Notísia foun


DILI—Arsebispu Virgilio do Carmo da Silva SDB, subliña iha nia omília iha selebrasaun misa Natal kalan, Tersa, 24/12/2019, iha igreja Katedral, Dili, katak, ema ida labele sai obstákulu ba ema seluk nia moris.

“Ita labele sai obstákulu ba ksolok, labele sai nune’e iha família no iha sosiedade. Tenke hakaas án atu sees husi obstákulu ida ne’e,” Arsebispu subliña iha nia omília ne’ebé partisipa iha misa ne’e, Prezidente Repúblika, Francisco Guterres Lu Olo ho nia família no sarani rihun ba rihun.

Arsebispu hatete, Jesus mai iha mundu hanesan liurai ida maibé la sai obstákulu ba ema seluk nia moris. “Nia mai atu soi povu. Nia mai tanba ita. Ita mak nia ema. Ita mak nia povu. Ita tenke rekoñese sala. Ita presiza duni roman no paz,” Arsebispu hatutan.

Arsebispu dehan, kalan natal nu’udar kalan espesial tanba hatudu duni buat ne’ebé diferente, iha ne’ebé Jesus nia moris iha bibi luhan hatudu simplisidade nu’udar ema iha ema ki’ak sira nia leet.

Tanba ne’e, líder igreja katólika dioseje Dili ne’e salienta, ho Jesus nia simplesidade ne’e hatudu ba ema iha mundu atu banati tuir, dedika an ba harii dame, atu nune’e moris laiha ódio no vingansa, tuda no hana malu.

“Ita tenke dedika án hodi harii dame. Laiha tuda, hana, ódiu no vinga malu. Haki’ak naroman lolo’os iha ita nia moris. Ita tenke kontribui hodi kontrui pas, iha família, iha sosiedade no iha nasaun,” Arsebispu subliña tan.

Jesus mak roman mundu nian. Naroman ne’ebé dada no atrai ema moris iha mundu. Nune’e, Amu husu ba sarani tomak atu halo naroman ba án labele iha liur de’it. Tenke tama to’o laran hodi halakon nakukun.

“Naroman ne’ebe peneta nakukun sala nian. Naroman mak liafuan dahuluk Maromak ko’alia ba nia ema. Husi ne’e ema nunka kole atu buka naroman, se mak hakarak moris iha nakukun buka atu haree roman ida ne’e,” Arsebispu dehan.

“Povu labele hela iha nakukun asíliu sira nian. Ne’e terus boot ida. Iha momentu sira ne’e mak profeta mosu hodi haklaken lia loos no roman. No sai ksolok boot ne’ebé povu hein hela,” Arsebispu hatete.

“Ita povu livre ida. Laiha buat ida halo ema tauk. Nune’e tenke sai ema ksolok, iha família iha bairro no iha komunidade laran. Tenke sente haleu ho naroman. Falta karik seriedade iha fuan tenke muda iha selebrasaun ida ne’e,” Arsebispu haklaken.

Nune’e, Arsebispu salient, selebrasaun natal la’ós ho konvite baibain ida maibé obrigadaun ida nu’udar fi’ar nain. Ba Maromak liu husi Jesus mak sei hetan duni salvasaun boot.

“Labele kontra ita nia konsiensia rasik. Labele sai atan ba án rasik ho la livre iha mundu. Jesus mai hanesan ki’ak ida iha ki’ak sira nia leet,”  Don Virgilio termina omília ho lee Amu Papa Francisco nia orasaun fiar nian.

PREZIDENTE REPÚBLIKA DESEJA SANTO NATAL

Entretantu hafoin misa, midia Prezidensia Republika fo sai komunikadu ne’ebe Timor Post assesu haktuir, Prezidente Repúblika Francisco Guterres Lú Olo lori família hato’o deseja santo Natal ba povu Timor-Leste.

“Natal nu’udar festa Família nian! Iha Família laran mak fatin dahuluk hodi transmite valores husi inan no aman ba oan sira, husi avó sira ba bei-oan sira, husi bin no maun sira ba alin sira! Ha’u ho ha’u nia família tomak deseja ba imi ida-idak ho imi-nia família Santo Natal no Prósperu Ano Novo, nakonu ho pás, domin no ksolok.”

“Obrigadu wain ba apoiu tomak ne’ebé imi hotu fó ba Prezidente Repúblika durante tinan 2019 no ha’u ho ha´u-nia família konta nafatin ho imi-nia apoiu, imi-nia dedikasaun no imi-nia amizade iha tinan foun 2020!”Ha’u-nia hako’ak boot ba imi hotu!. (cao)

 

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,414
  • Page views today : 2,268
  • Total visitors : 71,420
  • Total page view: 98,762

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur