.

Kria fraternidade ne’ebé loos no mútua. Ne’ebé hari husi Maromak rasik. Ita labele nega katak paz ne dezezu iha ema ida idak nia fuan. Tanba ne tenke dialogu ba malu konversa. Labele husik liu leet deit oportunidade atu hasai nakukun sira husi ida idak nia an.

Kada momentu no oportunidade ema ida idak moris iha mundu ne aproveita ho didiak. Ne knaar ida ba ema ida idak.

Arsebispu subliña, Nain Feto mak nu’udar sasin ba dame. Sasin ba lia loos. Nune iha loron dahuluk tinan foun nian selebra loron Nain Feto.

“Prezente paz nian mai ita lori ba malu. Ita hein tinan foun ida ne lori paz no dame iha tinoroan sira nia leet hahú husi família uma laran no ba nasaun tomak,” Arsebispu haklaken. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 159
  • Page views today : 209
  • Total visitors : 78,165
  • Total page view: 109,520

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur